Abşeron və Qobustan rayonlarında ictimai nəqliyyatın keyfiyyətinin qiymətləndirilməsi məqsədilə “İctimai xidmətlərin əhatəliliyinin və keyfiyyətinin artırılması üçün qərar qəbuletmə mexanizmlərinin işlənməsi” pilot layihəsinin təqdimatı keçirilib. Bu barədə AZƏRTAC-a AzTU-dan məlumat verilib. Bildirilib ki, universitetin rektoru Vilayət Vəliyev pilot layihəyə magistr və doktorantların cəlb olunduğunu deyib. Rektor qeyd edib ki, layihənin ən böyük uğuru isə özəl sektorun, beynəlxalq təşkilatın, icra hakimiyyəti və qanunverici orqanların, ali təhsil müəssisəsi və ictimaiyyətin birgə işləməsidir. Universitetdə olan elmi-tədqiqatlar birbaşa əmək bazarı ilə əlaqəli olmalıdır. İlkin pilot layihə AzTU üçün baza rolunu oynayacaq. Bu, həm də tədqiqat mədəniyyətinin formalaşmasına müsbət təsir edəcək. Hazırda tədqiqatların biznesdən kənarda qaldığını vurğulayan rertor qeyd edib ki, belə layihələr universitet-sənaye işbirliyinin formalaşması baxımından çox əhəmiyyətlidir.

Milli Məclisin deputatı, layihənin həmmüəlliflərindən biri Şahin Seyidzadə belə bir layihənin Abşeron və Qobustan ərazisində həyata keçirilməsinin təqdirəlayiq addım olduğunu deyib. Bildirib ki, sözügedən ərazi nəqliyyatla bağlı həssas ərazidir. Layihənin kağız üzərində qalmaması üçün sorğunun nəticəsi müvafiq qurumlara göndəriləcək. Tədbirdə çıxış edən BMT-nin İnkişaf Proqramının innovasiyalar tədqiqi rəhbəri Leyla Seyidzadə pilot layihədə innovasiyaların tətbiqi üçün böyük potensialın olduğunu deyib. O, layihənin zənginləşdirilməsi ilə bağlı xarici ekspertlərlə birgə əməkdaşlığın əhəmiyyətini vurğulayıb. Daha sonar layihənin rəhbəri, AzTU-nun müəllimi Fuad Daşdəmirov görüləcək işlərlə bağlı məlumat verib. Bildirib ki, AzTU tələbələri əhali arasında sorğu keçirəcək və həmin məlumatlar emal olunacaq. Daha sonra məlumatlar təhlil olunaraq tədbirlər planı işlənəcək. Növbəti mərhələdə layihə üzrə elmi-tədqiqat işləri aparılacaq və yekun nəticə barədə ictimaiyyətə məlumat veriləcək.

Sorğu və planlaşdırılan işlər haqqında məlumat verən “ERA Marketing Center” şirkətinin direktoru Elmir Qasımov bildirib ki, əhali arasında sorğuların aparılması ilə bağlı AzTU tələbələri üçün təlim keçirilib. Sorğu zamanı sualların tərtibi, layihənin keçirildiyi ərazinin GPS koordinatlarının alınması və s. məlumatlar tələbələrin diqqətinə çatdırılıb. Eyni zamanda, planşetlər vasitəsilə aparılacaq sorğuda texniki qaydalar, istifadə olunacaq proqramlar barədə də tələbələr məlumatlandırılıb. E.Qasımov qeyd edib ki, Abşeron rayonunda 6, Qobustanda isə 5 gün aparılacaq sorğunun keçirilməsinə ümumilikdə 12 tələbə cəlb olunub. Sorğuda əhali arasından 700 nəfərin iştirakı nəzərdə tutulub.

Vurğulanıb ki, vətəndaşların nəqliyyatla bağlı səsləndirdiyi problemlərin ilk dəfə elmi cəhətdən həlli təcrübə olaraq digər sahələrdə də tətbiq edilməlidir.

Qeyd edək ki, layihənin aprel ayında başa çatdırılması planlaşdırılıb.