Elxan Bəşirov: Sahibkarlar hər il hesabat verməlidirlər

Bakı:

18°C

68%

5m/s

Əlaqə

AZ RU EN

Ana səhifə / İqtisadiyyat / Elxan Bəşirov: Sahibkarlar hər il hesabat verməlidirlər

Elxan Bəşirov: Sahibkarlar hər il hesabat verməlidirlər

30.05.2018 [09:42]

Azərbaycan Tikinti Materialları İstehsalçıları Assosiasiyasının sədri, “Mətanət A” şirkətinin rəhbəri Elxan Bəşirov Sahibkarlar Gününə həsr olunmuş konfransda maraqlı təkliflərlə çıxış edib. Onun sözlərinə görə, ölkəmizdə 25 aprel tarixinin Sahibkarlar Günü kimi qeyd olunması möhtərəm Prezidentimiz cənab İlham Əliyevin iş adamlarına böyük diqqətinin göstəricisidir. Sahibkarlar bu məsuliyyəti dərk etməlidirlər: “Mən istər İqtisadiyyat Nazirliyi, istərsə də assosiasiyaların saytlarında hesabat bölümünün yaradılmasını təklif edirəm. Sahibkarlar hər il 25 aprel tarixində öz fəaliyyətləri ilə bağlı hesabatları ora yerləşdirsinlər. Nəticədə hər şirkətin bir il ərzində Azərbaycan Respublikasının iqtisadiyyatına necə töhfə verdiyi məlum olacaq”.
Elxan Bəşirov çıxışında Azərbaycanda sahibkarlığın genişləndirilməsi istiqamətində böyük işlərin görüldüyünə diqqəti yönəldərək qeyri-neft sektorunun sürətlə inkişaf etdiyini bildirib: “Cənab Prezident Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında bir daha söylədi ki, 2018-ci ildə islahatlar davam etdiriləcək və bu il də qeyri-neft sektorunun inkişafı istiqamətində bütün məsələlər prioritetliyini qoruyub saxlayacaq”.
Elxan Bəşirov həmçinin qeyd edib ki, Prezident İlham Əliyev “İnvestisiyaların təşviqi ilə bağlı əlavə tədbirlər haqqında” Fərmanı ilə “investisiya təşviqi sənədi”nin verilməsi qaydalarını təsdiqlədikdən sonra müxtəlif sənaye sahələrinə milyardlarla manat dəyərində investisiya yatırılıb: “O cümlədən bizim “Mətanət A” şirkəti də cənab Prezidentin qarşısında 4 böyük zavodun tikintisini öz öhdəsinə götürüb və onların fəaliyyətini bir təşviq sənədi əsasında reallaşdırır, bununla da milyonlarla vəsaitə qənaət edir. Bu qənaət bizim zavodların rentabelli işləməsinə, eyni zamanda, götürdüyümüz kreditin geri qaytarılmasına öz töhfəsini verir”.
Elxan Bəşirov şirkətin son nailiyyətlərindən də söz açıb. Xüsusilə, tikintisi ötən il başa çatdırılan Qazax əhəng zavodunun fəaliyyətinə toxunaraq bu zavodun istehsal etdiyi əhəngin regiondakı rəqiblərini xeyli geridə qoyduğunu vurğulayıb. Onun sözlərinə görə, şirkətin yaxın perspektiv üçün də böyük ümidlər vəd edən planları var. “Biz 2019-cu ilin axırına mineral yun zavodunu istifadəyə verəcəyik. Artıq bununla bağlı Almaniyanın ən məşhur şirkətlərindən biri ilə müqavilə bağlamışıq. İlkin ödənişlər edilib, bütün texnologiyalar, avadanlıqlar sifariş verilib, vaxtında Azərbaycana gətiriləcək. Biz Hacıqabulda da maşınqayırma istiqamətli böyük bir layihə həyata keçirəcəyik. Bu layihə tikinti avadanlıqlarının istehsalını gerçəkləşdirəcək”, - deyə Elxan Bəşirov əlavə edib.

Paylaş:

Baxılıb: 670 dəfə