Amerikalı diplomat: Azərbaycanda "ərəb baharı" mümkün deyil

Bakı:

25 °C

53 %

8 m/s

Əlaqə

AZ RU EN

Ana səhifə / Siyasət / Amerikalı diplomat: Azərbaycanda "ərəb baharı" mümkün deyil

Amerikalı diplomat: Azərbaycanda "ərəb baharı" mümkün deyil

21.02.2012 [00:23]

“Azərbaycanda “ərəb baharı” mümkün deyil”. “Trend”in məlumatına görə, bunu ANS televiziya kanalına müsahibəsində ABŞ-ın Azərbaycandakı müvəqqəti işlər vəkili Adam Sterlinq bildirib.
“öncə qeyd etmək istəyirəm ki, mən Prezidentin fikirləri ilə razıyam. İki ölkəni bir-biri ilə müqayisə etmək heç də məqsədəuyğun deyil. ölkələr tarixlərinə, vəziyyətlərinə, şəraitlərinə görə bir-birindən fərqlənirlər. Mən də Azərbaycandakı vəziyyət barəsində mühakimə yürütmək üçün hər hansı bir ölkə ilə müqayisə aparmayacağam. Azərbaycandakı vəziyyətə baxdıqda görə bilərik ki, ötən 5-6 il ərzində ölkə çox böyük iqtisadi inkişaf yolu keçib. Bu da çox böyük imkanlar yaradıb, imkanların artmasına səbəb olub. Vətəndaşların öz hökumətlərinə inamı artırıb. Bununla paralel olaraq, cəmiyyətdə çox böyük müsbət dəyişikliklər baş verib. Bu, öz-özlüyündə sabitliyə gətirib çıxarır. Vətəndaşlar hökumətlərinin onlar üçün maneə, əngəl yaratmasına yox, kömək etməsinə inanırlar. Bundan başqa, keçən il Azərbaycan hökuməti çox vacib bir qanun - antikorrupsiya strategiyasını qəbul edib”, - deyə o, bildirib.
Onun sözlərinə görə, burada hökumət artıq çox gözəl şəkildə başa düşüb ki, korrupsiya halları xalqla hökuməti bir-birindən ayrı salır, onlar arasında uçurum yaradır, onları bir-birinə yadlaşdırır: “Bu, uzunmüddətli sabitlik əldə etmək, cəmiyyətin güclənməsi üçün irəliyə doğru atılmış çox mühüm siyasi addımdır. öz-özlüyündə bu fəaliyyətlər daxili demokratiyanın, iqtisadi islahatların bir hissəsidir. Hesab edirik ki, bu kimi islahatların davam etdirilməsi cəmiyyətdə uzunmüddətli sabitliyin bərqərar olması baxımından böyük əhəmiyyət kəsb edir”.
A.Sterlinq “Eurovision” mahnı müsabiqəsi ərəfəsində Azərbaycana çox yüksək səviyyədə beynəlxalq diqqət olacağını qeyd edib. O, Avropa mediası, avropalıların Azərbaycan haqqında daha çox məlumat əldə etməyə çalışacaqlarına əmin olduğunu vurğulayıb: “Hesab edirəm ki, bu, Azərbaycan üçün çox müsbət haldır. Bununla yanaşı, Azərbaycan son dövrlər dünya miqyasında meydana çıxan, müsbət mənada özünü göstərən bir ölkə olub. Buna nümunə olaraq, BMT-nin Təhlükəsizlik Şurasına qeyri-daimi üzv seçilməsi Azərbaycanın dünyanın diqqət mərkəzində olmasına səbəb olub. Bu da, əlbəttə ki, normal haldır”.
Azərbaycanın ötən 20 ildə böyük inkişaf yolu keçdiyini bildirən Sterlinq, hazırda ABŞ-Azərbaycan münasibətlərinin çox güclü, yaxşı səviyyədə olduğunu, güclü tərəfdaşlıq münasibətlərinin inkişaf etdirildiyini deyib.
Diplomat, həmçinin, ABŞ-Azərbaycan münasibətlərinə də toxunub: “ABŞ-Azərbaycan əlaqələri bu 20 il müddətində çox böyük inkişaf yolu keçib. Eyni sözləri Azərbaycanın özünə də aid etmək olar. Yəni Azərbayacan özü də ötən 20 ildə böyük inlkişaf yolu keçib. Bu iki məsələni bir-birindən ayırmaq mümkün deyil. Azərbaycan çox mürəkkəb şəraitdə 20 il öncə müstəqilliyini bərpa etdi. Bu zaman ölkə bir sıra xarici qüvvələrin təsiri altında idi, eyni zamanda silahlı münaqişəyə cəlb olunmuşdu. Belə bir məqamda ABŞ və Azərbaycan hər ikisi Azərbaycanın güclü inkişaf etmiş müstəqil dövlət olması ilə bağlı ortaq maraqları bölüşdülər. Bu məqsəd uğrunda ABŞ Azərbaycana dəstək verməyə başladı. Qeyd etməliyəm ki, hazırda ABŞ Azərbaycan münasibətləri çox güclüdür, yaxşı səviyyədədir. Azərbaycan ötən 20 il ərzində qarşıya qoyulan ortaq məqsəd istiqamətində xeyli irəliləyiş əldə edib. Bu gün Azərbaycan və ABŞ çox güclü tərəfdaşdırlar. Onlar təhlükəsizlik, enerji və daxili islahatlar sahəsində ortaq maraqları bölüşürlər”.

Paylaş:

Baxılıb: 1062 dəfə