Bir il öncə bu gün

Bakı:

22 °C

78 %

3 m/s

Əlaqə

AZ RU EN

Ana səhifə / Gündəm / Bir il öncə bu gün

Bir il öncə bu gün

10.11.2021 [11:40]

10 noyabr 2020-ci il tarixində imzalanmış üçtərəfli Bəyanat Azərbaycanın qələbəsini, Ermənistanın isə kapitulyasiyasını təsdiqlədi

44 günlük İkinci Qarabağ müharibəsi dünya miqyasında mühüm araşdırma predmetinə çevrilib. Vətən müharibəsinin müxtəlif aspektləri dünyanın nüfuzlu hərbi-strateji, elmi-politoloji tədqiqat mərkəzləri və ekspertlər tərəfindən öyrənilir, bu barədə beynəlxalq mediada çoxsaylı analitik materiallara rast gəlinir. Azərbaycanın qələbəsini təsdiqləyən, Ermənistan üçün isə kapitulyasiya aktı sayılan 10 noyabr 2020-ci il tarixli üçtərəfli Bəyanatın imzalanmasının ildönümü ərəfəsində bu məsələlər yenidən dünya mediasında, siyasi analitiklər tərəfindən geniş təhlil olunmaqdadır.

44 günlük Zəfər yürüşü zamanı Azərbaycan Ordusunun ardıcıl nailiyyətlər qazanması, xüsusilə də noyabrın 8-də Şuşanı hərbi-siyasi əsarətdən xilas etməsi nəticəsində Ermənistanın hərbi-siyasi rəhbərliyi təslimçilik mövqeyindən çıxış etmiş və 10 noyabr 2020-ci il tarixli üçtərəfli Bəyanata imza atmışdı. Bu, Ermənistan üçün kapitulyasiya, Azərbaycanın qələbəsinin isə siyasi-hüquqi təsdiqi idi. Azərbaycan, Rusiya prezidentlərinin və Ermənistanın baş nazirinin imzaladıqları bəyanata əsasən üzərinə bir sıra öhdəliklər götürən işğalçı Ermənistan sonradan Ağdam, Kəlbəcər və Laçın rayonlarını döyüşsüz təhvil verməyə məcbur oldu. Prezident İlham Əliyev bu məsələlərdən bəhs edərkən “44 günlük müharibə ərzində Azərbaycan işğal olunmuş ərazilərinin böyük bir hissəsini, o cümlədən Cəbrayıl, Hadrut, Füzuli, Zəngilan, Qubadlı və Şuşa şəhərlərini azad etdi. Ümumilikdə, döyüş meydanında 300-dən çox şəhər və kənd azad edilmişdir. Ermənistan 2020-ci il noyabrın 10-da kapitulyasiya aktına imza atmağa məcbur oldu. Beləliklə, Ermənistan öz qoşunlarını Azərbaycanın digər ərazilərindən - Ağdam, Laçın və Kəlbəcərdən çıxarmağa məcbur edildi. Azərbaycan BMT Təhlükəsizlik Şurasının yuxarıda qeyd olunan qətnamələrinin icrasını özü təmin etdi və bu, yəqin ki, BMT-nin təsis edildiyi vaxtdan bu günə qədər dünyada ilk belə haldır”, - deyə vurğulayıb.

Ermənistanın son şansı...

