Türkiyə və Azərbaycanın milli maraqları qarşılıqlı münasibətlərin inkişafını şərtləndirir

Bakı:

13 °C

82 %

5 m/s

Əlaqə

AZ RU EN

Ana səhifə / Siyasət / Türkiyə və Azərbaycanın milli maraqları qarşılıqlı münasibətlərin inkişafını şərtləndirir

Türkiyə və Azərbaycanın milli maraqları qarşılıqlı münasibətlərin inkişafını şərtləndirir

16.05.2009 [14:21]

Türkiyə-Azərbaycan münasibətlərinin çox dərin tarixi kökləri var. Bu münasibətlərin inkişaf etdirilməsi hər iki ölkənin milli maraqlarına uyğundur. Lakin “bir millət, iki dövlət” olan Azərbaycanla Türkiyə arasında son vaxtlar yaranmış soyuqluq təbii olaraq hər iki ölkədə ciddi narahatçılıq yaratmışdı. Baş nazir Rəcəb Tayyib Ərdoğanın Bakı səfəri isə bütün bu narahatçılıqlara son qoydu. Türkiyənin Azərbaycanla münasibətlərdə yanlışlığa heç vaxt yol vermədiyini və bundan sonra da verməyəcəyini deyən baş nazir dövlətlərimiz arasındakı münasibətlərin, xüsusilə də, indiki şəraitdə qorunub saxlanılmasının vacibliyini bəyan etdi. “Azərbaycan-Türkiyə münasibətlərinin müzakirəyə çıxarılmasına belə Türkiyə izin verməyəcək” deyən Ərdoğan, bununla da, qardaş dövlətlərin arasında problem yaratmaq istəyən qüvvələrə bunun mümkün olmayacağını anlatdı. Dövlətlərimizin milli maraqlarının üst-üstə düşdüyünü deyən Türkiyənin baş naziri həmin maraqlar naminə hər iki ölkənin eyni mövqedən çıxış etməsinin vacibliyini bildirdi. Rəcəb Tayyib Ərdoğanın Bakı səfərinə və səsləndirdiyi bəyanatlara münasibət bildirən politoloq Rasim Musabəyov hesab edir ki, bu səfər dövlətlər arasında yaranmaqda olan soyuqluğu aradan qaldırmaqla yanaşı, həm də münasibətlərin bundan sonrakı inkişafında da dostluq və qardaşlıq prinsiplərinin əsas götürüləcəyini göstərdi: “Belə fikirlər mövcud idi ki, Azərbaycan və Türkiyənin münasibətləri öz istiqamətini dəyişəcək. Lakin Ərdoğan Bakıda verdiyi mesajlarla bir daha göstərdi ki, qarşılıqlı münasibətlərdə prioritet kimi qəbul edilən əsaslar qüvvədə qalır və Türkiyə bu prioritetlərdən kənara çıxmayacaq”.
Politoloqun sözlərinə görə, məlum səfər Ermənistanı da bir daha düşünməyə məcbur etdi: “Türkiyə sərhədləri açmayacaq. Ermənistan ayrı çıxış yolları haqqında düşünməlidir”.
Millət vəkili, politoloq Aydın Mirzəzadə də hesab edir ki, Rəcəb Tayyib Ərdoğanın ölkəmizə səfəri və Bakıda verdiyi bəyanatlar Türkiyə ilə münasibətlərimizi korlamağa çalışan və bölgədə maraqlı olan qüvvələrin planlarını darmadağın etdi: “Ermənistanla sərhədlərin açılması məsələsi, əslində, regionda maraqlı olan və münasibətlərimizi pozmağa çalışan qüvvələr tərəfindən ortaya atılmışdı. Və bu məsələ ilə bağlı müxtəlif spekulyasiylar edildi. Lakin baş nazirin səfəri zamanı müzakirə olunan məsələlər, eləcə də, əldə olunan razılaşmalar göstərdi ki, bu münasibətlər hər iki dövlət üçün vacib əhəmiyyət kəsb edir və hər iki tərəf bunu çox gözəl anlayır”. Ərdoğanın Qarabağ münaqişəsi ilə bağlı Bakıda verdiyi sərt bəyanatlarını Ermənistana xəbərdarlıq kimi dəyərləndirən A.Mirzəzadə bunun müsbət nəticələrə səbəb olacağını düşünür: “Güman edirdilər ki, Türkiyə öz mövqeyində dəyişiklik edəcək. İşğalçı Ermənistan buna böyük ümid bəsləyirdi. Lakin belə olmadı. Ona görə də, Ermənistan bunlardan nəticələr çıxarmalıdır”.
Millət vəkilinin fikrincə, Türkiyə və Azərbaycan bir daha sınaqdan çıxmaqla, münasibətlərinin nə qədər möhkəm olduğunu bütün dünyaya nümayiş etdirdilər.
Politoloq Elman Nəsirlinin sözlərinə görə, Türkiyə baş nazirinin Azərbaycana səfəri əvvəlki səfərlərdən xeyli fərqli olmaqla 3 əsas məqama aydınlıq gətirdi: “Türkiyənin Ermənistanla yaxınlaşmasının arxasında nə durur? İkincisi, Türkiyənin Qarabağ məsələsi ilə bağlı mövqeyi. üçüncüsü, enerji məsələləri ilə bağlı yaranmış problemlər”.
İlk iki məsələ ilə bağlı baş nazirin verdiyi bəyanatların xüsusi əhəmiyyət kəsb etdiyini söyləyən E.Nəsirli enerji məsələləri ilə bağlı razılaşmaları da yüksək qiymətləndirir: “Bakı müzakirələri zamanı bu məsələdə razılığın əldə olunmasını və baş nazirin özünü indiki şəraitdə qazın min kubmetrinin 120 dollara satılmasının doğru olmadığını etiraf etməsi tərəflərin bir-biri ilə tam anlaşıldığından xəbər verir”.
Səfərin ölkələrarası münasibətlərdə yeni bir mərhələ açdığını söyləyən E.Nəsirli indiki məqamda hər iki ölkənin eyni mövqedən çıxış etməsinin mühüm əhəmiyyət daşıdığını deyir: “Bir millətin iki dövlətinin maraqları bir-birini tamamlayır. Ona görə də, Bakı və Ankaranın həmişə isti münasibətdə olması zəruridir. Ərdoğanın Azərbaycan səfərində Türkiyənin də bu reallığı başa düşdüyü və buna uyğun siyasət yeritməyə çalışdığı aydın oldu”.
BAHAR

Paylaş:

Baxılıb: 1321 dəfə