Cənubi və Şərqi Avropa, Qafqaz və Mərkəzi Asiya regionunda lider ölkə

Bakı:

10°C

93%

2m/s

Əlaqə

AZ RU EN

Ana səhifə / İqtisadiyyat / Cənubi və Şərqi Avropa, Qafqaz və Mərkəzi Asiya regionunda lider ölkə

Cənubi və Şərqi Avropa, Qafqaz və Mərkəzi Asiya regionunda lider ölkə

18.02.2022 [23:56]

Mübariz ABDULLAYEV

Azərbaycanın uğurlu inkişafı, müxtəlif sahələrdə qazandığı nailiyyətlər beynəlxalq səviyyədə yüksək dəyərləndirilir. İndiyədək Davos İqtisadi Forumu, Dünya Bankı, BMT-nin ayrı-ayrı qurumları öz hesabatlarında Azərbaycanda iqtisadi islahatların əhatə dairəsinin genişləndirilməsi, biznes mühitinin optimallaşdırılması, infrastruktur təminatının gücləndirilməsi, şəffaflığın artırılması və digər məsələlərlə bağlı yüksək rəylərini bildiriblər. Qeyd edək ki, nüfuzlu reytinq agentliklərinin hesabatları vahid yanaşmalar, beynəlxalq səviyyədə qəbul olunan metodologiya və dəyərləndirmələr əsasında hazırlanır. Burada subyektivlikdən ümumiyyətlə, söhbət belə gedə bilməz. Bir neçə gün bundan əvvəl dünyaya nümunəvi inkişaf modeli təqdim edən respublikamızın ünvanına daha bir xoş xəbər gəlib. Ölkəmiz növbəti dəfə rəqəmsal və davamlı ticarətin asanlaşdırılması sahəsində yüksək qiymətə layiq görülüb. Bu barədə Birləşmiş Millətlər Təşkilatının 2021-ci il üçün Rəqəmsal və Davamlı Ticarətin Asanlaşdırılması üzrə Qlobal Hesabatının yekun versiyasında bildirilib.

Təqdim olunan hesabata əsasən, Azərbaycan qiymətləndirilən meyarlar üzrə 100% üzərindən 86% toplayaraq bu sahədə Cənubi və Şərqi Avropa, Qafqaz və Mərkəzi Asiya regionuna liderlik edir. Respublikamızın BMT kimi nüfuzlu bir qurumun hesabatında yüksək qiymətə layiq görülməsi isə heç də təsadüfi deyildir. İqtisadi İslahatların Təhlili və Kommunikasiya Mərkəzinin (İİTKM) innovativ layihəsi olan “Rəqəmsal Ticarət Qovşağı”nın rəhbəri Məsumə Talıbova bildirib ki, Azərbaycanın nəticələrinin 2015-ci ildən bu günə qədər olan dinamikasına nəzər yetirdikdə artım tempinin dayanıqlı olduğu nəzərə çarpır. BMT-nin tədqiqatı müxtəlif illəri əhatə edir. Tədqiqatın ilk ilində 48.39 nəticə göstərən ölkəmiz 2 il sonra ötən nəticəyə nisbətdə 56% artımla 75.27-ə yüksəldi, daha sonra isə 2017-ci ildə 9%, 2021-ci ildə isə 5% yüksəlişlə dayanıqlı artımı qorumağa nail olub. Sorğunun alt indikatorlarına nəzər yetirdikdə məlum olur ki, şəffaflıq (100%), rəsmi qaydalar (91,67%), institusional tənzimləmə və əməkdaşlıq (88,89%), kağızsız ticarət (85.19%), transsərhəd kağızsız ticarət üzrə (66,67%) yaxşı nəticələr əldə olunub. M.Talıbova xüsusilə vurğulayıb ki, 2019-cu il ilə müqayisədə 2021-ci ildə şəffaflıq indikatoru üzrə 7% irəliləyişlə maksimum nəticəyə, transsərhəd kağızsız ticarət indikatoru üzrə isə 33% artımla çox böyük irəliləyişə nail olunub.

Hesabatda ölkənin cari vəziyyəti ötən illərlə müqayisədə təsvir olunub. Hesabatda sözügedən irəliləyişlərə səbəb olan islahatlara dair ətraflı məlumatlar öz əksini tapıb. Belə ki, ölkə rəhbərliyi tərəfindən bu sahədə aparılan geniş islahatlar nəticəsində “Rəqəmsal Ticarət Qovşağı” portalının yaradılması və “Rəqəmsal Ticarət Qovşağı kimi Azərbaycan Respublikasının mövqeyinin gücləndirilməsi və xarici ticarət əməliyyatlarının genişləndirilməsi ilə bağlı əlavə tədbirlər haqqında” dövlətimizin başçısının Fərmanından irəli gələn tapşırıqların yerinə yetirilməsi, eyni zamanda, Azərbaycanın 20 fevral 2021-ci il tarixindən qüvvəyə minən “Asiya-Sakit Okeanında Sərhədlərarası Kağız Ticarətin Asanlaşdırılması Çərçivə Sazişi”ni imzalayan ilk dövlətlərdən olması və bu sahədə aparılan digər islahatlar qlobal müstəvidə də ölkənin mövqeyinin yaxşılaşdırılmasına öz müsbət töhfəsini verib. İİTKM-nin digər innovativ layihələri olan Azexport.az portalı, “Bir Pəncərə” İxraca Dəstək Mərkəzi tərəfindən KOSM-lara göstərilən dəstək ticarət prosedurlarının sadələşdirilməsini təmin edib, şəffaflıq və kağızsız ticarət üzrə ölkənin mövqeyini yüksəldib. Hesabatda bu layihələrin də adı çəkilib.

Hesabatda ölkədə cari vəzyyətin qiymətləndirilməsinin həyata keçirilməsi ilə yanaşı, transsərhəd kağızsız ticarətin yaxşılaşdırılması məqəsdi ilə gələcək üçün tövsiyələr də təqdim olunub.

Paylaş:

Baxılıb: 656 dəfə