Yeni tədris ilində...

Bakı:

22 °C

61 %

5 m/s

Əlaqə

AZ RU EN

Ana səhifə / Sosial / Yeni tədris ilində...

Yeni tədris ilində...

08.09.2023 [12:20]

Hədəflər və gözləntilər

Sentyabrın 6-da yeni tədris ili ilə bağlı brifinq keçirilib. Brifinqdə iştirak edən Elm və təhsil naziri Emin Əmrullayev qarşıdakı dövr ərzində tədrisin təşkili qaydaları, yeni hədəflər, gözləntilər barədə məlumat verib. Nazir sual doğuran məsələlərə aydınlıq gətirib.

E.Əmrullayev 2023-2024-cü tədris ili üzrə təhsilalan və işçi heyətinin sayını açıqlayıb. O qeyd edib ki, təhsilalanlar 2,1 milyon nəfər, işçi heyət isə 300 min nəfər təşkil edəcək: “Onlardan 220 mini məktəbəqədər təhsil, 1,6 milyonu ümumtəhsil, 33 mini peşə təhsili, 60 mini orta ixtisas təhsili, 220 mini isə ali təhsil müəssisələrində təhsil alan və çalışanlar olacaq”.

Nazir, həmçinin bildirib ki, Azərbaycanda 654 məktəbin ya təmirə ya da yenidən tikilməsinə ehtiyac var: “Son illərdə qəzalı məktəblərin sayı 30 faizə qədər azalıb. Bu məktəblər arasında iri məktəblərin sayı azdır”.

Azad olunmuş ərazilərdə 6 məktəb

E.Əmrullayev yeni tədris ilində işğaldan azad olunmuş ərazilərdə 6 məktəbin fəaliyyət göstərəcəyini qeyd edib. Onun sözlərinə görə, bu məktəblərdə, ümumilikdə, 780 şagird təhsil alacaq və onlara 94 müəllim dərs deyəcək.

Nazir qeyd edib ki, Şuşa şəhər 1 nömrəli məktəbin açılışının tədris ilinin ikinci yarısında olacağı gözlənilir.

Orta aylıq əməkhaqqı artacaq

Elm və təhsil naziri müəllimlərin orta aylıq əməkhaqqı məsələsinə də toxunub. O bildirib ki, 2023-cü ilin sentyabr ayı üçün bu məbləğ 830 manat təşkil edib: “Sertifikatlaşdırma imtahanları keçirildikcə, müəllimlərin əməkhaqlarına əlavələr olunacaq. Bu da orta aylıq əmək haqlarının artmasına gətirib çıxaracaq. 2023-cü ilin fevralında bu rəqəm 790 manat olmuşdu”.

Son bir ildə 50 bağça müdiri...

Nazir bildirib ki, son bir il ərzində məktəbəqədər təhsil müəssisələrinə mərkəzləşmiş qaydada işə qəbul çərçivəsində 241 nəfər işə götürülüb. Onun sözlərinə görə, bundan sonra işə qəbul bu formada aparılacaq: “İl ərzində 50 bağça müdiri işdən azad olunub”.

Bu fənn üzrə dərs saatları artırılacaq

E.Əmrullayev yeni tədris ilində Azərbaycan dili fənni üzrə dərs saatlarının sayının artırılacağını qeyd edib. O bildirib ki, rus sektorlarında bir sıra fənlər, o cümlədən Tarix, Zəfər tarixi, musiqi dərsləri Azərbaycan dilində tədris olunacaq: “Şagird 9-cu sinfə gəlib çatır və görürük ki, ana dilində danışa bilmir. Problemin məktəblərdə, yoxsa təhsil proqramında olduğunu müəyyənləşdiririk”.

37 yeni dərslik hazırlanıb...

Nazir qeyd edib ki, cari ildə 24 dərslik təkmilləşdirilib, 37 yeni dərslik hazırlanıb: “Ümumilikdə, 318 dərslik 7,4 milyon nüsxədə çap olunub. Dərsliklər şəhər və rayon məktəblərinə göndərilib. Növbəti həftədən isə ucqar yerlərdə yerləşən məktəblərimiz də bu dərslikləri əldə edəcəklər”.

75 min tələbənin qəbulu nəzərdə tutulur

E.Əmrullayev vurğulayıb ki, 2026-2027-ci tədris ilində ali təhsil müəssisələrinə 75 min tələbənin qəbulu nəzərdə tutulur. Nazir son 10 ildə ali təhsil müəssisələrinə tələbə qəbulunun 40 faizdən çox artdığını bildirib: “Dövlət sifarişli əsaslarla qəbul olan tələbələrin sayı 2 dəfədən çox artıb. Magistr səviyyəsi üzrə 2023-2024-cü tədris ilində qəbul 13 485 nəfər olub ki, bu da 10 il əvvəl ilə müqayisədə 3 dəfə çoxdur. 2023-2024-cü ildə tələbə köçürülməsi üzrə 4 316 müraciət daxil olub, 80 faizi təsdiqlənib”.

