Tbilisidə Vətən müharibəsinin ildönümünə həsr olunmuş “Komando” tamaşası nümayiş etdirilib

Bakı:

23 °C

64 %

5 m/s

Əlaqə

AZ RU EN

Ana səhifə / Mədəniyyət / Tbilisidə Vətən müharibəsinin ildönümünə həsr olunmuş “Komando” tamaşası nümayiş etdirilib

Tbilisidə Vətən müharibəsinin ildönümünə həsr olunmuş “Komando” tamaşası nümayiş etdirilib

26.09.2024 [23:42]

Sentyabrın 26-da Tbilisidə Nodar Dumbadze adına Gənc Tamaşaçılar Teatrında Vətən müharibəsinin ildönümünə həsr olunmuş "Komando" adlı tamaşa nümayiş etdirilib.

AZƏRTAC xəbər verir ki, qəhrəman Azərbaycan əsgərinin Vətən müharibəsindəki qəhrəmanlığından bəhs olunan tamaşa Azərbaycanın Gürcüstandakı səfirliyinin təşəbbüsü və dəstəyi ilə Era Teatrının kollektivi tərəfindən hazırlanıb.

Tamaşanın açılış mərasimində əvvəlcə şəhidlərimizin ruhu bir dəqiqəlik sükutla yad olunub.

Sonra səfir Faiq Quliyev çıxış edərək Azərbaycan xalqının azadlıq uğrundakı mübarizəsindən danışıb, Ulu Öndər Heydər Əliyevin gərgin əməyi və uzaqgörən siyasəti nəticəsində müstəqilliyimizin bərpa olunduğunu xüsusi qeyd edib.

Bildirib ki, müstəqilliyin ilk illərində düşmən qüvvələr tərəfindən torpaqlarımızın 20 faizi işğal olunub. Ümummilli Liderimizin uzaqgörən siyasəti və Müzəffər Ali Baş Komandan, Prezident İlham Əliyevin qətiyyəti nəticəsində 44 günlük Vətən müharibəsində torpaqlarımız işğaldan azad edildi. Birinci və İkinci Qarabağ müharibələrində xalqımız şəhidlər verdi. Onların içərisində Gürcüstandan olan soydaşlarımız da var.

Diplomat Azərbaycanın ərazi bütövlüyü və suverenliyinin bərpa olunmasında, Birinci və İkinci Qarabağ müharibələrində Gürcüstanda yaşayan soydaşlarımızın rolunu qeyd edib. Bildirilib ki, Azərbaycan dövləti şəhid ailələrinə, qazilərə daim diqqət və qayğı göstərir. Gürcüstandan olan şəhid ailələri də bu qayğıdan kənarda qalmırlar.

Səfir şəhidlərin adlarının əbədiləşdirilməsi istiqamətində görülən işlər barədə də ətraflı məlumat verib.

44 günlük Vətən müharibəsi şəhidi Səlimxan Bayramovun anası Rəhilə Rüstəmova çıxış edərək şəhid ailələrinə göstərilən diqqət və qayğıya görə Azərbaycan dövlətinə və Prezident İlham Əliyevə minnətdarlıq edib. Bildirib ki, təkcə o deyil, bütün şəhid anaları övladları ilə qürur duyurlar.

Tamaşanın quruluşçu rejissoru və bədii rəhbəri Anar Rafiqoğlu deyib ki, səhnə əsərini hazırlamaqda məqsəd rəşadətli Azərbaycan Ordusunun əsgər və zabitlərinin qəhrəmanlıqlarını nümayiş etdirməkdir.

Sonra tamaşa nümayiş etdirilib.

Tamaşanın əsas süjet xəttini 44 günlük Vətən müharibəsində yaralı əsgər yoldaşını döyüş meydanından sağ çıxarmağa çalışan komandirlərin və həkim Nigar xanımın göstərdiyi igidlik təşkil edib. Qeyri-bərabər döyüşdə əsgər və zabitlərin, bir vaxtlar hərbçi olan atasının son arzusunu yerinə yetirmək üçün ağ xallat geyinib cəbhəyə yollanan tibb bacısının, yaralı əsgərlərin göstərdiyi qəhrəmanlıq nümayiş etdirilib.

Tamaşada rolları gənc aktyorlar Elnur Vəlizadə, Elvir Hasanoğlu, Gül Cəfərova və Əli İlqaroğlu ifa ediblər.

Tədbirdə Türkiyənin və Türkmənistanın Gürcüstandakı səfirləri, Gürcüstanın rəsmi dairələrinin nümayəndələri, AZEBİ və digər strukturların rəhbərləri, iş adamları, din xadimləri, şəhid ailələrinin üzvləri, elm, mədəniyyət və incəsənət xadimləri, ictimaiyyət nümayəndələri, tələbələr iştirak ediblər.

Paylaş:

Baxılıb: 708 dəfə