“İlham Əliyev. Bioqrafiya davam edir...” kitabının ərəb dilində variantının təqdimatı olub

Bakı:

12°C

100%

3m/s

Əlaqə

AZ RU EN

Ana səhifə / Sosial / “İlham Əliyev. Bioqrafiya davam edir...” kitabının ərəb dilində variantının təqdimatı olub

“İlham Əliyev. Bioqrafiya davam edir...” kitabının ərəb dilində variantının təqdimatı olub

20.06.2014 [09:18]

İyunun 19-da Azərbaycan Dillər Universitetində (ADU) Milli Məclisin deputatı, yazıçı-publisist Hüseynbala Mirələmovun və Viktor Andriyanovun birgə qələmə aldıqları “İlham Əliyev. Bioqrafiya davam edir...” kitabının ərəb dilinə tərcümə olunmuş variantının təqdimat mərasimi keçirilib.
AzərTAc xəbər verir ki, Heydər Əliyev adına Muzey-Lektoriyada keçirilən tədbirdə Milli Məclisin deputatları, ərəb ölkələrinin Azərbaycandakı səfirləri iştirak ediblər.
Təqdimat mərasimində ADU-nun rektoru, Milli Məclisin deputatı, professor Səməd Seyidov “Görkəmli adamların həyatı” silsiləsindən nəşr edilmiş kitabın məziyyətlərindən, ərəb dilinə tərcümə olunmasının əhəmiyyətindən danışıb. Rektor bildirib ki, “İlham Əliyev. Bioqrafiya davam edir...” kitabında Azərbaycan Prezidenti İlham Əliyevin çoxcəhətli fəaliyyətindən bəhs edilir. Faktların səhihliyinə və zənginliyinə görə dünyanın bir çox kütləvi informasiya vasitələrinin etibarlı mənbə kimi istifadə etdikləri kitab indiyədək müxtəlif dillərə tərcümə olunub.
Rektor “İlham Əliyev. Bioqrafiya davam edir...” kitabının ərəb dilində nəşrinin Azərbaycanın ərəb ölkələri ilə yaxınlaşmasında mühüm rol oynayacağına, kitabın universitetdə başqa dillərə də tərcümə olunacağına əminliyini bildirib. Nəşrin beynəlxalq aləmdə yerini ildən-ilə möhkəmləndirən, iqtisadi inkişaf tempi ilə dünya ictimaiyyətinin diqqətini cəlb edən Azərbaycanın son dövr tarixinin öyrənilməsi baxımından mühüm mənbə olduğunu diqqətə çatdıran rektor əsərin ADU-da ərəb dilini öyrənən tələbələr üçün faydalı tədris vəsaitinə çevriləcəyini vurğulayıb.
Daha sonra kitabın Küveytdə keçirilmiş təqdimat mərasimindən bəhs edən videoçarx nümayiş olunub.
Bildirilib ki, kitab Azərbaycanın Küveytdəki səfirliyinin təşəbbüsü və dəstəyi ilə bu ölkənin nüfuzlu “Suad Əl-Sahab Nəşriyyat və Yayım Evi”nin mətbəəsində çapdan çıxıb. Kitabı ərəb dilinə səfirliyin əməkdaşı Babək Əhmədov tərcümə edib. Nəşrin redaktoru Ammar Həsəndir.
Tədbirdə Milli Məclisin Aqrar siyasət komitəsinin sədri Eldar İbrahimov çıxış edərək kitab barəsində fikirlərini bölüşüb. Bildirib ki, kitab Prezident İlham Əliyevin bütün dünyada tanınan, parlaq zəkaya, uğurlu siyasi gələcəyə malik dövlət xadimi olduğunu bir daha sübut edir. O, Prezident İlham Əliyevin yürütdüyü məqsədyönlü siyasət sayəsində Azərbaycanın iqtisadi potensialının durmadan artdığını, əhalinin rifah halının yüksəldiyini, daxili və xarici siyasətdə böyük uğurların əldə olunduğunu vurğulayıb.
Milli Məclisin Sosial siyasət komitəsinin sədri, professor Hadi Rəcəbli kitabın ərəb dünyasına inteqrasiya baxımından əhəmiyyətini qeyd edib, nəşrin gələcək əməkdaşlıqda böyük rol oynayacağına əminliyini bildirib. Komitə sədri nəşrin təqdimatının keçirilməsinin ölkəmizdə kitaba, yaradıcı insanlara verilən qiymətin sübutu olduğunu vurğulayıb.
Mərakeş Krallığının Azərbaycandakı səfiri Həsən Hami ərəb ölkələrinin Azərbaycanda fəaliyyət göstərən səfirləri adından çıxış edərək deyib ki, Prezident İlham Əliyev haqqında geniş məlumatı əks etdirən kitab Azərbaycan və dünya ictimaiyyəti üçün dəyərli mənbədir. Diplomat kitabın ərəb dilində nəşrinin təkcə ərəbdillilər üçün deyil, eyni zamanda, bu regiona maraq göstərənlər üçün də faydalı olacağına əminliyini bildirib.
Sonda kitabın həmmüəllifi H.Mirələmov çıxış edərək bildirib ki, “İlham Əliyev. Bioqrafiya davam edir...” kitabı ilk dəfə 2007-ci ildə Moskvada məşhur “Molodaya qvardiya” nəşriyyatının “Görkəmli adamların həyatı” seriyasından “Bioqrafiya davam edir” adlı yeni layihəsi əsasında rus dilində nəşr olunub. Kitabda Heydər Əliyev yolunun layiqli davamçısı İlham Əliyevin uşaqlıq, gənclik və tələbəlik illəri ardıcıl əks olunur. Azərbaycanın dövlət başçısına olan oxucu marağı nəzərə alınaraq kitab türk, gürcü və Ukrayna dillərinə də tərcümə edilib. Müəllif bundan əvvəl bu seriyadan “Heydər Əliyev” və “Zərifə Əliyeva” kitablarını da geniş oxucu kütləsinin ixtiyarına verdiyini diqqətə çatdırıb.
H.Mirələmov “İlham Əliyev. Bioqrafiya davam edir...” kitabının ərəb dilində variantının ərsəyə gəlməsində əməyi olanlara, tədbirin təşkilatçılarına və iştirakçılarına minnətdarlığını bildirib.

Paylaş:

Baxılıb: 1722 dəfə