Azərbaycan Respublikasının Prezidenti İlham Əliyev dünən İndoneziya Respublikasının ölkəmizdəki fövqəladə və səlahiyyətli səfiri Raden Prayono Atiyantonun etimadnaməsini qəbul edib.
Səfir Raden Prayono Atiyanto fəxri qarovul dəstəsinin qarşısından keçib.
Raden Prayono Atiyanto etimadnaməsini Prezident İlham Əliyevə təqdim edib.
Sonra Azərbaycan Prezidenti İlham Əliyev səfirlə söhbət edib.
Azərbaycan Respublikası ilə İndoneziya Respublikası arasında siyasi əlaqələrin uğurla inkişaf etdiyini vurğulayan dövlətimizin başçısı ölkələrimizin beynəlxalq təşkilatlarda bir-birilərinə daim qarşılıqlı dəstək vermələrinin önəmini qeyd edib. Azərbaycanın İndoneziyada bir neçə il bundan əvvəl səfirliyinin fəaliyyətə başladığını vurğulayan Prezident İlham Əliyev İndoneziyanın ölkəmizdə səfirliyinin açılmasını əməkdaşlığımızın daha da genişləndirilməsi işinə xidmət edəcəyini deyib. Dövlətimizin başçısı Azərbaycan ilə İndoneziya arasında əlaqələrin iqtisadi, investisiya qoyuluşu, birgə layihələr və ticarət sahələrində inkişaf etdirilməsi üçün yaxşı imkanların olduğunu deyib. Raden Prayono Atiyantonun İndoneziyanın ilk səfiri kimi Azərbaycanda diplomatik fəaliyyətə başlamasının önəmini qeyd edən Prezident İlham Əliyev ona uğurlar arzulayıb.
Səfir Raden Prayono Atiyanto İndoneziya Respublikasının Prezidenti Susilo Bambanq Yudhoyononun salamlarını dövlətimizin başçısına çatdırıb. O, ölkəsinin Azərbaycan ilə dostluğu və əməkdaşlığı genişləndirməyə maraqlı olduğunu deyib. ölkələrimiz arasında siyasi əlaqələrin səviyyəsinin razılıq doğurduğunu vurğulayan diplomat iqtisadi sahədə əməkdaşlığın inkişaf etdirilməsi üçün İndoneziya Prezidentindən xüsusi tapşırıq aldığını deyib.
Dövlətimizin başçısı Prezident Susilo Bambanq Yudhoyononun salamlarına görə minnətdarlığını bildirib, Onun da salamlarını İndoneziya dövlətinin başçısına çatdırmağı xahiş edib.