Azərbaycan-Türkiyə-Pakistan birliyi - milli və regional təhlükəsizlik amili

Bakı:

24 °C

52 %

6 m/s

Əlaqə

AZ RU EN

Ana səhifə / Gündəm / Azərbaycan-Türkiyə-Pakistan birliyi - milli və regional təhlükəsizlik amili

Azərbaycan-Türkiyə-Pakistan birliyi - milli və regional təhlükəsizlik amili

21.01.2022 [23:33]

Dost-qardaş ölkələrin siyasi və hərbi-strateji əməkdaşlığı xalqlarımızın inam və güvən yeridir

Nurlan

Ötən il ərzində, eləcə də 2022-ci ilin ilk günlərində Avrasiyada cərəyan edən proseslər, hərbi-siyasi gərginlik faktları, o cümlədən Qazaxıstan hadisələri milli və regional təhlükəsizlik, həmçinin dövlətlərarası siyasi və strateji əməkdaşlıq məsələlərini dünyanın diqqət mərkəzində olmasını şərtləndirib. Analitiklər qeyd edirlər ki, güc mərkəzlərinin kəskin rəqabəti, həmçinin güclənən geosiyasi mübarizə dövlətlər qarşısında daha səmərəli və etibarlı işbirliyi formalaşdırmaq zərurəti yaradır. Ekspertlər bu səpkidə müxtəlif nümunələrə diqqət yetirirlər. Cənubi Qafqaz regionunun lider dövləti olan Azərbaycanın milli və regional təhlükəsizlik, əməkdaşlıq məsələləri ilə əlaqədar strateji kursu isə müsbət təcrübə kimi dəyərləndirilir. Bu baxımdan, bir çox amilə nəzər salınır. Diqqət yetirilən əsas məqamlardan biri isə Azərbaycan-Türkiyə-Pakistan geosiyasi üçbucağında əməkdaşlığın siyasi və hərbi-strateji aspektləridir.

Fəal siyasi dialoq və strateji işbirliyi

Ötən ilin mənzərəsi bu baxımdan kifayət qədər məhsuldardır - dinamika və xronika zəngindir. Qarşılıqlı səfərlər və təmaslar isə həm çoxtərəfli əlaqələrin inkişafına, həm də səmərəli fikir və təcrübə mübadiləsinin aparılmasına xidmət edir.

Bu nöqteyi-nəzərdən xüsusi müzakirə predmetinə çevrilən məsələlərdən biri 2021-ci il iyul ayının 27-də Milli Məclisdə Azərbaycan, Türkiyə və Pakistan parlament sədrlərinin üçtərəfli görüşündə Bakı Bəyannaməsinin imzalanmasıdır. Şübhəsiz ki, bu, tarixi-mənəvi və siyasi-strateji baxımdan olduqca mühüm əhəmiyyətə malikdir, eləcə də dost, qardaş və strateji tərəfdaş olan üç ölkə arasında çoxşaxəli münasibətlərin yeni mərhələdə daha da möhkəmləndirilməsinə xidmət edən, tərəflər üçün yeni perspektivlər yaradan amildir. Tərəflər arasında parlamentlərarası üçtərəfli əməkdaşlıq formatının təsis edilməsi təkcə qanunverici hakimiyyətlər arasında münasibətlərin inkişafı baxımından müstəsna önəm daşımır, eyni zamanda, siyasi məzmuna malik olmaqla strateji işbirliyinin güclənməsinə töhfədir.

Üç qardaş - ümumi təhdidlərə qarşı birgə mübarizə

Yeri gəlmişkən, ölkələrimiz arasında hərbi əməkdaşlığın inkişafı, bu baxımdan əlaqələrin əsas istiqamətlərinin müzakirə edilməsi də tərəflərin siyasi gündəminin mühüm hissəsidir. Hərbi, hərbi-texniki, hərbi təhsil, hərbi istehsalat sahələrində Azərbaycan Pakistan və Türkiyənin üçtərəfli əməkdaşlıqlarının inkişaf perspektivləri və qarşılıqlı maraq doğuran digər məsələlər müzakirə olunur, strateji fəaliyyət həyata keçirilir, müvafiq addımlar atılır.

Paralel olaraq Bakıda Azərbaycan, Türkiyə və Pakistanın xüsusi təyinatlı qüvvələrinin nümayəndələrinin iştirakı ilə “Üç qardaş - 2021” beynəlxalq təlimin keçirilməsi də ümumi təhdidlərə qarşı birgə mübarizənin təşkilinə hazırlıq baxımından vacibdir. Bu beynəlxalq təlim, eyni zamanda, ordular arasında mövcud olan əlaqələrin daha da gücləndirilməsi, terrorla, digər təhdidlərlə mübarizə üçün yeni üsulların kəşf edilməsi və qarşılıqlı təcrübə mübadiləsinin aparılması baxımından əhəmiyyətlidir.

Geosiyasi üçbucaq, yaxud Avrasiyada yeni güc mərkəzi

Digər mühüm məsələ odur ki, regional və beynəlxalq əhəmiyyətə malik olan geostrateji reallıqların yarandığı yeni dönəmdə - postkonflikt mərhələsində hər üç ölkə müxtəlif sahələrdə əməkdaşlığın dərinləşdirilməsində, bir-birinin milli maraqlarının beynəlxalq müstəvidə qorunmasında güclü siyasi iradə nümayiş etdirir. Türkiyə, Pakistan və Azərbaycanın strateji müttəfiqliyi Avrasiyada yeni aparıcı güc mərkəzinin formalaşmasını şərtləndirir. Bu yeni güc mərkəzinin fəaliyyəti, heç şübhəsiz, rifah və inkişaf vəd edir, regional və beynəlxalq əməkdaşlığın dərinləşdirilməsinə, təhlükəsizliyin təmin olunmasına xidmət göstərir.

Bütövlükdə isə, Azərbaycan-Türkiyə-Pakistan birliyi milli və regional təhlükəsizlik amili kimi böyük önəm daşıyır. Eyni zamanda, dost-qardaş ölkələrin siyasi və hərbi-strateji əməkdaşlığı xalqlarımızın inam və güvən yeridir.

Paylaş:

Baxılıb: 904 dəfə