Azərbaycan Ordusunun şəhid zabitləri dəfn edilib

Bakı:

19 °C

94 %

2 m/s

Əlaqə

AZ RU EN

Ana səhifə / Siyasət / Azərbaycan Ordusunun şəhid zabitləri dəfn edilib

Azərbaycan Ordusunun şəhid zabitləri dəfn edilib

12.04.2016 [10:00]

Ermənistan və Azərbaycan qoşunlarının təmas xəttində baş vermiş son hərbi əməliyyatlarda “Mi-24” helikopterinin vurulması zamanı şəhid olan pilotlar - mayor Urfan Vəlizadə, mayor Təbriz Musazadə, baş leytenant Əbubəkir İsmayılov, eləcə də polkovnik-leytenant Murad Mirzəyev aprelin 11-də son mənzilə yola salınıblar.
AZƏRTAC xəbər verir ki, qəhrəman zabitlərlə vida mərasimi Müdafiə Nazirliyinin Təlim və Tədris Mərkəzində keçirilib. Mərasimdə dövlət və hökumət rəsmiləri, o cümlədən müdafiə naziri, general-polkovnik Zakir Həsənov, müdafiə nazirinin birinci müavini - Silahlı Qüvvələrin Baş Qərargah rəisi, general-polkovnik Nəcməddin Sadıkov, baş prokurorun müavini - respublika hərbi prokuroru Xanlar Vəliyev, Dövlət Sərhəd Xidmətinin rəisi-Sərhəd Qoşunlarının Komandanı, general-polkovnik Elçin Quliyev, Milli Məclisin deputatları, şəhidlərin ailə üzvləri, hərbçilər, ictimaiyyətin nümayəndələri iştirak ediblər.
Əvvəlcə xalqımızın Ümummilli lideri Heydər Əliyevin və şəhidlərin xatirəsi bir dəqiqəlik sükutla yad edilib.
Müdafiə Nazirliyinin rəhbərliyi şəhidlərin yaxınlarına və valideynlərinə başsağlığı verib.
Nazir Zakir Həsənov mərasimdə çıxış edərək deyib: “Bu gün burada danışmaq çətindir, amma biz həqiqəti deməliyik. Yüz illərdir erməni faşistləri bizə qarşı cinayətlər törədirlər. Bu cinayətin qarşısı alınmasaydı, yenə davam edəcəkdi. Şəhidlərimiz bütün dünyaya sübut etdi ki, Azərbaycan xalqı qəhrəman xalqdır”.
Şəhidlərimizin qısasının düşməndən alınacağını, torpaqlarımızın tezliklə işğaldan azad olunacağını bildirən nazir deyib: “Bu gün Ali Baş Komandanın rəhbərliyi ilə Silahlı Qüvvələrdə böyük ruh yüksəkliyi var. Şəhidlərin qisası alınacaq və biz ərazi bütövlüyümüzü bərpa edəcəyik. Heç kəs buna şübhə etməsin”.
Müdafiə Nazirliyinin əməkdaşı, polkovnik Abdulla Qurbani şəhidlərin tərcümeyi-halı və keçdikləri şərəfli döyüş yolu haqqında məlumat verib. O, Ermənistan silahlı qüvvələrinin aprelin 1-dən başlayaraq mövqelərimizi intensiv atəşə tutduğunu, yaşayış məntəqələrinə mərmilər yağdırdığını bildirib. Qeyd edib ki, Azərbaycan Ordusu Ermənistan hərbi birləşmələrinin təxribatlarının qarşısını layiqincə alıb, düşmənin xeyli canlı qüvvəsini, silah və texnikasını məhv edib. Bu döyüşlərdə biz də şəhid verdik. Neçə illərdir düşmən tapdağında olan ərazilərimizin bir hissəsi azad edilib, çox əlverişli yüksəkliklər Azərbaycan əsgərinin nəzarəti altına keçib. İndi həmin ərazilərdə Azərbaycan bayrağı dalğalanır. Azərbaycan əsgəri öz qəhrəmanlığını bir daha sübut etdi. Şəhidlərimizin valideynləri də “Vətən sağ olsun!” deyirlər. Bu gün Azərbaycan Ordusu Vətən torpaqlarının keşiyində ayıq-sayıq dayanır.
Şəhid anaları adından çıxış edən Rəna İsmayılova övladlarımızın Vətən yolunda, Azərbaycanın ərazi bütövlüyü uğrunda şəhid olmasından qürur duyduğunu deyib. O, göstərilən diqqət və qayğıya görə Prezident, Silahlı Qüvvələrin Ali Baş Komandanı İlham Əliyevə və Müdafiə Nazirliyinin rəhbərliyinə minnətdarlığını bildirib.
Sonra şəhidlərin cənazələri son mənzilə yola salınması üçün ikinci Fəxri xiyabana gətirilib.
Şəhidləri son mənzilə yola salmaq üçün orada böyük qələbəlik var idi.
İgid qəhrəmanlarımız yaylım atəşi altında torpağa tapşırılıb.
Şəhidlərin ruhuna dualar oxunub, Azərbaycan Respublikasının dövlət himni səslənib.
Müdafiə naziri, general-polkovnik Zakir Həsənov şəhidlərin tabutu üzərinə örtülən bayraqları əbədi xatirə olaraq onların ailə üzvlərinə təqdim edib.
Dəfn zamanı “Şəhidlər ölməz, vətən bölünməz” şüarı səsləndirilib. Şəhidlərin məzarı üzərinə əklillər və gül dəstələri düzülüb.

Paylaş:

Baxılıb: 793 dəfə