Heydər Əliyev
yeni azerbaycan logo

Ana səhifə / Mədəniyyət / Sözün bitdiyi yerdə onun musiqisi başlayır

Sözün bitdiyi yerdə onun musiqisi başlayır

03.11.2023 [10:47]

Azərbaycan musiqisinin Emin Sabitoğlu mərhələsi

Günel ABBAS

Ünsiyyətin mümkün olan bütün imkanları bitdiyi yerdə onun musiqisi başlayır. Onun musiqiləri insanı dinlədikcə çox uzaqlara aparır.

O  dünyanın ən aparıcı bəstəkarlarından geri qalmır, əksinə çoxunu qabaqlayır. Sadəcə bəlkə də zamanında onun musiqiləri lazımınca təbliğ və təqdim olunmayıb.

600-dən artıq mahnı, 9 musiqili komediya, 40-a yaxın filmə musiqi bəstələyən tanınmış bəstəkar Emin Sabitoğlunun anadan olmasından 86 il ötür...

Emin Sabitoğlunu bir bəstəkar kimi xalqa sevdirən mahnılarının özəyindəki melodiyadır. Xalq şairi Bəxtiyar Vahabzadə əbəs yerə demirdi ki, E.Sabitoğlunun bütün mahnılarında romans janrının əlamətlərini görürük. Belə ki, bu mahnılarda olmuş bir əhvalat nəql olunur. Burada təəssüf qarışıq bir giley, intizar qarışıq bir peşmançılığın fəryadını eşidirik.

Bununla yanaşı bu mahnılarda da vurğu əsasən nəqarətin üstünə düşür, hiss, həyəcan nəqarətdə sərgilənir və biz uzun müddət mahnısının təsirindən çıxa bilmirik.

Emin yaradıcılığının ikinci üstün cəhəti seçilən mətnin şair qədər duyulmasındadır. O, seçdiyi mətni köynək kimi qəlbinə geyir, onun istisinə isinir. Onu öz duyğusuna çevirib, sonra piano arxasına keçir.

O, yaşadığı dövrdə öz-özlüyündə musiqidə bir mərhələ idi. Azərbaycan musiqi köklərinə son dərəcə bağlı sənəti ilə Emin Sabitoğlu dünən də, bu gün də çox-çox yüksəklərdədir.

Emin Sabitoğlunun mahnılarının valehedici gücü onun qeyri-adi gözəlliyi ilə seçilən melodiyalarındadır. Özü də bu melodiyalar nə qədər sadə, nə qədər yığcamdırsa, bir o qədər təsirli, cazibədardır.

Emin Sabitoğlunun əsərlərini səciyyələndirən xüsusiyyətləri parlaq melodizm, xalq musiqimizin dərin qatlarına yiyələnmək, xalq musiqimizə ehtiramla, məhəbbətlə yanaşmadır. Hər bir janra yenilik gətirən bəstəkar onu müxtəlif vasitələrlə zənginləşdirib.

Aylar, illər ötəcək, zövqlər, maraqlar bir-birini əvəz edəcək, dəyişəcək, Emin Sabitoğlunun gözəl, təkrarsız musiqisi nəinki yaddan çıxmayacaq, əksinə musiqi tariximizin hər yeni mərhələsində görkəmli ifaçılarımızın şərhində yeni boyalarla zənginləşərək daha çox seviləcək, cavanlaşacaq. Məhz bu səbəbdən Emin Sabitoğlunun xalqın qəlbinə toxunan dərin musiqisi daima yaşayacaq...

Paylaş:
Baxılıb: 1286 dəfə

Xəbər lenti

Hamısına bax

Analitik

Xəbər lenti

YAP xəbərləri

MEDİA

Siyasət

Gündəm

Arxiv
B Be Ça Ç Ca C Ş
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30