Başlıbel faciəsi erməni vandalizminin daha bir nümunəsidir

Bakı:

25 °C

73 %

11 m/s

Əlaqə

AZ RU EN

Ana səhifə / Siyasət / Başlıbel faciəsi erməni vandalizminin daha bir nümunəsidir

Başlıbel faciəsi erməni vandalizminin daha bir nümunəsidir

20.04.2021 [08:53]

Məlum olduğu kimi, ermənilər tərəfindən xalqımıza qarşı dəfələrlə qətliamlar törədilib. Erməni vandallarının xalqımıza qarşı vəhşiliklərdən biri də 1993-cü ilin aprelində Kəlbəcər rayonun işğalı zamanı Başlıbel kəndində törədilib. Bu faciədən artıq 28 il ötür.
Qeyd edək ki, Kəlbəcər rayonunun işğalı zamanı doğma torpaqlarını tərk etməyən 62 nəfər Başlıbel sakini dağlara sığınıb, kahalarda gizləniblər. Lakin həmin şəxslər cəmi 17 gün gizlində qala biliblər. 1993-cü il aprelin 18-də erməni quldurları qadın, uşaq və yaşlıların gizləndiyi yeri aşkarlayıb. Bu insanlar cəmi 2 ov tüfəngi və əhalini qoruyan əsgərlərdə olan bir neçə avtomat silahla düşmənə müqavimət göstəriblər. Başlıbelin işğalı zamanı erməni quldurları tərəfindən 27 nəfər güllələnib. Ermənilər Başlıbel kəndini işğal edərkən II Dünya müharibəsi iştirakçısı olan bir nəfəri - Hüseyn Hüseynovu diri-diri yandırıblar. 19 nəfər kənd sakini (qadın, uşaq və qoca) isə işğalçı erməni hərbçiləri tərəfindən girov götürülüb. Düşmən gülləsindən canını qurtara bilən 30 nəfər isə yenidən dağlara çəkilib və daha 113 gün mühasirə həyatı yaşayıb. Sağ qalan həmin şəxslər dəfələrlə ölümlə üz-üzə gəlib və günlərlə ac-susuz qalıblar. Mühasirədən çıxaraq gecələr dörd sutka piyada yol qət edən 29 nəfər 1993-cü il iyulun 22-də Daşkəsən rayonunun ərazisinə keçə biliblər. Amma 1 nəfər - Ələsgər Ələsgərov doğma torpağını tərk etməyərək Başlıbeldə qalıb. Ələsgər Ələsgərov bu günədək itkin sayılır və onun barəsində hər hansı məlumat yoxdur. Ümumilikdə, kəlbəcərlilər doğma torpaqlarının müdafiəsi üçün qəhrəmanlıqla mübarizə aparıblar.
Qeyd edək ki, 1993-cü ildə Kəlbəcərin, onun kəndlərindən biri olan Başlıbelin ermənilər tərəfindən işğal olunması AXC-“Müsavat” hakimiyyətinin səriştəsiz və xəyanətkar siyasətinin nəticəsi idi. Vahid komandanlığın olmaması, düşmənə qarşı mübarizədə düzgün taktikanın seçilməməsi, ən əsası, vəzifə davası belə ağır hadisələrin baş verməsinə səbəb olurdu. Digər tərəfdən, AXC-“Müsavat” hakimiyyəti dinc insanları qorumaq, onların təhlükəsizliyini təmin etmək üçün addımlar atmadı.
Ümumiyyətlə, Başlıbel Kəlbəcər rayonunun ən qədim və böyük kəndlərindən biridir. 7659 hektar ərazisi olan kənd iki dağ çayının qovuşduğu yerdə, Dəlidağın ətəyində yerləşirdi. Kəndin ərazisində 1993-cü ilədək yaşayan yerli sakinlər isə azərbaycanlılardır. İşğal dövründə Başlıbel kəndinin əhalisinin sayı 1790 nəfər olub. Kənddə 323 fərdi yaşayış evi, 380 şagird yerlik bir orta məktəb, 45 yerlik uşaq bağçası, 45 çarpayılıq xəstəxana olub.
Bütövlükdə, Başlıbel faciəsi ermənilərin Xocalı, Ağdaban, Qaradağlı və Ballıqayada törətdikləri qətliamlarla sinxron təşkil edir. Dinc sakinlərin - uşaq, qadın, qoca demədən hər kəsin vəhşiliklə qətlə yetirilməsi erməni faşizminin xarakterini özündə ehtiva edir. 44 günlük Vətən müharibəsində ermənilər tərəfindən Gəncə, Tərtər və Bərdəyə raket hücumlarının edilməsi və bu hücumlar nəticəsində çoxlu sayda dinc insanın qətlə yetirilməsi də erməni vandalizminin əyani göstəricisidir.
Xatırlatmaq lazımdır ki, 44 günlük Vətən müharibəsində məğlub olan işğalçı Ermənistan kapitulyasiya sənədinə imza atmağa məcbur olub. 10 noyabr birgə Bəyanatına əsasən, ötən il noyabrın 25-də Kəlbəcər rayonu, o cümlədən Başlıbel kəndi Azərbaycana təhvil verilib.
Nardar BAYRAMLI

Paylaş:

Baxılıb: 687 dəfə