“Reklam haqqında” yeni qanun bu sahədə fəaliyyətin daha səmərəli tənzimlənməsinə xidmət edir

Bakı:

20 °C

88 %

1 m/s

Əlaqə

AZ RU EN

Ana səhifə / Siyasət / “Reklam haqqında” yeni qanun bu sahədə fəaliyyətin daha səmərəli tənzimlənməsinə xidmət edir

“Reklam haqqında” yeni qanun bu sahədə fəaliyyətin daha səmərəli tənzimlənməsinə xidmət edir

08.04.2015 [09:43]

Millət vəkilləri qanunu təkmil sənəd kimi dəyərləndiriblər
Məlum olduğu kimi, Milli Məclisin aprelin 3-də keçirilən iclasında “Reklam haqqında” yeni qanun layihəsi qəbul edilib. 4 fəsil 39 maddədən ibarət olan qanun Azərbaycan Respublikasında reklam istehsalının, onun mallar, işlər və xidmətlər (əmtəə) bazarında yerləşdirilməsi və yayımının dövlət tənzimlənməsinin hüquqi əsaslarını, reklam fəaliyyəti subyektlərinin özünütənzimləmə sahəsində vəzifələrini və səlahiyyətlərini müəyyən edir. Qanun ölkə ərazisində reklam fəaliyyətinin subyektləri arasında reklamın sifarişi, istehsalı, yayımlanması, istehlakı ilə bağlı yaranan münasibətlərə tətbiq edilir.
Sənədin təqdimatı ilə bağlı Milli Məclisin İqtisadi siyasət komitəsinin sədri Ziyad Səmədzadə bildirib ki, ilk dəfə parlament 1997-ci ildə “Reklam haqqında” qanunu qəbul edib: “Həmin vaxt ölkənin sosial-iqtisadi vəziyyəti aşağı idi. İndi o vaxtdan 15 ildən artıq müddət keçib və Azərbaycan sosial-iqtisadi sahədə ciddi uğurlara nail olub. Buna görə də, müasir dövrün tələblərinə uyğun reklam fəaliyyətinin daha səmərəli tənzimlənməsinə ehtiyac var”.
Komitə sədri deyib ki, müstəqilliyimizin qorunması, ölkə iqtisadiyyatının davamlı inkişafı üçün Ulu öndər Heydər Əliyevin uğurlu iqtisadi siyasətinin reallaşması nəticəsində çox böyük nailiyyətlər əldə olunub. Onun fikrincə, iqtisadi həyatın bütün sahələrində böyük inkişaf prosesi gedir: “Bu dövrdə reklam sistemində də müəyyən uğurlarımız əldə olunub. Lakin açıq demək lazımdır ki, müasir dövrün tələblərinə uyğun reklam fəaliyyətinin daha səmərəli tənzimlənməsinə ehtiyac var. Yəni, dünya ölkələri ilə müqayisədə Azərbaycanın reklam bazarındakı göstəricilər iqtisadiyyatın ümumi parametrləri ilə uyğunlaşmır. Reklam sahəsinə ciddi yanaşmaya, bu layihəyə iqtisadçı, siyasətçi və vətəndaş gözü ilə yenidən baxmağa ehtiyac var. Bu sahədə mövcud olan boşluqların aradan qaldırılması üçün geniş potensialımız var”.
Qanunda reklama dair anlayışlar verilib, eləcə də, reklam yayımlanması vəsaitlərinin, müxtəlif əmtəələrin reklamının xüsusiyyətləri, reklam sahəsində dövlət nəzarəti və s. məsələlər əksini tapıb.
Onu da bildirək ki, qanun layihəsində bir sıra qadağalar nəzərdə tutulur. Belə ki, yeni qanun layihəsinə əsasən, tütün, tütün məmulatlarının və onların ləvazimatlarının, o cümlədən, tənbəki çubuqlarının, qəlyanların, elektron siqaretlərin, siqaret kağızlarının, alışqanların reklamı qadağandır. Eyni zamanda, Azərbaycanda dərslik, dərs vəsaiti, tədris materialı, məktəb gündəliyi, dəftər, albom, yetkinlik yaşına çatmayanlar üçün nəzərdə tutulmuş kitabda reklam yerləşdirilə bilməz. Həmçinin, yetkinlik yaşına çatmayanlar üçün nəzərdə tutulmuş dövri mətbu nəşrlərdə onlara aid olmayan əmtəələrin, alkoqollu içkilərin reklamı qadağandır. Bununla yanaşı, teatr tamaşasının gedişində və kinofilmlərin nümayişi zamanı reklamın yayımlanması dövlət və bələdiyyə orqanlarının yerləşdiyi binalarda, tarixi və memarlıq abidələrinə aid edilmiş tikililərdə reklamın yerləşdirilməsi qadağan edilir.
Eyni zamanda, Azərbaycan ərazisində hərbi təyinatlı bütün növ silahların, texnikanın (icazə verilmiş ov və idman silahları istisna olmaqla) reklamı qadağan edilir. Yeni qanuna əsasən, hərbi təyinatlı silahların və texnikanın reklamı Azərbaycanın xarici ölkələrlə hərbi-texniki əməkdaşlığı çərçivəsində keçirilən beynəlxalq tədbirlərdə və sərgilərdə ola bilər.
Həmçinin, yeni qanun layihəsinə əsasən, mərc oyunlarının, lotereyaların açıq məkanda reklamı uşaq və təhsil, səhiyyə müəssisələrindən ən azı 100 metr uzaqda olan reklam daşıyıcılarında yerləşdirilməlidir.
Qanun layihəsinin müzakirəsi zamanı millət vəkilləri bir sıra təkliflərlə çıxış ediblər. Məsələn, Milli Məclisin Sosial siyasət komitəsinin sədr müavini Musa Quliyev bildirib ki, dərsliklərin və dərs ləvazimatlarının üzərində reklam şəkilləri ləğv edilməlidir: “Məsələn, dəftərin üzərində futbolçu Messinin şəkli var. Onun əlində isə pepsi butulkası var. Halbuki onun yanında top olmalıdır. Hamımız da bilirik ki, bu növ içki vasitələri uşaqlar üçün necə zərərlidir. Bununla da uşaq bu içkiyə meyilli olur və ondan istifadə etməyə maraq göstərir”.
Millət vəkili alkoqollu içkilərin reklamına da münasibət bildirib. Onun fikrincə, rəsmi idman yarışları zamanı alkoqollu içkilərin reklamına qadağa qoyulmalıdır. Deputat, ümumiyyətlə, spirtli içkilərin reklam edilməsinin əleyhinədir.
Millət vəkili Sahibə Qafarova isə təklif edib ki, mərc oyunlarının reklamı zamanı vaxt məhdudiyyətləri qoyulmalıdır.
Ümumiyyətlə, müzakirələr zamanı millət vəkilləri xeyli təkliflər irəli sürüblər. Bu təkliflərin gələcəkdə nəzərə alınması istisna deyil. Amma bütövlükdə deputatlar “Reklam haqqında” yeni qanun layihəsini təkmil sənəd kimi dəyərləndiriblər.
Nardar BAYRAMLI

Paylaş:

Baxılıb: 692 dəfə