50 ildən sonra ikinci dəfə...

Bakı:

2 °C

75 %

7 m/s

Əlaqə

AZ RU EN

Ana səhifə / Maraqlı / 50 ildən sonra ikinci dəfə...

50 ildən sonra ikinci dəfə...

02.03.2022 [10:08]

Azərbaycan dünya kosmonavtlarını qarşılamağa hazırlaşır

M.ABDULLAYEV

Azərbaycan 2023-cü ildə Beynəlxalq Astronavtika Konqresinə ev sahibliyi etmək hüququ qazanıb. Bununla bağlı qərar 2019-cu ilin oktyabrında ABŞ-ın paytaxtı Vaşinqton şəhərində Beynəlxalq Astronavtika Federasiyasının Baş Assambleyasında keçirilmiş seçkilərdə verilib. Beynəlxalq miqyaslı tədbirin gələn il oktyabrın 2-6-da Bakıda keçirilməsi nəzərdə tutulur. Artıq Azərbaycan dünya kosmonavtlarını qəbul etməyə hazırlaşır. Belə ki, Prezident İlham Əliyev 74-cü Beynəlxalq Astronavtika Konqresinin 2023-cü ildə Bakı şəhərində keçirilməsi ilə əlaqədar Təşkilat Komitəsinin yaradılması haqqında Sərəncam imzalayıb. Sənədə əsasən, Təşkilat Komitəsinə Astronavtika Konqresinin keçirilməsinə dair Tədbirlər Planı hazırlayıb həyata keçirmək tapşırılıb.

Niyə məhz Azərbaycan?

68 ölkədən 398 üzvü birləşdirən Beynəlxalq Astronavtika Federasiyası dünyada texniki sahədə mövcud olan ən böyük qurumlardan biridir. Beynəlxalq Astronavtika Konqresi də öz növbəsində, istər iştirakçıların say baxımına, istərsə də burada müzakirə olunan məsələlərin vacibliyinə görə dünya miqyasında ən mötəbər tədbirlərdən biri sayılır. Tədbir çərçivəsində paytaxtımıza dünyanın texnoloji gündəliyini müəyyən edən qurumların rəhbərlərindən, nümayəndələrindən ibarət təxminən 6-7 min xarici qonağın gələcəyi gözlənilir. Bu mötəbər tədbirə ev sahibliyi etməyə namizəd şəhərlər arasında Sinqapur, Rio-de-Janeyro və Nyu Delhi də olub. Kəskin rəqabət şəraitində keçən seçkilərdə paytaxtımız qalib gəlib.

Bəs Vaşinqtonda keçirilən seçkilərdə nə üçün Azərbaycana üstünlük verilib? Sualın cavabı olaraq bildirək ki, bu heç də təsadüfi deyil. Dünya kosmos ictimaiyyətinin belə bir qərar verməsi, ilk növbədə, Azərbaycanın son 18 ildə innovativ əsaslı sənaye quruculuğuna, o cümlədən də kosmik sənayenin inkişafına verdiyi önəmlə bağlıdır. Hazırda Azərbaycan Cənubi Qafqazda peyk operatoru olan yeganə ölkədir. Artıq bir neçə ildir ki, respublikamıza məxsus “Azerspace-1, “Azersky” və “Azerspace-2” peyklərinin istismarı uğurla həyata keçirilir. Bu peyklər vasitəsilə xarici ölkələrə və transmilli şirkətlərə satılan kosmos xidmətləri ölkəmizə valyuta qazandırır. Qürurverici haldır ki, hazırda “Azərkosmos”un ixrac portfelində ABŞ, Böyük Britaniya, Fransa, Almaniya, Malayziya kimi dünyanın aparıcı ölkələrinin qabaqcıl şirkətləri təmsil olunurlar. Dünya kosmik ailəsinin tərkibində belə uğurlu fəaliyyət öz nəticəsini verib. Sərəncamda da vurğulandığı kimi, uğurlu peyk layihələri sayəsində Azərbaycan dünya kosmik ailəsinin bir üzvünə çevrilərək beynəlxalq kosmik icmada böyük nüfuz qazanıb.

Böyük rəmzi məna daşıyan tədbir

Azərbaycan Beynəlxalq Astronavtika Konqresinə ikinci dəfə ev sahibliyi edəcək. Dövlət başçısının imzaladığı Sərəncamda da bildirildiyi kimi, bu, ilk dəfə ulu öndər Heydər Əliyevin rəhbərliyi dövründə - 1973-cü ildə baş vermişdi. O vaxt Ulu Öndər Azərbaycanın rəhbəri kimi böyük səylər göstərmişdi ki, Sovet İttifaqında bu konqres məhz Bakıda keçirilsin. Bu baxımdan, 2023-ci ildə - təxminən, yarım əsrdən sonra müstəqil Azərbaycanda bu konqresin yenidən keçirilməsi böyük rəmzi məna daşıyır. O vaxt Azərbaycan keçmiş ittifaqın tərkibində idi, müstəqil dövlət deyildi. İndi isə Bakı Beynəlxalq Astronavtika Konqresinə ev sahibliyini müstəqil dövlətin paytaxtı kimi edəcək. Bunun böyük rəmzi mənası var. Sərəncamda xüsusi olaraq vurğulanıb ki, dünya miqyasında ən mötəbər tədbirlərdən biri olan bu Beynəlxalq Konqresin ikinci dəfə Azərbaycanda keçirilməsi ölkəmizdə kosmik sənayenin inkişafına, beynəlxalq kosmik icma və onu təmsil edən Beynəlxalq Astronavtika Federasiyası ilə əməkdaşlığın genişləndirilməsinə, habelə qlobal kosmos sənayesinə daha yaxından inteqrasiya istiqamətində əvəzolunmaz imkanlar yaradacaq.

Paylaş:

Baxılıb: 2141 dəfə