Bir yumruqda birləşən dostluq, qardaşlıq

Bakı:

26 °C

51 %

2 m/s

Əlaqə

AZ RU EN

Ana səhifə / Gündəm / Bir yumruqda birləşən dostluq, qardaşlıq

Bir yumruqda birləşən dostluq, qardaşlıq

15.07.2025 [10:44]

Qardaş ölkələr olan Azərbaycan və Türkiyənin dövlət başçıları müntəzəm olaraq bir-biri ilə əlaqə saxlayır və intensiv səciyyə daşıyan qarşılıqlı fəaliyyət istiqamətləri ilə bağlı aktual müzakirələr aparırlar. İyulun 12-də Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğana zəng edib.

Telefon söhbəti zamanı Azərbaycan Prezidenti PKK terror qruplaşmasının özünü ləğv etməsi və silahı yerə qoyması ilə bağlı qardaş Türkiyə xalqını ürəkdən təbrik edib. Dövlətimizin başçısı bu mühüm hadisənin Türkiyə Prezidenti Rəcəb Tayyib Ərdoğanın rəhbərliyi ilə ölkədə həyata keçirilən qətiyyətli siyasətin, güclü liderliyin, sarsılmaz iradənin, milli birliyin və həmrəyliyin parlaq təntənəsi olduğunu vurğulayıb.

Telefon danışığı zamanı Prezident İlham Əliyev “Terrorsuz Türkiyə” hədəfinə çatmaq yolunda atılan bu addımı regionda sülh və sabitliyə xidmət edən mühüm dönüş nöqtəsi kimi dəyərləndirib və qəbul edilmiş qərarın tam icrası istiqamətində Türkiyə dövlətinə və xalqına uğurlar arzulayıb.

İkitərəfli münasibətlərin ən yüksək səviyyəsi

Azərbaycanla Türkiyə arasında getdikcə möhkəmlənən münasibətlər bir sıra təbii amillərdən - ortaq tarixdən, xalqların eyni mahiyyət daşıyan ənənələrindən, milli-mənəvi dəyərllərindən, həyat tərzindən, etiqad birliyindən və bu kimi diğər amillərdən qaynaqlanır. Bu gün hər iki ölkədə həm dövlətlər, həm də cəmiyyətlər səviyyəsində tarixə istinad etməklə gələcək əlaqələrin daha da möhkəmləndirlməsinə güclü istək var. Məhz bunun nəticəsidir ki, hazırda Azərbaycan - Türkiyə münasibətləri ən yüksək səviyyədədir və dünyada bu dostluğa, qardaşlığa xələl gətirə biləcək qüvvə yoxdur. Telefon söhbəti zamanı Prezident Rəcəb Tayyib Ərdoğan göstərilən dəstəyə və diqqətə görə Prezident İlham Əliyevə təşəkkürünü bildirib, Azərbaycan ilə Türkiyə arasında dostluq və qardaşlıq münasibətlərinin bütün sahələrdə uğurla inkişaf etdiyini vurğulayıb.

Bu gün ən yüksək səviyyədə olan Azərbaycan-Türkiyə dostluğu ilk növbədə dövlət başçıları arasında olan münasibətlərindən qaynaqlanır. Hər iki lider bir-birinə “əziz qardaşım” deyə xitab edir. Türkiyənin dövlət başçısı ölkəmizə münasibətdə bir qayda olaraq əlini ürəyinin üstünə qoyaraq “Can Azərbaycan” ifadəsini işlədir. Prezident İlham Əliyev isə sarsılmaz qardaşlığımızı “Bir yumruq” kimi səciyyələndirib.

Liderlərin səmimi münasibətlərinə, bütövlükdə, siyasi dialoqun yüksək səviyyəsinə uyğun olaraq iki ölkə arasında münasibətlər müxtəlif istiqamətlərdə uğurla inkişaf edir. Çox doğru olaraq Azərbaycan - Türkiyə münasibətləri çətin günlərin dostluğu kimi səciyyələndirlir. Xoş anlarda hər iki xalq həmişə birlikdə sevinib. Eyni zamanda, Türkiyə və Azərbaycan çətin anlarda da bir-birinə arxa, dayaq dururlar. Buna aid həm tarixdən, həm də müasir dövrdən çoxlu sayda misallar sadalamaq mümkündür. Biz Türkiyənin qətiyyətli dəstəyini 44 günlük Vətən müharibəsi zamanı bir daha gördük. Müharibənin ilk günlərindən başda qardaş ölkənin Prezidenti Rəcəb Tayyib Ərdoğan olmaqla əksər yüksəksəviyyəli rəsmiləri Türkiyənin Azərbaycanın yanında olduğunu bildirən bəyanatlarla çıxış etdilər.

Öz növbəsində Azərbaycan da ən çətin vaxtlarında Türkiyəni tək buraxmır. 2023-cü ilin fevralında qardaş ölkə dəhşətli zəlzələ ilə silkələndi. Azərbaycan bu çətin günlərdə Türkiyəyə ilk yardım əli uzadan və faciə bölgəsini son tərk edən ölkə oldu. Kahramanmaraşda Prezident İlham Əliyevin xüsusi tapşırığı əsasında “Azərbaycan” məhəlləsinin yaradılması ölkəmizin Türkiyəyə qardaşlıq dəstəyinin daha bir nümunəsidir. Həmin məhəllənin açılışı cari il iyunun 19-da prezidentlər İlham Əliyevin və Rəcəb Tayyib Ərdoğanın iştirakı ilə baş tutub.

Hazırda Azərbaycanla Türkiyə arasında genişlənən ticarət dövriyyəsi, investisiya qoyuluşu da bu möhkəm təmələ əsaslanır. Azərbaycan və Türkiyənin tərəfdaş dövlətlərlə birgə reallaşdırdıqları enerji layihələri həm regional, həm də qlobal əhəmiyyət daşıyır. Nəqliyyat sektoru da əməkdaşlığın çox mühüm istiqamətlərindən biridir.

Hər cəhətdən mühüm əhəmiyyət daşıyan strateji müttəfiqlik

Telefon danışığı zamanı dövlət başçıları Azərbaycan-Türkiyə strateji müttəfiqliyinin perspektivləri ilə bağlı fikir mübadiləsi aparıblar. Strateji müttəfiqlik ölkələrimiz üçün hər cəhətdən, xüsusilə də indiki narahat dünyada təhlükəsizliyin təmin olunması baxımından müstəsna önəm daşıyır. Ölkələrimizin müttəfiqlik münasibətləri 2021-ci il 15 iyun tarixində liderlər tərəfindən imzalanan Şuşa Bəyannaməsi ilə rəsmən təsdiqlənib.

Qars müqaviləsindən yüz il sonra iki qardaş ölkə arasında imzalanan müttəfiqlik münasibətlərinə dair Şuşa Bəyannaməsi müstəsna siyasi və tarixi əhəmiyyətə malikdir. Sənəddə iki ölkənin bundan sonrakı müttəfiqliyinin və işbirliyinin mühüm istiqamətləri öz əksini tapıb. Şuşa Bəyannaməsində beynəlxalq müstəvidə birgə əməkdaşlıq, fəaliyyətin uzlaşdırılması, siyasi, hərbi, iqtisadi-ticarət əlaqələri, həmçinin mədəniyyət, təhsil, idman, gənclər siyasəti kimi sahələr əhatə olunub.

Mübariz ABDULLAYEV

Paylaş:

Baxılıb: 420 dəfə