Bakıda İOTA-nın "Vergi borclarının idarə edilməsi" üzrə İçi Qrupunun ilk iclası başlayıb

Bakı:

15°C

77%

4m/s

Əlaqə

AZ RU EN

Ana səhifə / İqtisadiyyat / Bakıda İOTA-nın "Vergi borclarının idarə edilməsi" üzrə İçi Qrupunun ilk iclası başlayıb

Bakıda İOTA-nın "Vergi borclarının idarə edilməsi" üzrə İçi Qrupunun ilk iclası başlayıb

07.03.2012 [00:48]

Tədbirdə bu quruma daxil olan ölkələrin vergi borclarının idarə olunması üzrə ekspertlər iştirak edirlər
Dünən Bakıda “Park İnn” mehmanxanasında Avropadaxili Vergi Administrasiyaları Təşkilatının (İOTA) “Vergi borclarının idarə edilməsi” üzrə İşçi Qrupunun ilk iclası öz işinə başlayıb. Tədbirdə İOTA-ya daxil olan 20 ölkənin vergi borclarının idarə olunması üzrə ekspertləri iştirak edirlər.
Tədbiri giriş sözü ilə açan vergilər nazirinin müavini, 3-cü dərəcəli dövlət vergi xidməti müşaviri Sahib Ələkbərov İşçi Qrupunun ilk iclasının Bakıda keçirilməsinin əhəmiyyətindən danışıb. Nazir müavini son illər ölkəmizdə bu sahədə bir sıra nailiyyətlərin əldə olunduğunu, vergi borclarının məcburi alınması ilə bağlı inzibatçılığın xeyli təkmilləşdirildiyini tədbir iştirakçılarının diqqətinə çatdırıb: “Vergilər Nazirliyi beynəlxalq əməkdaşlıq məsələlərinə xüsusi önəm verir. Əminəm ki, İOTA-nın İşçi Qrupunun bu iclası iştirakçı ölkələr arasında əməkdaşlığın gücləndirilməsi, vergi borclarının idarə olunması sahəsində səmərəliliyin daha da artırılması istiqamətində mühüm addım olacaq”.
Onun sözlərinə görə, son illər Azərbaycan bu sahədə müəyyən uğurlar əldə edib.
İOTA-nın texniki eksperti, “Vergi borclarının idarə edilməsi” üzrə İşçi Qrupunun rəhbəri Yevgenius Soldatkovas səmimi qarşılanmaya görə Azərbaycanın Vergilər Nazirliyinin rəhbərliyinə öz minnətdarlığını bildirib, müzakirə olunacaq məsələlər barədə tədbir iştirakçılarına ətraflı məlumat verib. İOTA-da ümumilikdə 46 ölkənin təmsil olunduğunu deyən Yevgenius Soldatkovas təşkilatın işində Azərbaycanın fəal iştirak etdiyini bildirib: “Azərbaycanda vergi borclarının idarə edilməsində müəyyən qədər uğurlar əldə olunub. Bu sahədə Azərbaycan Respublikasının Vergilər Nazirliyinin təcrübəsi nəzərəçarpandır” deyən qonaq əlavə edib ki, verginin toplanılmasında müxtəlif mənbələrdən, bank hesablarından, iri vergi ödəyicilərinin qeydiyyat kağızlarından və digər zəruri məlumatlardan istifadə olunması yüksək göstəricidir.
Sonra Vergilər Nazirliyinin Vergi borclarının alınması işinin təşkili idarəsinin rəisi İlkin Vəliyev “Vergi borclarının idarə olunması sistemi”nin təqdimatı ilə çıxış edib, vergi borclarının strukturu və onun idarə olunmasının strategiyası, vergi borclarının yığılması prosesinin avtomatlaşdırılması, vergi ödəyicilərinin öhdəlikləri, vergi borclarının dinamikasının qiymətləndirilməsi, borcların azalma tendensiyası, vergi borclarının idarə olunmasının səmərəli modelinin yaradılması və s. haqqında danışıb.
Azərbaycanda vergi borclarının ödənilməsi məsələsinə toxunan İ.Vəliyev deyib ki, hansısa bir şirkət vergisini ödəyə bilmirsə, Vergi Məcəlləsinin 85 maddəsinə uyğun olaraq vergi ödəyicisinin iflasa uğrama təhlükəsi olduqda və ya hansısa təbii fəlakət nəticəsində ona zərər dəydikdə, o, hesabatı verməklə borcunu bəyan edir. Sahibkar həmin borcu müəyyən girov və ya zəmanətlə təmin etməklə həmin öhdəliyin icra müddətini 1 aydan 9 ayadək uzada bilər. Bu cür hallar dəfələrlə olub və bu, vergi ödəyicilərinin hüququdur.
İdarə rəhbəri bildirib ki, Azərbaycanda vergi borclarının idarə olunmasının səmərəli modelinin yaradılması istiqamətində bir sıra ölkələrin təcrübəsi də öyrənilir: “Vergilər Nazirliyinin ötən ilin avqustundan tətbiq etdiyi yeni qaydalara görə, vergiödəyicisi dəvət olunur, ona borcu barədə məlumat və izahlar verilir”.
İ.Vəliyevin sözlərinə görə, bu praktikanın tətbiqi sayəsində 25 min vergiödəyicisi dəvət olunub və onların 80 faizi öz borcunu qəbul edərək ödəyib.
İşçi qrup öz işini martın 8-dək davam etdirəcək.
Nadir AZƏRİ

Paylaş:

Baxılıb: 1224 dəfə