Prezident İlham Əliyev Nəsimi Rayon İcra Hakimiyyətinin yeni inzibati binasının açılışında iştirak edib

Bakı:

22 °C

78 %

3 m/s

AZ RU EN

Ana səhifə / Gündəm / Prezident İlham Əliyev Nəsimi Rayon İcra Hakimiyyətinin yeni inzibati binasının açılışında iştirak edib

Prezident İlham Əliyev Nəsimi Rayon İcra Hakimiyyətinin yeni inzibati binasının açılışında iştirak edib

11.05.2012 [00:55]

Mayın 9-da Azərbaycan Respublikasının Prezidenti İlham Əliyev Bakının Nəsimi Rayon İcra Hakimiyyətinin yeni inzibati binasının açılışında iştirak edib.
Rayon İcra Hakimiyyətinin başçısı Nəsib Məhəməliyev Prezident İlham Əliyevə məlumat verib ki, yeddi mərtəbədən ibarət yeni bina ən müasir tələblər səviyyəsində inşa edilib. ümumi sahəsi 5 min kvadratmetr olan bina bütün lazımi avadanlıq və sistemlərlə təchiz edilib. Müasir memarlıq üslubunda yüksək zövqlə inşa olunmuş binanın interyeri Azərbaycanın zəngin təbiətini əks etdirən fotolarla bəzədilib. Binadakı otaqların hamısı müasir tələblər səviyyəsində qurulub. Burada, həmçinin üç müşavirə zalı, arxiv, rabitə otaqları, yeməkxana, 25 avtomobillik yeraltı qaraj da yaradılıb.
Prezident İlham Əliyev Nəsimi Rayon İcra Hakimiyyətinin yeni inzibati binasının rəmzi açılışını bildirən lenti kəsib. Binanın foyesində ümummilli lider Heydər Əliyevin büstü qoyulub, Azərbaycanın dövlət rəmzlərinin əks olunduğu stendlər yaradılıb. Foyedə, həmçinin Ulu öndər Heydər Əliyevin və Prezident İlham Əliyevin ictimai-siyasi fəaliyyətini əks etdirən fotoguşə var. Fotoguşədə ümummilli lider Heydər Əliyevin və dövlətimizin başçısı İlham Əliyevin Nəsimi rayonunda müxtəlif illərdə keçirilən tədbirlərdə iştiraklarını əks etdirən fotolar böyük maraq doğurur.
Dövlətimizin başçısı binada quraşdırılan elektron idarəetmə və məlumat bazası ilə tanış olub. Bildirilib ki, Prezident İlham Əliyevin “elektron hökumət”in yaradılması barədə tapşırıqlarına uyğun olaraq, İcra Hakimiyyətinin elektron idarəetmə və məlumat bazasında vətəndaşların ərizə və şikayətlərinin qəbulu da reallaşacaq.
Rayonun hər bir sakini İcra Hakimiyyətinin binasına gələrək bu sistem vasitəsilə elektron ərizə yaza və müvafiq şöbəyə göndərə bilər. Bununla yanaşı, vətəndaşlar bu sistemdən internetlə rayon İcra Hakimiyyətinin rəsmi saytına və ya bu bazaya daxil olaraq evlərindən birbaşa müraciət edə bilərlər. Prezident İlham Əliyev vətəndaşların qəbulu otağı ilə tanış olub.
Diqqətə çatdırılıb ki, vətəndaşların qəbulunu operativ və səmərəli həyata keçirmək üçün burada geniş imkanlar var. Qəbul otağında ümummilli lider Heydər Əliyevin zəngin siyasi irsi barədə maraqlı kitablar toplanıb. 300 yerlik akt zalı ən müasir standartlar səviyyəsində qurulub. Müşavirə zalı ilə tanış olan dövlətimizin başçısına məlumat verilib ki, burada bütün lazımi inventar və avadanlıq quraşdırılıb. 65 yerlik müşavirə zalındakı şərait ən müasir tələblərə cavab verir. Yeni inzibati binada işçilərin normal fəaliyyəti üçün geniş və hərtərəfli imkan yaradılıb. Binada ekspo-mərkəz də var. Mərkəzdə paytaxtımızın keçmiş və müasir vəziyyətini əks etdirən maraqlı fotolar yerləşdirilib. Gələcəkdə burada rayon məktəblilərinin müxtəlif sərgilərinin keçirilməsi nəzərdə tutulur.
Prezident İlham Əliyev yeni inzibati binanın operativ idarəetmə mərkəzi ilə tanış olub. Mərkəzdə rayonun maketinə baxan dövlətimizin başçısına məlumat verilib ki, maket xüsusi proqramla təchiz edilib. Rayon ərazisində yerləşən bütün tikililər barədə proqram vasitəsilə məlumat almaq mümkündür. Xüsusi proqram rayondakı bütün mənzil istismar sahələrinin ərazilərinin bölgüsünü aydın göstərir. Təbii fəlakətlərin, istehsalat qəzalarının, dağıntıların yaranması təhlükəsi baş verəcəyi təqdirdə mərkəzdə idarəetmənin, xəbərdarlığın və rabitənin təşkili sxemi də yaradılıb. Rayon ərazisində hər hansı bir hadisə baş verdikdə mərkəzdə yaradılan şərait birbaşa xüsusi proqram vasitəsilə aidiyyəti orqanlarla qısa zamanda videoəlaqənin yaradılmasına imkan verir.
Dövlətimizin başçısına rayon ərazisində həyata keçirilən abadlıq-quruculuq işləri barədə də məlumat verilib.
Sonra Prezident İlham Əliyev yeni inzibati binanın qarşısında əsaslı təmir edilən parkla tanış olub.
Bildirilib ki, bu ərazidə geniş yenidənqurma işləri həyata keçirilib, ətraf abadlaşdırılıb. ümumi sahəsi 6 min 760 kvadratmetr olan parkın 4 min 560 kvadratmetr ərazisi tamamilə yenidən qurulub. Parkda geniş yaşıllıq zolaqları salınıb, fəvvarələr quraşdırılıb, sakinlərin səmərəli istirahəti üçün hər cür şərait yaradılıb.

Paylaş:

Baxılıb: 1141 dəfə