Sanksiyalar artırılır

Bakı:

24 °C

52 %

6 m/s

Əlaqə

AZ RU EN

Ana səhifə / Siyasət / Sanksiyalar artırılır

Sanksiyalar artırılır

04.11.2023 [10:33]

ABŞ Ermənistana niyə göz yumur?

N.BAYRAMLI

Rusiya-Ukrayna müharibəsi nəticəsində beynəlxalq münasibətlər sistemində mürəkkəb vəziyyət davam edir. Məlumdur ki, Avropa İttifaqı ilə yanaşı ABŞ Rusiyaya qarşı ciddi sanksiyalar tətbiq edib. Məqsəd Rusiyanı zəiflətmək və müharibədə Ukraynanın üstünlüyünü təmin etməkdir. Lakin Rusiya bu sanksiyalardan yayınmağa çalışır. Belə ki, bu məsələdə müxtəlif ölkələr və onların müvafiq qurumları Moskvaya yardımçı olurlar. Həmin ölkələrin Rusiyanın sanksiyalardan yayınmasına dəstək verməsi Vaşinqtonun narahatlığına səbəb olur. Bu səbəbdən ABŞ həmin ölkələrə də sanksiyalar tətbiq edib.

Belə ki, bugünlərdə ABŞ Rusiyadan olan 30 fiziki və 200-ə qədər hüquqi şəxsə, həmçinin Özbəkistanın 1 qurumuna qarşı ixrac məhdudiyyətləri qoyub. Bu barədə ABŞ Ticarət Nazirliyi məlumat yayıb. Bu strukturların Rusiya hərbi-sənaye kompleksinə, həmçinin pilotsuz uçuş aparatlarının alınmasına yardım etdiyi bildirilir. Nazirliyin məlumatına görə, bu strukturlar “ABŞ-ın milli təhlükəsizlik maraqlarına və xarici siyasətinə zidd olan hərəkətlərdə” iştirak edir. Sanksiyalara “Lanset” PUA-sının yaradılmasında iştirak edən Zaxarov, onun ailə üzvləri də daxil edilib.

ABŞ başqa ölkələrə də sanksiya xəbərdarlığı edib. Qeyd edək ki, Vaşinqtonun sözügedən sanksiya qərarı Daşkənddə Belarus-Rusiya-Qazaxıstan-Özbəkistan-Əfqanıstan-Pakistan və Rusiya-Xəzər dənizi-Türkmənistan-Özbəkistan-Qırğızıstan nəqliyyat dəhlizlərinə dair sənədlərin imzalanmasından sonra baş verib. Bu sənədlərin imzalanma mərasimi Şanxay Əməkdaşlıq Təşkilatına (ŞƏT) üzv ölkələrin Nəqliyyat Forumu çərçivəsində baş tutub. Görüşün əsas məqsədi ŞƏT ölkələrinin nəqliyyat və logistika sektorunun nümayəndələri arasında əməkdaşlığın gücləndirilməsi və səmərəli nəqliyyat dəhlizlərinin yaradılması olub. Çox güman ki, Daşkənddə imzalanan bu sənəd Özbəkistanın da ABŞ-ın sanksiyalar siyahısına düşməsinə səbəb olub.

Qeyd edək ki, sanksiyalardan yayınan ölkələrdən biri də Ermənistandır. ABŞ Ermənistana nə üçün sanksiyalar tətbiq etmir? Məsələ ilə bağlı qəzetimizə açıqlama verən politoloq Ramiz Alıyev bildirib ki, Rusiya-Ukrayna müharibəsi bir sıra mühüm məqamları, o cümlədən bəzi dövlətlərin bu müharibədən varlanmaq və gəlir əldə etmək istəklərini də ortaya çıxarır. O qeyd edib ki, Ermənistan öz dövlət büdcəsini bu müharibə sayəsində doldurmaqla məşğuldur: “Məhz bunun nəticəsidir ki, artıq Ermənistan tərəfi də faktları gizlədə bilmir. Digər dövlətlər də çox yaxşı anlayırlar ki, məhdud resursları olan, iqtisadi potensialı olmayan bir ölkənin birdən-birə yüksək iqtisadi nəticə əldə etməsi mümkünsüzdür. Bu baxımdan Ermənistanın Rusiyaya tətbiq olunan sanksiyalardan yayınaraq gəlir əldə etməsi hamı üçün bəllidir”.

Politoloq sanksiyalardan yayınan Ermənistana qarşı cəza tədbirlərinin görülmədiyini də vurğulayıb. Onun sözlərinə görə, ABŞ Maliyyə Nazirliyinin Xarici Aktivlərə Nəzarət İdarəsi (OFAC) hələ may ayında Rusiyaya dəstək verdiyi üçün 71 şirkətin adını sanksiyalar siyahısına əlavə etmişdi. Siyahıda Ermənistanın bir şirkənin adı var idi. Sanksiyalar siyahısına əlavə edilən Ermənistanın “Medisar” şirkəti sənaye və laboratoriya kimyəvi məhsullarının idxalı ilə məşğuldur.

R.Alıyev hesab edir ki, Ermənistanın bir yox, daha çox şirkəti sanksiyalara məruz qalmalıdır: “Düşünürəm ki, sanksiyalardan yayınan dövlətlərin, onlara məxsus şirkətlərin tam siyahısı ortaya qoyulmalıdır. Əgər belə olarsa, şübhəsiz ki, Ermənistan ən ön sırada olacaq. Ötən il 2021-ci illə müqayisədə Ermənistana xaricdən transferlərin həcmi 2,5 dəfə artıb və 5,2 milyard dollara çatıb. Xarici köçürmələrin ən böyük payı, təxminən 3,6 milyard dolları Rusiya Federasiyasından həyata keçirilib. Burada Ermənistanın Rusiyaya qarşı tətbiq olunan sanksiyalardan yayınması şübhəsizdir. Amma nədənsə, ABŞ Ermənistana qarşı bu əməllərinə görə sanksiya tətbiq etməyə tələsmir. Görünür, Vaşinqtonun Ermənistana “özəl” münasibəti var və bu səbəbdən də sanksiya tətbiqində də ikili standartlar, ayrı-seçkilik tətbiq edir”.

Paylaş:

Baxılıb: 808 dəfə