Seymur Orucov: Azərbaycan gəncliyi hər il 12 avqust - Beynəlxalq Gənclər Gününü böyük ruh yüksəkliyi ilə qeyd edir

Bakı:

25 °C

39 %

4 m/s

AZ RU EN

Ana səhifə / Siyasət / Seymur Orucov: Azərbaycan gəncliyi hər il 12 avqust - Beynəlxalq Gənclər Gününü böyük ruh yüksəkliyi ilə qeyd edir

Seymur Orucov: Azərbaycan gəncliyi hər il 12 avqust - Beynəlxalq Gənclər Gününü böyük ruh yüksəkliyi ilə qeyd edir

12.08.2016 [10:07]

“Gənclər hər bir ölkənin ictimai-siyasi, sosial-mədəni həyatında mühüm rola malik bir qüvvədir. Gənclərə verilən dəstək həm də ölkənin güclü və firavan gələcəyinə edilən yatırımdır. Təsadüfi deyil ki, bu gün ölkəmizdə həyata keçirilən dövlət siyasətinin önəmli tərkib hissəsini məhz gənclər siyasəti təşkil edir. Ümumiyyətlə, Azərbaycanda gənclər dövlətin diqqət və qayğısını hər zaman öz üzərlərində hiss ediblər”. Bu fikirləri Yeni Azərbaycan Partiyası (YAP) Gənclər Birliyinin sədri, partiyanın Siyasi Şurasının üzvü Seymur Orucov deyib.
S.Orucov bildirib ki, əsası Ulu öndər Heydər Əliyev tərəfindən qoyulan gənclər siyasətinin başlıca məqsədi yeni nəslin fiziki, mənəvi-psixoloji cəhətdən sağlam yetişməsini, istedadlı gənclərin üzə çıxarılması və onların ölkənin gələcəyinə töhfə verməsini təmin etməkdir. Onun sözlərinə görə, bu gün də Azərbaycanda gənclər siyasəti uğurla davam etdirilir: “Azərbaycan Prezidenti İlham Əliyevin məqsədyönlü siyasətinin nəticəsidir ki, bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər formalaşır. Azərbaycan gəncləri gündən-günə ölkənin ictimai-siyasi həyatında daha böyük rol oynayırlar. Hazırda respublikada mövcud olan yüzlərlə qeyri-hökumət və gənclər təşkilatlarının aktiv fəaliyyəti dövlətin yaratdığı şərait sayəsində mümkün olub. Məhz dövlətin gənclərə dəstək və diqqət göstərməsi Azərbaycan gəncliyində özünə, öz gücünə, istedadına inam hissini artırıb. Gənclərimiz iştirak etdikləri beynəlxalq olimpiadalarda və idman yarışlarında yeni-yeni qələbələrlə ölkəmizin şərəfini ucaldıblar. Təbii ki, dövlətin bu istiqamətdə gördüyü tədbirlər bundan sonra da davam etdiriləcək. Belə ki, gəncliyin inkişafı ilə bağlı Dövlət proqramları həyata keçirilir. Bu proqramlar Azərbaycan gəncliyinin inkişafına böyük töhfələr verir”.
Dövlət gənclər siyasətinin əhəmiyyətini faktlarla sadalayan YAP Gənclər Birliyinin sədri qeyd edib ki, ilk olaraq, 1994-cü ildə Gənclər və İdman Nazirliyi yaradıldı. Eləcə də, Azərbaycan dövlətinin gənclər siyasətinin formalaşmasında və gənc nəslin geniş fəaliyyət meydanına çıxarılmasında Ulu öndər Heydər Əliyevin təşəbbüsü və iştirakı ilə keçirilən Gənclərin I Forumunun xüsusi rolu oldu. 1996-cı il fevralın 2-də keçirilən bu Forum Ümummilli lider Heydər Əliyevin gəncliklə bağlı strategiyasının ilk təntənəsi kimi dəyərləndirildi. 1997-ci ildə Ümummilli lider Heydər Əliyevin Sərəncamı əsasında I Forumun keçirildiyi tarix - yəni 2 fevral Azərbaycanda Gənclər Günü kimi elan edildi. Milli Məclis tərəfindən isə “Dövlət gənclər siyasəti haqqında” qanun qəbul olundu. “Bu siyasəti uğurla davam etdirən Prezident İlham Əliyevin Sərəncamı ilə gəncləri aparıcı qüvvəyə çevirmək və onların sosial-iqtisadi problemlərinin həllini təmin etmək məqsədilə 2005-2009-cu illəri əhatə edən “Azərbaycan gəncliyi” Dövlət Proqramı təsdiq edilərək həyata keçirildi. Azərbaycan Prezidenti İlham Əliyev tərəfindən 2007-ci ilin “Gənclər ili” elan edilməsi, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın təsdiq edilməsi, “Azərbaycan gəncliyi 2011-2015-ci illərdə Dövlət Proqramı” haqqında Sərəncamın imzalanması Azərbaycanda gəncliyə diqqət və qayğının davamlı bir siyasət olduğunu bir daha təsdiqlədi. Xüsusilə “Azərbaycan gəncliyi 2011-2015-ci illərdə Dövlət Proqramı”ndan irəli gələn vəzifələrin yerinə yetirilməsi gənclər siyasətini daha da inkişaf etdirməyə, gənc mütəxəssislərin işlə təminatına, sosial-iqtisadi problemlərinin həllinin təmin edilməsinə xidmət etdi. Eyni zamanda, ölkə Prezidentinin Fərmanı əsasında Gənclər Fondunun yaradılması, 2 iyul 2013-cü il tarixli Fərmanı ilə “Gənclər üçün Prezident Mükafatı”nın təsis edilməsi də əhəmiyyətli addımlardandır. Prezident İlham Əliyev tərəfindən “2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında Sərəncamın imzalanması bir daha dövlətimizin gəncliyə verdiyi önəmin parlaq göstəricisidir”, - deyən S.Orucov əlavə edib ki, gənclərin fəaliyyəti də dövlət tərəfindən yüksək qiymətləndirilir.
S.Orucov qeyd edib ki, Yeni Azərbaycan Partiyası da gəncliyin inkişafına xüsusi diqqət yetirir: “Həyata keçirilən bir çox layihələr, gənclərin tədbirlərinə dəstək verilməsi, onlar üçün geniş imkanların yaradılması buna əyani sübutdur. Biz, ölkə gənclərinin mütləq intellektual potensialını ətrafına toplayan YAP Gənclər Birliyi olaraq, hər zaman ölkə Prezidentinin daxili və xarici siyasətini birmənalı olaraq dəstəkləyirik. Gənclərimiz bu partiyanın üzvü olmaqdan qürur duyurlar. Partiyada gənclərimizin sayı 40 faiz civarındadır. Bu, böyük potensiala malik olan gənclər ordusudur”.
YAP Gənclər Birliyinin sədri hesab edir ki, bütövlükdə gəncliyimiz Azərbaycanı beynəlxalq müstəvidə də layiqincə təmsil edir. Onun sözlərinə görə, gənclərin beynəlxalq miqyasda qazandığı uğurlar ölkəmizin adını ucaldır: “Bütün bunların fonunda Azərbaycan gəncliyi hər il 12 avqust - Beynəlxalq Gənclər Gününü böyük ruh yüksəkliyi ilə qeyd edir”.
Nardar BAYRAMLI

Paylaş:

Baxılıb: 1126 dəfə