Telefondan istifadə qadağan edilə bilər...

Məktəbə telefon gətirilməsini qadağan edən hüquqi normanın olmadığını söyləyən nazir qeyd edib ki, bu məsələ məktəbin daxili qaydaları çərçivəsində tənzimlənə bilər: “Bəzi məktəblərdə pilot qaydada yoxlanılır və bununla bağlı konkret qaydalar müəyyənləşdirilə bilər. Gələcəkdə məktəblərdə telefondan istifadənin qadağan edilməsi mümkündür”.

Təhsildə güzəşt Vətənə xəyanət etmək kimidir

E.Əmrullayev təhsildə güzəşt edilməsi məsələsinə də toxunub. Nazirin sözlərinə görə, təhsildə güzəşt eləmək vətənə xəyanət etmək kimi bir şeydir. O bildirib ki, təhsildə güzəşt elə də yaxşı söz deyil: “Məktəbəqədər təhsil müəssisələrinin müəllimləri üçün sertifikatlaşdırmada hansısa güzəşt etmək doğru deyil. Başa düşməliyik ki, adamın ixtisası məktəbəqədər təhsil deyilsə, deməli, həmin şəxsin faydası da olmayacaq”.

Nazir sertifikasiya imtahanından kəsilən 743 müəllimin əmək müqaviləsinə xitam verilməsinə də münasibət bildirib: “Bu gün ümumi təhsil səviyyəsində 700-dən çox müəllimin əmək müqaviləsinə xitam vermək bizim üçün də ağırdır. Amma başqa yol yoxdur”.

Bəzi ixtisasların tədris müddəti qısaldıla bilər

E.Əmrullayev bildirib ki, ali təhsil pilləsində bəzi ixtisasların tədris müddətinin qısaldılması üçün növbəti illərdə pilot layihələr həyata keçirilə bilər. O, qeyd edib ki, artıq müəyyən hesablamalar var və modelləşmə edilib: “Lakin hazırda bunu daha çox ali təhsil müəssisələri ilə müzakirə edirik. Bunlar əsasən, turizm, İT və magistratura səviyyəsində təhsil almağa ehtiyac olmayan ixtisaslardır”.

Dərs saatlarının bölgüsü

Nazirin fikrincə, yalnız diaqnostik qiymətləndirmə və ya sertifikasiya balı ilə dərs saatlarının bölgüsü düzgün deyil. Onun sözlərinə görə, burada müxtəlif faktorlar həmişə nəzərə alınır: “Bizdən asılı olmayan obyektiv səbəblər var. Bunlardan biri də qalmış mirasdır, yəni 8 sinfi olan məktəbdə 30 müəllim varsa, dərs saatını necə bölürsən də problem olacaq. Bizim belə məktəblərimiz çoxdur ki, 8 ibtidai sinif var, amma orada 30 ibtidai sinif müəllimi işləyir. O müəllimlərin hansısa birini işdən azad etmək ixtiyarımız yoxdur. Məktəb direktoru həmin müəllimlərə də dərs saatları verməlidir. Amma bu, bəzi hallardadır, bütün sistem belə deyil. Ümumilikdə isə düşünürəm sertifikasiya imtahanları bizə kifayət qədər imkan verəcək ki, bu işi daha yaxşı görək.

Bu ixtisasının tədrisi dayandırılacaq...

E.Əmrullayev bildirib ki, hansı ali təhsil müəssisəsi müəllim hazırlaya bilmirsə, həmin müəssisədə bu ixtisasın tədrisi dayandırlacaq: “Hansısa ali təhsil müəssisələrinin məzunları bu gün bizim imtahanlarımızda minimum balı toplaya bilmirlərsə, həmin müəssisələrin rəhbərinə bu haqda suallar verilir. Bu, davamlı hal alarsa, həmin müəssisədə müəllimlik ixtisasının tədrisi dayandırılacaq”.

Yataqxana: Xroniki problemlərdən biri

Nazir ali təhsil müəssisələrində yataqxana problemlərindən də danışıb. O qeyd edib ki, yataqxana məsələsi xroniki problemlərdən biridir: “Bu gün 4 min yerlik yataqxana var. Bir və ya iki yataqxananın tikintisi və ya təmiri nəzərdə tutula bilər. Orada keçmiş məcburi köçkün olan vətəndaşlarımız yaşayır. Yataqxanalar ilə bağlı vəziyyət elə də yaxşı deyil”.

Yeganə BAYRAMOVA

Paylaş:

Baxılıb: 775 dəfə