Əlbəttə, 44 günlük müharibənin Azərbaycanın mütləq qələbəsi ilə nəticələnməsi, torpaqlarımızın işğaldan azad edilməsi təkcə ölkəmizin ərazi bütövlüyünün və tarixi ədalətin bərpası deyil. Bu həm Azərbaycan, həm də region üçün yeni siyasi-iqtisadi reallıqlar formalaşdıran, mühüm strateji perspektivlər təmin edən əhəmiyyətli geosiyasi amildir. Şübhəsiz ki, regionda autsayderə çevrilmiş Ermənistan da rasional hərəkət edərək - ərazi iddialarından əl çəkərək, təxribatçı hərəkətlərdən imtina edərək bu imkanlardan yararlansa, siyasi və iqtisadi dividendlər əldə edə bilər. Ümumiyyətlə, üçtərəfli Bəyanatdan irəli gələn vəzifələrin tam və qeyd-şərtsiz yerinə yetirilməsi Ermənistan dövlətinin siyasi-hüquqi öhdəliyidir. Doğrudur, işğalçı–təcavüzkar siyasəti iflasa uğradılmış və hərbi müstəvidə darmadağın edilmiş Ermənistan bəhs olunan bəyanatın bəzi maddələri üzrə konstruktiv yanaşma ortaya qoymur, müxtəlif vasitələrdən istifadə edərək pozuculuq fəaliyyəti ilə məşğul olur. Amma onlar anlamalıdırlar ki, yenə də revanşist yanaşma ilə köhnə - ənənəvi siyasi stereotiplərini davam etdirəcəklərsə, daha böyük faciə və fəlakətlərlə üzləşəcəklər. Bir sözlə, həm regional təcrid vəziyyətində olan, həm də müharibədə sarsıdıcı məğlubiyyətlə üzləşmiş Ermənistanın üçtərəfli Bəyanatın tələblərini tam icra etməkdən başqa çıxış yolu-əlavə şansı və alternativ imkanları yoxdur.

Ermənidən artıq Ermənistan təəssübkeşləri

Üçtərəfli Bəyanatın imzalanmasının ildönümü ərəfəsində işğalçı ölkədə yenidən bütün siyasi qüvvələr, hətta revanşistlər Ermənistanın ağır məğlubiyyətə uğradığı, kapitulyasiya aktına imza atdığı barədə fikirlər səsləndirirlər. Elə Nikol Paşinyan da bu mövqedən çıxış edir. Lakin hakimiyyətdən qovularaq tarixin arxivinə yollanmış - "siyasi reanimasiya"da hakimiyyət ömrünü başa vurmuş Robert Koçaryan kimi quldur - cinayətkar və korrupsioner fiqurlar hələ də üçtərəfli Bəyanatın yerinə yetirilməsinin əleyhinə təbliğat aparırlar. Amma belə cəhdlərin heç bir təsiri, faydası və perspektivi yoxdur.

Təəssüfləndirici və paradoksal hal budur ki, xaricdən idarə olunan internet televiziyalarının “dəyişməz siyasi sima”larına çevrilən Əli Kərimli, Əli Əliyev, Sevinc Osmanqızı, Qənimət Zahid, Gültəkin Hacıbəyli və digər bu kimilər də Koçaryandan fərqli düşünmürlər. Onlar hətta daha da irəli gedərək Ermənistanı müdafiə etmək məqsədilə üçtərəfli Bəyanatın bu ölkə üçün guya kapitulyasiya olmadığını “əsaslandırmağa” çalışırlar. Hətta siyasi psixologiyası pozuq, bitmiş-tükənmiş yararsız fiqur təsiri bağışlayan belələri sırasında sənədin Azərbaycan üçün heç bir əhəmiyyətə malik olmadığını deyənlər də var. Ermənidən artıq revanşist olmağa cəhd göstərən, Ermənistan təəssübkeşi kimi çıxış edən bu virtual “siyasi ulduz”lar belə “fikir”lərinin həm ciddi qəbul edilmədiyinin, həm də ikrah hissi doğurduğunun fərqində deyillər. Vaxtilə özlərini “siyasi ekstrasens” zənn edərək “Azərbaycan münaqişənin həllinə nail olmayacaq” deyə bədbin, məkrli və qərəzli “öncəgörmə”lərlə çıxış edən, dövlətimizə qarşı qara piar kampaniyası aparanlar indi reallıqları qəbul edə bilmədiklərinə görə “siyasi həzmsizlik” sindromundan əziyyət çəkirlər. Nəticə isə dəyişmir!

Nurlan QƏLƏNDƏRLİ

Paylaş:

Baxılıb: 1018 dəfə