Bəhreyn Motoidman Federasiyası Bakıda keçiriləcək “Formula-1” yarışlarının təşkilinə öz töhfəsini verəcək

Bakı:

19°C

68%

5m/s

AZ RU EN

Ana səhifə / İdman / Bəhreyn Motoidman Federasiyası Bakıda keçiriləcək “Formula-1” yarışlarının təşkilinə öz töhfəsini verəcək

Bəhreyn Motoidman Federasiyası Bakıda keçiriləcək “Formula-1” yarışlarının təşkilinə öz töhfəsini verəcək

23.10.2015 [10:09]

Bakıda keçiriləcək “Formula-1” Avropa Qran-pri yarışlarının əsas promouter təşkilatı olan “Bakı Şəhər Halqası” şirkəti ilə Bəhreyn Motoidman Federasiyası arasında əməkdaşlıq haqqında saziş imzalanıb.
AZƏRTAC xəbər verir ki, imzalanma mərasimi Bəhreynin Motoidman Federasiyasının və Marşallar Klubunun mütəxəssislərindən ibarət qrupun Bakıda keçiriləcək “Formula-1” Avropa Qran-pri yarışları ilə əlaqədar Azərbaycana səfəri çərçivəsində baş tutub.
Tərəflər arasında bu əməkdaşlığı dəstəkləyən Azərbaycan Avtomobil Federasiyası (AAF) yarış zamanı trek ətrafında cərəyan edəcək idman əməliyyatlarının təşkili işini həyata keçirəcək.
Saziş pilotların təhlükəsizliyini, həmçinin ümumi təhlükəsizlik tədbirlərini əhatə edən yanğınsöndürmə, xilasetmə, tibbi yardım, təxliyə və s. əməliyyatların dəqiq və yüksək səviyyədə aparılması və bilavasitə bu prosesi həyata keçirən xüsusi marşallar qrupunun cəlb olunması və müvafiq təlimlərin təşkilini əks etdirən çərçivə sənədindən ibarətdir. Bu əməliyyatlar üzrə bilavasitə məsul olan Bəhreyn nümayəndələri yerli mütəxəssislərlə birlikdə Bakıdakı şəhər trasını gəzərək onu yaxından öyrənib və marşalların trek üzrə paylanması üçün müvafiq məkanları müəyyən ediblər. Marşallar trek boyu hərəkət edən sürücülərə lazımi komanda və ismarıcları çatdırmaq üçün istifadə olunan xüsusi bayraqlarla təmin ediləcəklər.
“Bakı Şəhər Halqası” şirkətinin baş icraçı direktoru Arif Rəhimov deyib ki, “Formula-1” Avropa Qran-pri yarışları bir çox xüsusiyyətlərinə görə bu günədək Azərbaycanda təşkil olunmuş beynəlxalq tədbirlərdən seçiləcək. Belə ki, Bakıda keçiriləcək yarış ən sürətli şəhər treki olaraq 500 milyondan çox televiziya tamaşaçısının izləyəcəyi möhtəşəm idman hadisəsi olacaq. Bəhreynli ekspertlərlə birgə apardığımız iş növbəti aylar ərzində tras üzrə hazırlıq və planlama işlərinə öz faydasını verəcək. Bəhreyn Motoidman Federasiyası yarışların və idman əməliyyatlarının səmərəli təşkili üzrə dünya standartlarına imza atıb. Komandamız bu standarta tam cavab vermək niyyətindədir.
Qeyd edək ki, Bəhreyn Motoidman Federasiyasının təcrübəli marşallar komandası gələn il Bakıda keçiriləcək Avropa Qran-pri yarışlarına cəlb olunacaq.
Uzunluğu 6 kilometrdən artıq olan Bakı trası uzunluğuna görə dünyada ikincidir. Bakı halqası elə təşkil olunub ki, yarış zamanı “Formula-1” avtomobilləri paytaxtın UNESCO-nun dünya mədəni irs siyahısına daxil edilən İçərişəhər, Bakının müasir göydələnləri və Xəzərin sahilboyu ərazisini özündə birləşdirən ecazkar simasını görəcəklər.

Paylaş:

Baxılıb: 1082 dəfə