Prezident İlham Əliyevin Türkiyəyə işgüzar səfəri mətbuatın diqqət mərkəzində olub

Bakı:

24 °C

57 %

6 m/s

Əlaqə

AZ RU EN

Ana səhifə / Gündəm / Prezident İlham Əliyevin Türkiyəyə işgüzar səfəri mətbuatın diqqət mərkəzində olub

Prezident İlham Əliyevin Türkiyəyə işgüzar səfəri mətbuatın diqqət mərkəzində olub

10.06.2010 [02:08]

Azərbaycan Prezidenti İlham Əliyevin Türkiyəyə işgüzar səfəri Türkiyə və dünya mətbuatının diqqət mərkəzində olub.
“Zaman” qəzetinin “İsraili qınayan İlham Əliyev Türkiyəyə tam dəstək verdi” başlıqlı yazısında Azərbaycan dövləti başçısının Aralıq dənizindəki son hadisələrə ədalətli mövqeyi vurğulanıb, Türkiyə-Azərbaycan əlaqələrinin güclənməsindən məmnunluq ifadə olunub.
Nüfuzlu “CNN-Türk” televiziya kanalının internet saytında yerləşdirilmiş “Türkiyə və Azərbaycan arasında önəmli addım” başlıqlı analitik yazıda Azərbaycan Prezidentinin işgüzar səfəri çərçivəsində imzalanmış enerji sazişlərinin əhəmiyyətindən ətraflı bəhs olunub. Qeyd edilib ki, bu sənədlər NABUCCO layihəsinin həyata keçirilməsinə də əlverişli zəmin hazırlayır. Qardaş ölkə olan Azərbaycan iqtisadi gücünü artırmaqla yanaşı, Avropanın enerji təhlükəsizliyində də mühüm rol oynayacaq.
“Amerikanın səsi” (VOA) radiosunun “Türkiyə və Azərbaycan qaz məsələsində anlaşdı” reportajında Türkiyənin enerji və təbii ehtiyatlar naziri Taner Yıldızın Azərbaycan ilə imzalanmış sənədlərin əhəmiyyəti haqqında fikirləri yer almaqla yanaşı, Prezident İlham Əliyevin liderliyi ilə ölkəmizin düşünülmüş enerji siyasəti önə çəkilib.
“Hürriyyət” və “Milliyyət” qəzetlərinin xəbərlərində də Türkiyənin Baş naziri Rəcəb Tayyib Ərdoğanın “Hörmətli qardaşım İlham Əliyev Türkiyənin mövqeyinə tam dəstəyini bildirib” cümləsi xüsusi olaraq verilib. Qəzetlər Azərbaycan dövləti başçısının qətiyyətli mövqeyinin rəsmi Ankara üçün vacib olduğunu da vurğulayıblar.
Türkiyənin “Anadolu” xəbər agentliyi və “Cihan” agentliyi İlham Əliyevin Asiyada Qarşılıqlı Fəaliyyət və Etimad Tədbirləri üzrə Müşavirənin üçüncü zirvə toplantısındakı çıxışına geniş yer veriblər. Dövlətimizin başçısının təhlükəsizlik tədbirlərinə kompleks şəkildə yanaşmanın və terrorizmlə mübarizənin gücləndirilməsinin zəruriliyi, Azərbaycanın həyata keçirdiyi layihələrin bölgədə əməkdaşlığa zəmin yaratdığı barədə fikirləri xüsusi olaraq vurğulanıb.
Azərbaycan Prezidentinin Asiyada Qarşılıqlı Fəaliyyət və Etimad Tədbirləri üzrə Müşavirənin üçüncü toplantısında iştirakı və çıxışı, səfər çərçivəsində Türkiyə ilə Azərbaycan arasında imzalanmış sənədlər “Reuters” və “Assoşieyted Press” agentlikləri, dünyanın və Türkiyənin digər aparıcı kütləvi informasiya vasitələri tərəfindən də geniş işıqlandırılıb.

Paylaş:

Baxılıb: 1212 dəfə