“Qarabağ” – “Olimpiakos” oyununda

Bakı:

24 °C

78 %

7 m/s

Əlaqə

AZ RU EN

Ana səhifə / İdman / “Qarabağ” – “Olimpiakos” oyununda

“Qarabağ” – “Olimpiakos” oyununda

14.10.2022 [19:13]

Gücdən doğan rahatlıq

Günel ABBASOVA

Oktyabrın 13-də Ağdamın “Qarabağ” klubu UEFA Avropa Liqasının qrup mərhələsində növbəti oyununu keçirdi. Komanda G qrupunun IV turunda Bakıda Yunanıstanın “Olimpiakos” klubunu qəbul etdi. Son dəqiqələrə qədər hücum və müdafiə əsasında qurulan oyunun nəticəsi heç-heçə olsa da, azarkeşlər üçün komandaları hər zaman qalibdi!

“Qarabağ” reytinqlərdə müvafiq kateqoriyalar üzrə uğur qazanmağa davam edir. Ötən gün Beynəlxalq İdman Araşdırmalar Mərkəzi (CIES) öz ölkələrinin çempionatında topa ən çox sahib olan komandaların reytinqində “Qarabağ” 4-cü pillədə qərarlaşıb. Bununla yanaşı, cari mövsüm Premyer Liqada keçirdiyi 8 oyunun hamısında qələbə qazanan Ağdam təmsilçisi hər oyunda orta hesabla 65.9 faizlik göstərici ilə yalnız Ukraynanın "Şaxtyor" (Donetsk), İngiltərənin "Mançester Siti və Portuqaliyanın "Benfika" klublarından geri qalır. Eləcə də, "Qarabağ" dəqiq ötürmələrin orta sayı (86,7%) baxımından 44-cüdür.

Rəqibin ümidini puç edən “Qarabağ”

“Olimpiakos”la oyundan sonra “Qarabağ”ın Avroliqanın qrup mərhələsi çərçivəsində iki oyunu qalır. Biri Fransa “Nant”s ilə, digəri isə alman “Frayburq”uyla. Növbəti mərhələyə keçid üçün “Qarabağ”a nəzəri cəhətdən 1 xal da bəs edir - bu iki növbəti oyunların birini uduzub, digər oyunda bərabərə qalarsa, o zaman xallarımızın sayı 8-ə yüksəlir. Həmin komandaların birinə qalib gələriksə, işimiz daha da asanlaşır. “Olimpiakos”un ümidi isə tək Konfrans Liqasına qalır. Növbəti oyunlarda yunanlar Konfrans Liqasına düşmək üçün tər tökəcəklər. Bu o deməkdir ki, qrupdakı digər rəqiblərimizin yunanlarla oyunları heç də asan keçməyəcək. Olimpiakos ən azı 3-cü yeri qazanmaq üçün ciddi hazırlaşacaq.

“Nant”a gəlincə isə, onların da işi asan görünmür. Belə ki, bir tərəfdə çox istəkli “Qarabağ”, digər tərəfdə isə Konfrans Liqasına düşmək istəyən yunanlar. Ehtimal odur ki, “Nant” qarşıdakı iki oyundan maksimum bir qalibiyyət, bir bərabərlik əldə edə bilər. O zaman fransız komandasının xallarının sayı 7-yə çatacaq ki, bu da “Qarabağ”ın növbəti mərhələyə keçməsi deməkdir. Yəni ağdamlıların növbəti mərhələyə keçməsi, qrup mərhələsini adlaması ehtimalı ən azı 90 faizdir.

“Olimpiakos”un isə Avroliqa macərası elə qrup mərhələsi ilə də yekunlaşacaq. “Qarabağ”la Bakıdakı heç-heçə rəqibin ümidlərini puç etdi. Afina təmsilçisi bundan sonra maksimum 7 xal yığa bilər ki, qrupu adlamağa bu da bəs etmir. Qarabağla oyunların nəticəsində Yunanıstan təmsilçisi ağdamlılara uduzur.

Gücdən doğan rahatlıq

Tofiq Bəhramov adına arenada “Qarabağ”ın rahatlığı, özgüvəni, çəkinmədən oynamağı hər şeyə dəyərdi. Bu həm də Ağdam klubunun öz gücünə nə qədər güvəndiyinin sübutudur. Rəqibi önəmsəmək və eyni zamanda çəkinməmək çox əla psixoloji vəziyyətdir. “Olimpiakos”un xal almaq üçün zaman uzatmağa yönəlik addımları da “Qarabağ”ın gücündən xəbər verirdi. Qisas almağa gəldiyini deyən komandanın yerdə uzanaraq vaxt uzatması haqlı bir sual ortaya çıxarır. Görəsən, yerdə uzanıb nəyin qisasını almaq olur?!

Azarkeşlərin qalibiyyəti

Hər zaman olduğu kimi, bu oyunda da azarkeşlər xüsusi sevgi ilə “Qarabağ”ı dəstəkləməyə gəlmişdilər. Azarkeşlər arasında şəmkirli şəhid övladları da var idi. Qarşılaşma zamanı uşaqlardan ibarət azarkeşlər “Qarabağ” futbol klubuna olan dəstəklərini böyük pankartlar açaraq, şüarlar səsləndirərək göstərdilər.

Oyunun 44-cü dəqiqəsində...

Oyunun son dəqiqələrinə qədər stadionda azarkeşlərin şüarları, alqışları, səsləri susmadı. Onlar “Qarabağ”ı təkcə qalibiyyət anında yox, həmişə dəstəkləyirlər. Hətta mən deyərdim, “Qarabağ” illər ərzində ölkəmizdə azarkeş mədəniyyətinin formalaşması üçün əvəzsiz faktor olub. Azarkeşlər yağışa rəğmən stadionda 31 min nəfərdən ibarət tək ürəyə çevrilmişdilər. Oyunun 44-cü dəqiqəsində isə tamam fərqli anlar yaşandı. Bu an tribunalardan “Şəhidlər ölməz, Vətən bölünməz” şüarları səsləndi. Bu da oyunun nəticəsindən, zamanından, hava şəraitindən asılı olmayaraq azarkeşlərin sevgisinin bir göstəricisi idi. Biz bilirik ki, “Qarabağ” növbəti oyunlarda ona inanları, bütün Azərbaycanı sevindirəcək. “Qarabağ”ın atdığı hər addım ölkəmiz üçün yeni, əvəzolunmaz nailiyyətlər vəd edir. Bu mənada bizim “Köhlən atlar”a inamımız tamdır.

Paylaş:

Baxılıb: 1019 dəfə