44 günlük müharibədən sonra kapitulyasiya aktına imza atan məğlub Ermənistanın baş naziri Nikol Paşinyan etiraz aksiyaları və istefalar fonunda müqavimət göstərsə də, artıq hakimiyyətini qorumaqda çətinlik çəkir. Bu səbəbdən ciddi siyasi böhranın hökm sürdüyü şəraitdə Paşinyan parlamentdəki çoxluq vasitəsilə bəzi qanun və məcəllələrə dəyişiklik etmək yolu ilə iqtidarını möhkəmləndirmək istəyir. Ermənistan KİV-də yer alan məlumatlara görə, ölkədə bütün sahələrdə vəziyyət acınacaqlı olduğu üçün sosial-iqtisadi tənəzzüldən nəsibini alan sadə vətəndaşlar ilk fürsətdə ölkəni tərk etməyə çalışırlar.
Onu da qeyd edək ki, Paşinyanın istefasını tələb edən müxalif “Vətənin xilası naminə hərəkat”ın rəhbərlərinin eks-prezidentlərlə görüşləri siyasi böhranın yeni mərhələyə qədəm qoyduğundan xəbər verir. Belə ki, müxalifətin əvvəllər 18 fevral tarixinə elan etdiyi ümumrespublika mitinqinin vaxtını dəyişdirməsinin də son görüşlə əlaqədar olması iddiaları var. Qeyd edək ki, hərəkatın koordinatoru İşxan Saqatelyan müxalifətin mitinqinin 20 fevralda Yerevanda baş tutacağını bildirib. İ.Saqatelyan “FaktInfo” agentliyinin müxbirinə verdiyi açıqlamada sabiq prezidentlər S.Sarkisyan və R.Koçaryanla görüşlə bağlı səslənən iddiaları rədd edərək deyib ki, əsas hədəf bu uğursuz hökuməti dərhal hakimiyyətdən uzaqlaşdırmaqdır. “Vətən” partiyasının mətbuat katibi Sos Hakopyan isə “Aysor.am”a bildirib ki, müxalifət küçə aksiyalarını aktivləşdirmək barədə qərar qəbul edib və hakimiyyətlə hər hansı bir əməkdaşlıq istisna olunur. Respublikaçı partiyanın nümayəndəsi Eduard Şarmazanov isə baş nazir postuna müxalifətin vahid namizədinin dəyişdirilməsi məsələsinin müzakirə olunmadığını söyləyib.
Yeri gəlmişkən, Yerevan şəhərinin ümumi yurisdiksiya məhkəməsinin əslində məhkum hesab edilən R.Koçaryanla bağlı qəbul etdiyi qərar da cəmiyyətdə və bəzi siyasi dairələrdə təəccüblə qarşılanıb. 2008-ci il mart hadisələrinə görə mühakimə edilən R.Koçaryanın bu günlərdə yenidən başlayan məhkəmə prosesinə ara verilməsi və 3-8 fevral tarixləri arasında Ermənistanı tərk etməsinə icazənin təmin olunması mövcud hakimiyyətə qarşı yeni tənqidlərin ünvanlanmasına səbəb olub. Belə ki, iddialara görə, hakim Danibekyan eks-prezidentin ölkədən çıxmasına icazə barədə qərarı birbaşa Paşinyanın tələbi ilə verib. Digər məlumatlara görə, R.Koçaryan bir daha geri qayıtmamaq şərtilə ölkəni tərk edib.
Qeyd edək ki, artıq neçə gündür, yerli mediada ölkədən çıxmaq istəyən vətəndaşların çoxluğu nəticəsində “Zvartnots” hava limanında sıxlıq yarandığı vurğulanır. Məsələ ilə bağlı parlamentdə çıxış edən “Çiçəklənən Ermənistan” partiyasının deputatı Naira Zöhrabyan Ermənistanda yaranmış acınacaqlı vəziyyətdən bezən ermənilərin, sözün əsl mənasında, ölkədən qaçdığını deyib. Rəsmi statistikaya görə, son 3 gündə Ermənistanı hava yolu ilə 3900 nəfər tərk edib.
Bütövlükdə, müxalifətin hakimiyyəti devirmək üçün müxtəlif vasitələrə əl atdığı bir vaxtda ermənilər kütləvi şəkildə ölkəni tərk etmək niyyətindədirlər. Ekspertlərin fikrincə, sadə ermənilər hər hansı siyasi qüvvənin Ermənistanı mövcud böhrandan çıxaracağına inanmırlar.
Qaşqay ZİYƏDDİNOĞLU