Qarabağla bağlı vahid elektron informasiya resursunun təqdimat mərasimi olub

Bakı:

20 °C

94 %

7 m/s

Əlaqə

AZ RU EN

Ana səhifə / Siyasət / Qarabağla bağlı vahid elektron informasiya resursunun təqdimat mərasimi olub

Qarabağla bağlı vahid elektron informasiya resursunun təqdimat mərasimi olub

19.12.2009 [22:14]

Dünən Azərbaycan Respublikası Prezidenti yanında Dövlət İdarəçilik Akademiyasının (DİA) YUNESKO Mərkəzinin və “Dostluq” Gənclərin Əlaqələndirmə Mərkəzinin Azərbaycan Respublikası Prezidenti yayında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Qarabağla əlaqədar reallaşdırdıqları layihə çərçivəsində vahid elektron informasiya resursunun (www.garabagh.ws) təqdimatı olub. Akademiyanın rektoru, professor Seyfəddin Qəndilov bildirib ki, əzəli və əbədi torpağımız olan Dağlıq Qarabağın erməni işğalından azad edilməsi, bununla bağlı Azərbaycanın ədalətli mövqeyinin dünya ictimaiyyətinə çatdırılması istiqamətində Ulu öndər Heydər Əliyevin həyata keçirdiyi məqsədyönlü siyasətin bu gün Prezident İlham Əliyev tərəfindən uğurla davam etdirilməsi, xüsusilə son vaxtlar dövlətimizin başçısının münaqişənin həlli ilə bağlı verdiyi önəmli bəyanatlar hər bir Azərbaycan vətəndaşının ürəyindəndir. Belə bir şəraitdə Ermənistanla informasiya savaşında qüvvələri səfərbər etməyin vacibliyini vurğulayan rektor, yeni yaradılmış saytın bu işdə mühüm rol oynayacağına əminliyini bildirib.
Milli Məclis sədrinin müavini Bahar Muradova təqdimatı keçirilən vahid elektron informasiya resursunun əhəmiyyətini yüksək qiymətləndirərək deyib ki, son vaxtlar Prezident İlham Əliyevin işğal olunmuş Azərbaycan torpaqlarının azad edilməsi istiqamətində ardıcıl surətdə həyata keçirdiyi məqsədyönlü siyasət biz qarabağlılarda tezliklə öz doğma torpaqlarımıza qayıdacağımıza inamı artırıb. Prezidentin ardıcıl səylərinin fonunda hər bir Azərbaycan vətəndaşının, hər bir ziyalının, deputatın, dövlət məmurunun borcu bu fəaliyyətə öz əməli işi ilə dəstək vermək, dövlətimizin başçısının apardığı məqsədyönlü siyasətin sürətinə, operativliyinə, çevikliyinə uyğun hərəkət etməkdir. Qarabağla bağlı həqiqətlərin dünya ictimaiyyətinə çatdırılmasında və Ermənistanın təcavüzkar siyasətinin ifşa olunmasında yeni fəaliyyətə başlayan saytın mühüm rol oynayacağına əminliyini bildirən B.Muradova, vahid elektron informasiya resursunun yalnız hər gün, hər saat yeniləşməklə, öz səhifələrində konkret faktları əks etdirməklə məqsədinə nail ola biləcəyini söyləyib.
Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev rəhbərlik etdiyi qurumun bundan sonra da beynəlxalq aləmdə Azərbaycanın maraqlarını qoruyan, Qarabağ münaqişəsi ilə bağlı həqiqətləri dünya ictimaiyyətinə çatdıran belə təşəbbüslərə dəstək verəcəyini bildirib.
Azərbaycan Respublikasının YUNESKO üzrə Milli Komissiyasının birinci katibi Günay Əfəndiyeva ölkəmizin YUNESKO ilə əməkdaşlığı çərçivəsində düşmən tapdağı altında olan torpaqlarımızla bağlı yeni vahid elektron informasiya resursunun yaradılmasını ictimai həyatımızda mühüm hadisə kimi səciyyələndirib. Son vaxtlar Azərbaycanın beynəlxalq təşkilatlarla, o cümlədən YUNESKO ilə əməkdaşlığının geniş vüsət almasında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın ölçüyəgəlməz xidmətlərini xatırladan G.Əfəndiyeva Azərbaycanın birinci xanımının milli-mənəvi dəyərlərimizin qorunub saxlanması, onların dünyada tanıdılması istiqamətində çoxşaxəli fəaliyyətini diqqətə çatdırıb.
Mərasimdə çıxış edən “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi idarə heyətinin üzvü, Milli Məclisin deputatı Elman Məmmədov, layihənin müəllifləri - DİA-nın YUNESKO Mərkəzinin rəhbəri Cahangir Hacıyev, “Dostluq” Gənclərin Əlaqələndirmə Mərkəzinin rəhbəri Yusif Ağayev, “İrəli” İctimai Birliyinin sədri Ceyhun Osmanlı və başqaları saytın fəaliyyətə başlamasını ölkəmizin ədalətli mövqeyinin dünya ictimaiyyətinə çatdırılmasında mühüm addım kimi qiymətləndiriblər.
Bildirilib ki, Qarabağın tarixi, mədəniyyəti, müsiqisi, coğrafiyası, təbiəti, təbii ehtiyatları, ədəbiyyatı, mədəni irsi, görkəmli şəxsiyyətləri, Ermənistanın zaman-zaman Azərbaycana təcavüzləri, Xocalı soyqırımı, tarixi sənədlər və elektron kitabxanadan ibarət olan sayt 20 əsas, 65 alt, 36 əlavə bölmədən ibarətdir. Mərasimin sonunda Xalq artistləri Arif Babayevin və Mənsum İbrahimovun, Əməkdar artistlər Elçin Həşimovun (tar), Elnur Əhmədovun (kamança) müşayiəti ilə birgə ifa etdikləri “Qarabağ şikəstəsi” iştirakçılar tərəfindən alqışlarla qarşılanıb. Bu tədbirin keçirilməsi üçün rəmzi olaraq seçilmiş “Hyatt Regency-Naxçıvan” mehmanxanasının Suşa zalında səslənən “Qarabağ şikəstəsi”nin tezliklə Vətənimizin dilbər guşəsi Qarabağdan - Şuşanın dillər əzbəri olan İsa bulağından havalanması arzusu dönə-dönə vurğulanıb.

Paylaş:

Baxılıb: 1208 dəfə