Dağlıq Qarabağ probleminin həllinə ən böyük maneə Ermənistanın qeyri-konstruktiv mövqeyidir

Bakı:

12°C

87%

0m/s

Əlaqə

AZ RU EN

Ana səhifə / Gündəm / Dağlıq Qarabağ probleminin həllinə ən böyük maneə Ermənistanın qeyri-konstruktiv mövqeyidir

Dağlıq Qarabağ probleminin həllinə ən böyük maneə Ermənistanın qeyri-konstruktiv mövqeyidir

14.06.2012 [22:56]

Prezident İlham Əliyev: Biz hər gün, hər an məsələnin həllinə yaxınlaşırıq. Bizi bu günə yaxınlaşdıran amillər həm siyasi, həm iqtisadi və digər sahələrlə bağlıdır
Cənubi Qafqazın lider dövləti olan Azərbaycanın əldə etdiyi iqtisadi nailiyyətlər digər problemlərin də həllində əhəmiyyətli rol oynayıb. Təsadüfi deyil ki, ölkəmizdə aparılan düzgün iqtisadi siyasət nəticəsində bu gün Azərbaycan demək olar ki, əksər problemlərini həll etməyi bacarıb. Bununla belə, ölkəmizin həlli ən vacib sayılan prioritet problemi Ermənistan-Azərbaycan, Dağlıq Qarabağ münaqişəsidir.
Arxada qoyduğumuz 2011-ci ildə sözügedən problemin həlli istiqamətində əhəmiyyətli uğurlar əldə olunub. Bu uğurların sırasında bir sıra beynəlxalq təşkilatların münaqişənin həlli ilə bağlı bəyanatları xüsusi qeyd olunmalıdır. Dünyanın aparıcı ölkələri, o cümlədən, beynəlxalq təşkilatlar Ermənistanın Azərbaycan torpaqlarını işğal etməsi faktını təsdiqləyib. Bu isə ölkəmizə istər danışıqlar prosesində, istərsə də problemin başqa vasitələrlə həlli istiqamətində üstünlük qazandırıb. Azərbaycan tərəfi hər zaman münaqişənin yalnız ölkəmizin ərazi bütövlüyü çərçivəsində həllinin mümkünlüyünü bildirib. Təəssüf ki, işğalçı Ermənistanın qeyri-konstruktiv mövqeyi problemin 2011-ci ildə həllinə mane oldu.
Azərbaycan Respublikasının Prezidenti İlham Əliyev 28 May-Respublika Günü münasibətilə keçirilən rəsmi qəbuldakı çıxışında da bu məsələyə toxunub. Dövlət başçısı bildirib ki, Ermənistan uzun illərdir ki, beynəlxalq hüququ kobudcasına tapdalayır, beynəlxalq hüquq normalarına riayət etmir: “Dünyanın mötəbər, aparıcı beynəlxalq təşkilatlarının qətnamələrinə əhəmiyyət vermir, məhəl qoymur. Nə hərb, nə sülh vəziyyəti davam edir. Müharibə hələ bitməyib. Müharibənin birinci dövrü başa çatıbdır. Biz hamımız arzu edirik ki, müharibənin ikinci dövrü başlamasın. Ancaq buna nail olmaq üçün Ermənistan beynəlxalq hüquq normalarına əməl etməli və işğal edilmiş torpaqlardan çıxmalıdır”.
Amma Azərbaycan münaqişənin danışıqlar yolu ilə həllinə ümidini itirməyib. öz prinsipial mövqeyindən geri çəkilməyən Azərbaycan hər zaman bildirib ki, münaqişənin yalnız bir həll yolu var: Ermənistan-Azərbaycan, Dağlıq Qarabağ münaqişəsi ölkəmizin ərazi bütövlüyü çərçivəsində həll edilməlidir. Prezident İlham Əliyev bildirib ki, məsələnin sülh yolu ilə həllini tapmasına ən böyük maneə Ermənistanın qeyri-konstruktiv mövqeyidir: “Ermənistanın qeyri-konstruktiv mövqeyi və indiki vəziyyəti uzatmaq cəhdləri hələ imkan vermir ki, məsələ həllini tapsın. Ancaq mən bu barədə dəfələrlə fikrimi bildirmişəm. Biz hər gün, hər an məsələnin həllinə yaxınlaşırıq. Bizi bu günə yaxınlaşdıran amillər həm siyasi, həm iqtisadi və digər sahələrlə bağlıdır. Siyasi sahədə bu gün Azərbaycan bölgənin lider dövlətidir. Bizim kifayət qədər güclü mövqeyimiz vardır”.
Bəli, qeyd olunduğu kimi artıq illərdir ki, Ermənistan özünün qeyri-konstruktiv mövqeyi ilə münaqişənin sülh danışıqları vasitəsilə həllinə maneçilik törədir. Məhz bunun nəticəsidir ki, problemin həlli istiqamətində zaman-zaman alternativ yollar, o cümlədən, müharibə variantı da öz aktuallığını qoruyur. Təbii ki, Azərbaycan tərəfi hər zaman münaqişənin həlli prosesində sülh yoluna üstünlük verdiyini qeyd edir. Bununla yanaşı, ölkəmiz torpaqlarımızın işğaldan azad edilməsi uğrunda digər variantlardan da istifadə etməyə hazırdır. Bu gün Cənubi Qafqaz regionunun ən güclü ordusu məhz Azərbaycan Silahlı Qüvvələridir. ölkəmizdə hər zaman büdcədən müdafiə xərclərinə ayrılan vəsaitin həcminin artırılması istiqamətində davamlı tədbirlər görülüb. Bunun nəticəsidir ki, hazırda Azərbaycanın hərbi xərcləri Ermənistanın bütün dövlət xərclərindən 50 faiz çoxdur. Prezident İlham Əliyev bildirib ki, Azərbaycanın hərbi potensialı işğal altında olan ərazilərimizin azad edilməsinə imkan verir: “Məsələnin həlli üçün, əlbəttə, bütün diplomatik-siyasi imkanlardan istifadə edirik, eyni zamanda, hərbi gücümüzü də artırırıq. Bu istiqamətdə də böyük addımlar atılmışdır. Təkcə onu demək kifayətdir ki, hazırda Azərbaycanın hərbi xərcləri Ermənistanın bütün dövlət xərclərindən 50 faiz çoxdur. Əlbəttə, həm maddi-texniki təchizatımız böyük dərəcədə yaxşılaşır, həm də ordumuzun peşəkarlığı, döyüş qabiliyyəti artır. Bu gün Azərbaycan Ordusu dünya miqyasında güclü orduların sırasındadır. Bundan sonrakı illərdə ordu quruculuğuna göstərilən diqqət daha da çox olacaq və biz daha da güclü orduya malik olacağıq”.
Pərviz SADAYOÄžLU

Paylaş:

Baxılıb: 870 dəfə