Noyabr ayı Azərbaycanın müasir tarixində təkcə təqvim ayı deyil, milli qürurun, şərəfin və zəfərin zirvəyə ucaldığı müqəddəs bir dövrdür. Noyabrın 8-də Şuşanın azad olunması ilə qazanılan Böyük Zəfərin ardınca, 9 Noyabr — Dövlət Bayrağı Gününü qeyd etmək xalqımıza xüsusi bir ruh və əvəzolunmaz qürur hissi bəxş edir. Bu gün üçrəngli bayrağımız sadəcə dövlət rəmzi kimi deyil, bir millətin azadlıq eşqi, müstəqillik andı və qalibiyyət pasportu kimi dalğalanır.

​         1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilən üçrəngli bayraq müstəqilliyimizin, milli identikliyimizin və müasir dövlətçilik təfəkkürümüzün təməl daşı oldu. Mavi, qırmızı və yaşıl rənglərin ahəngi, ortasındakı ay-ulduzla birlikdə köklərimizə bağlılığı, müasirliyi və milli-mənəvi dəyərlərimizi təcəssüm etdirdi.

​         Ulu Öndər Heydər Əliyevin Naxçıvandan başlatdığı bayraq hərəkatı ilə bu müqəddəs rəmz müasir Azərbaycanın rəsmi dövlət bayrağına çevrildi. 2020-ci ilin Zəfər yürüşü isə üçrəngli bayrağımızın qarşısında yeni bir tarixi üfüq açdı: 30 il həsrətində qaldığımız doğma torpaqlarımızda — Cəbrayılda, Füzulidə, Zəngilanda, Qubadlıda, Kəlbəcərdə, Laçında, Ağdamda və xüsusən Qarabağın tacı Şuşada bayrağımız yenidən ucaldıldı.

Azərbaycan Respublikasının Prezidenti cənab İlham Əliyev demişdir: ​"Bizim bayrağımız qürur mənbəyimizdir. Bizim bayrağımız ruhumuzdur, ürəyimizdir.

​         Bu gün Azərbaycan bayrağının Xankəndidə, Xocalıda, Şuşada və Xudafərin körpüsündə dalğalanması təsadüfi deyil. Bu, canlarını Vətən uğrunda fəda edən minlərlə şəhidimizin qanı, qazilərimizin şücaəti və Azərbaycan əsgərinin polad iradəsi sayəsində mümkün olmuşdur.

​         Döyüş meydanında bayrağını bağrına basaraq irəli atılan qəhrəmanlarımız bu rəmzi azadlıq və ədalət məşəlinə çevirdilər. Əsgərlərimizin sıldırım qayaları fəth edərək Şuşa qabarı üzərində dalğalandırdığı üçrəngli bayraq həm də otuz illik işğala və haqsızlığa vurulan son nöqtə idi.

Ölkə başçısı cənab İlham Əliyev demişdir: ​"Gün gələcək və işğal altında olan torpaqlarda qaldırılmış Azərbaycan bayrağı Azadlıq meydanına gətiriləcək və hərbi paradda nümayiş etdiriləcək."

​         Bu gün Dövlət Bayrağı Gününü qeyd edərkən hər bir azərbaycanlı qalib ölkənin vətəndaşı olmanın sonsuz fəxarətini yaşayır. Müstəqilliyimizin və suverenliyimizin rəmzi olan üçrəngli bayrağımız indi işğaldan azad edilmiş şəhər və kəndlərimizdə ucalan yeni binada, məktəbdə, bərpa olunan tarixi abidələrdə və ən yüksək zirvələrdə sərbəst kükrəyir.

​         Azərbaycan bayrağı bundan sonra da hər zaman azad, mağrur və uca dalğalanacaq; xalqımızın birliyini, dövlətimizin qüdrətini və gələcəyə olan inamını bütün dünyaya nümayiş etdirəcəkdir. Bayramın mübarək, Müzəffər Azərbaycan!

Həbibə Vəliyeva

YAP Culfa rayon təşkilatının fəalı