Bakı inam - etimad ünvanı, dialoq və əməkdaşlıq məkanıdır

Bakı:

24 °C

58 %

7 m/s

Əlaqə

AZ RU EN

Ana səhifə / Gündəm / Bakı inam - etimad ünvanı, dialoq və əməkdaşlıq məkanıdır

Bakı inam - etimad ünvanı, dialoq və əməkdaşlıq məkanıdır

16.02.2022 [09:59]

NATO-nun Baş katibinin Azərbaycan Prezidenti ilə regional təhlükəsizlik və əməkdaşlıq məsələlərinə dair fikir mübadiləsi aparması bu reallığın daha bir təsdiqidir

Nurlan QƏLƏNDƏRLİ

Prezident İlham Əliyevin milli maraqlara və müasir çağırışlara uyğun xarici siyasət kursu, dərin strateji diplomatiya siyasəti Azərbaycanın beynəlxalq münasibətlərin nüfuz və güc iyerarxiyasında yüksəlişini təmin edir. Həm ötən, həm də cari ilin siyasi-diplomatik mənzərəsini əks etdirən reallıqlar və hazırkı geosiyasi situasiya da onu göstərir ki, dünyanın nəzəri Azərbaycanda və regiondadır. Çünki Azərbaycanın yaratdığı geostrateji reallıqlar beynəlxalq ictimaiyyətin xüsusi diqqət mərkəzindədir. Bu isə Prezident İlham Əliyevin regionun yeni geosiyasi mənzərəsini müəyyən etdiyini göstərir. Fevralın 15-də NATO-nun Baş katibi Yens Stoltenberqin Prezident İlham Əliyevə zəngi, söhbət zamanı toxunulan məqamlar da bu reallığı ifadə edir. Telefon danışığı əsnasında Azərbaycan-NATO əlaqələrinin inkişafından məmnunluq ifadə olunub, Cənubi Qafqaz regionunda postmünaqişə vəziyyəti, Ukrayna ətrafında cərəyan edən proseslərə və dünya enerji bazarındakı mövcud duruma dair fikir mübadiləsi aparılıb.

Azərbaycan İkinci Qarabağ müharibəsində qələbə qazanmaqla həm də bütöv bir regionu - Cənubi Qafqazı sülh, sabitlik və əməkdaşlıq məkanına çevirmək istiqamətində həlledici addım atdı. Dövlət başçısının qeyd etdiyi kimi, Vətən müharibəsindən sonra yeni reallıqlar yaranıb. Azərbaycan sülh müqaviləsinin imzalanması, kommunikasiyaların bərpası, Türkiyə ilə ortaq təşəbbüs əsasında “3+3” formatında yeni əməkdaşlıq platformasının yaradılması kimi istiqamətlərdə strateji fəallıq nümayiş etdirməklə regionda yeni düzən - nizam formalaşdırır. Üstəlik, bu geosiyasi fəaliyyət Cənubi Qafqazla məhdudlaşmır, bir çox dövlətlərin, o cümlədən güc mərkəzlərinin strateji maraqlarının olduğu regionları əhatə edir.

Son zamanlar Avrasiyanın ən önəmli strateji məntəqələrindən olan Xəzər-Qara dəniz geosiyasi hövzəsində qaynar proseslər və intensiv diplomatik trafikin fonunda Azərbaycanın barışdırıcı missiyası və fəal rolu diqqəti cəlb edir. Xüsusilə də, ABŞ ilə Rusiya arasında Ukrayna gərginliyinin artması, hərbi qarşıdurma ehtimalının güclənməsi şəraitində Cənubi Qafqazın lider dövləti olan Azərbaycan konstruktiv strateji diplomatiyası ilə fərqlənir, çox mühüm təşəbbüslər və ideyalarla çıxış edir. Bu səpkidə bir neçə məqam xüsusilə diqqəti cəlb edir. Birincisi, Azərbaycan Prezidenti İlham Əliyevin yanvarın 14-də Ukraynaya işgüzar səfəri tarixinə, geosiyasi əhəmiyyətinə görə bu baxımdan xüsusi önəm daşıdı. Ekspertlərin də vurğuladıqları kimi, səfər Xəzər-Qara dəniz strateji xəttində və Avrasiya geosiyasətində diplomatik trafikin ən vacib və mühüm halqalarından biri oldu. Daha sonra İlham Əliyev ilə Vladimir Putin arasında telefon danışığı zamanı Ukrayna probleminin müzakirə olunması göstərir ki, Azərbaycan Prezidenti regional təhlükəsizlik məsələlərində geosiyasi dialoqun təmin olunmasında müstəsna rol oynayır. Paralel olaraq Bakı ilə Ankaranın birgə təşəbbüsləri - geostrateji fəallığı bölgədə gərginliyin öz yerini anlaşma və uzlaşmaya verməsinə əlverişli şərait - dayanıqlı zəmin yaratdı. Ukrayna böhranı fonunda Azərbaycan Prezidentinin dərin strateji diplomatiya siyasətinin Xəzər-Qara dəniz bölgəsində təhlükəsizliyin təmin olunmasını - sülhyaratma prosesini də əhatə etməsi ölkəmizin geosiyasi missiyasının regional miqyaslı, qlobal xarakterli olduğunu təsdiqlədi.

Prezident İlham Əliyevin siyasəti Azərbaycanın etibarlı - güvənli tərəfdaş, inam və etimad ünvanı olduğunu təsdiqləyir. Dövlət başçısı hər zaman deyir ki, Azərbaycan toqquşma deyil, əməkdaşlıq məkanıdır. Azərbaycan Prezidentinin praqmatik strateji kursu müxtəlif geosiyasi qütblər - Rusiya, Amerika Birləşmiş Ştatları və digər güc mərkəzləri eləcə də Aİ, NATO, İƏT və başqa strateji birliklər tərəfindən müsbət dəyərləndirilir. Azərbaycanın paytaxtı Bakıda Rusiya və NATO-nun ali hərbi rəhbərlərinin görüşlər keçirməsi isə ölkəmizin strateji dialoq platforması kimi çıxış etdiyini göstərən faktlardandır. Elə son olaraq NATO-nun Baş katibinin Prezident İlham Əliyev ilə regional təhlükəsizlik və əməkdaşlıq məsələlərinə dair fikir mübadiləsi aparması Azərbaycanın aparıcı yerini və rolunu göstərir.

Paylaş:

Baxılıb: 942 dəfə