YAP Qadınlar Şurasının təşkilatçılığı ilə Azərbaycan dövlət müstəqilliyinin bərpasının 20-ci ildönümünə həsr olunmuş bayram tədbiri keçirilib

Bakı:

24 °C

64 %

5 m/s

AZ RU EN

Ana səhifə / Siyasət / YAP Qadınlar Şurasının təşkilatçılığı ilə Azərbaycan dövlət müstəqilliyinin bərpasının 20-ci ildönümünə həsr olunmuş bayram tədbiri keçirilib

YAP Qadınlar Şurasının təşkilatçılığı ilə Azərbaycan dövlət müstəqilliyinin bərpasının 20-ci ildönümünə həsr olunmuş bayram tədbiri keçirilib

13.10.2011 [23:06]

Bakı Əyləncə Mərkəzində Yeni Azərbaycan Partiyası (YAP) Qadınlar Şurasının təşkilatçılığı ilə Azərbaycanın dövlət müstəqilliyinin bərpasnın 20-ci ildönümünə həsr olunmuş tədbir keçirilib.
Tədbirdə Yeni Azərbaycan Partiyasının Sədr müavini-İcra katibi, Milli Məclisin deputatı Əli Əhmədov, YAP İcra katibinin müavini, Milli Məclisin deputatı Siyavuş Novruzov, YAP İcra katibinin müavini, Milli Məclisin deputatı Mübariz Qurbanlı, YAP İdarə Heyətinin üzvü, Milli Məclisin sədr müavini Bahar Muradova, Milli Məclisin deputatları və ziyalılar iştirak ediblər.
Mərasimdə çıxış edən YAP Qadınlar Şurasının sədri Nurlana Əliyeva Azərbaycanın ötən 20 ildə keçdiyi zəngin və şərəfli yola nəzər salıb. O, qeyd edib ki, müstəqillik Azərbaycan xalqının ən böyük sərvətidir.
Nurlana Əliyeva vurğulayıb ki, Ulu öndər Heydər Əliyev hakimiyyətə qayıtdıqdan sonra köklü islahatlar həyata keçirilib.
Bildirilib ki, Azərbaycanın 20 illik müstəqillik tarixinin uğurlarından bəhs edərkən xarici siyasətin əsas tərkib hissələrindən biri olan diaspor quruculuğu prosesinə xüsusi diqqət yetirməyə böyük zərurət duyulur. Diasporun bir dövlətin xaricdə varlığı demək olduğunu nəzərə alsaq bu zərurət özü-özlüyündə açıqlanar. Müasir Azərbaycanın qurucusu, xalqımızın ümummilli lideri Heydər Əliyev çoxşaxəli siyasi fəaliyyətində daha mühüm bir tarixi missiyanı-dünyanın müxtəlif ölkələrində yaşayan soydaşlarımızın milli birliyinin ideoloqu, təbliğatçısı və təşkilatçısı kimi çətin, ancaq vacib bir vəzifəni üzərinə götürdü və daim diqqətdə saxladı.
YAP İdarə Heyətinin üzvü, Milli Məclisin vitse-spikeri Bahar Muradova da bildirib ki, dövlət müstəqilliyinin bərpasının 20-ci ildönümü olduqca mühüm tarixi hadisədir: “Bu tarixi gün təkcə respublika daxilində deyil, ölkə hüdudlarından kənarda da yüksək səviyyədə qeyd olunur. Təbii ki, ötən 20 ildə ölkəmizdə çox böyük uğurlar əldə olunub. Azərbaycan qadını isə hər zaman müstəqilliyin qorunmasında, möhkəmləndirilməsində öz vəzifəsini layiqincə yerinə yetirib. Bu yolda Azərbaycan qadınları, anaları əllərindən gələni ediblər. Müstəqilliyin ilk illərində ölkəmiz çox ağır anlar yaşayıb. Bu ağırlığın bir çox hissəsi də məhz analarımızın üzərinə düşüb. çünki müharibə şəraitində yaşayan Azərbaycanda analar öz övladlarını, torpaqlarını və müstəqilliklərini itirmək təhlükəsi ilə üz-üzə qalıblar. Hesab edirəm ki, ötən 20 ildə Azərbaycan qadını əlindən gələni etdi. Ən əsası biz öz müstəqilliyimizi qoruyub saxlamağı bacardıq”.
Türkiyənin Azərbaycandakı səfirinin xanımı Günay Kılıç da çıxışında müstəqilliyin hər bir xalqın tarixində mühüm hadisə olduğunu vurğulayıb.
Mərasimdə ötən 20 ildə əldə olunan uğurları, Ulu öndər Heydər Əliyev və Prezident İlham Əliyevin fəaliyyətini əks etdirən sənədli film də nümayiş olunub.
Bununla yanaşı, YAP-ın Sədr müavini-İcra katibi, millət vəkili Əli Əhmədovun və YAP Qadınlar Şurasının sədri Nurlana Əliyevanın iştirakı ilə bayram tortu da kəsilib.
Tədbir xalq artistləri Mübariz Tağıyev, Mələkxanım Əyyubova, əməkdar artistlər İlqar Muradov, Lalə Məmmədova, Azərinin və başqalarının iştirakı ilə maraqlı konsert proqramı ilə davam etdirilib.

Paylaş:

Baxılıb: 1100 dəfə