Bu, Türkiyə-Azərbaycan birliyinin gücünü göstərdi

Bakı:

8 °C

87 %

0 m/s

Əlaqə

AZ RU EN

Ana səhifə / Siyasət / Bu, Türkiyə-Azərbaycan birliyinin gücünü göstərdi

Bu, Türkiyə-Azərbaycan birliyinin gücünü göstərdi

01.03.2012 [01:19]

Mübariz Qurbanlı: Taksimdəki aksiya Xocalı soyqırımı haqqında həqiqətlərin dünyaya çatdırılması baxımından əhəmiyyətli bir hadisə idi
“Məlum olduğu kimi, fevralın 26-da Xocalı soyqırımının 20-ci ildönümü ilə əlaqədar Bakıda Prezident İlham Əliyevin iştirakı ilə ümumxalq yürüşü keçirildi. Eyni zamanda, Azərbaycanın diaspor qurumlarının təşəbbüsü və iştirakı ilə dünyanın 30-dan çox ölkəsinin paytaxtında da bu tipli tədbirlər keçirildi. Bunların sırasında İstanbulun tarixi Taksim meydanında keçirilən aksiya öz möhtəşəmliyi ilə ən böyük tədbirlərdən biri sayılmaqdadır”.
Bunu qəzetimizə açıqlamasında Yeni Azərbaycan Partiyası (YAP) İcra katibinin müavini, millət vəkili Mübariz Qurbanlı deyib. İstanbulun dünyanın ən böyük şəhərlərindən, həmçinin, informasiya mübadiləsi mərkəzlərindən biri olduğunu deyən millət vəkili əlavə edib ki, sözügedən aksiyanın təşəbbüskarı Türkiyədəki qeyri-hökumət təşkilatları, eyni zamanda, qardaş ölkədə məskunlaşmış azərbaycanlıların qurduqları diaspor təşkilatları idi: “Qeyd edim ki, həmin tədbirdə Azərbaycandan da tanınmış bir sıra mədəniyyət və incəsənət xadimləri, o cümlədən, Milli Məclisin deputatları iştirak edirdilər. Taksim meydanında keçirilən tədbirdə Türkiyənin ictimai-siyasi palitrasının bütün mənzərəsini görə bilərdik. Orada həm Türkiyənin hakim Ədalət və İnkişaf Partiyasının (AKP), həm də müxalifətçi CHP və MHP-nin nümayəndələri iştirak edirdilər. Türkiyə Böyük Millət Məclisinin ən azından 15-ə yaxın üzvü Taksim meydanındakı tədbirə qatılmışdı. Həmçinin, Türkiyənin tanınmış sənət adamları, media nümayəndələri bu tədbirdə idilər. Türkiyədən olan dostlarımızın qeyd etdikləri kimi, Taksim meydanında toplanan insanların sayı da əvvəlki mitinqlərlə müqayisədə çox idi. Bu iştirakçılar arasında həm də Türkiyənin müxtəlif bölgələrindən gələn şəxslər var idi”.
Millət vəkili deyib ki, Taksimdə keçirilən aksiyada səsləndirilən şüarlar da özəlliyi ilə fərqlənirdi: “Bu şüarlar bir tərəfdən Xocalı soyqırımını törədənlərin cəzalandırılmasına çağırırdısa, digər tərəfdən Ermənistan-Azərbaycan, Dağlıq Qarabağ münaqişəsinin həll edilməsi ilə bağlı çağırışlar idi. Həmçinin, “Hamımız türkük”, “Hamımız xocalılıyıq” şüarları da səsləndirilirdi ki, bu şüarlar bir tərəfdən Türkiyə və Azərbaycan dostluğunu, digər tərəfdən Türk dünyasının bütövlükdə Azərbaycanın üzləşdiyi problemlərə biganə qalmadığını ifadə edirdi”.
“Bilirsiniz ki, artıq Fransanın Konstitusiya Şurası qondarma “erməni soyqırımı” ilə əlaqədar qanunu rədd edib. Qeyd edim ki, Taksim meydanında aksiya keçirilərkən bu bəlli deyildi. Amma orada da “qondarma “erməni soyqırımı”nı tanıyanlar gözünüz kor, qulağınız kardırmı, olmayanı tanımaqdansa Xocalı faciəsini tanıyın” kimi çağırışlar var idi. Taksim meydanında keçirilən möhtəşəm mitinqdə çıxışlar oldu. Onların sırasında mən Xocalıdan olan və 20 yaşı məhz fevralın 26-da tamam olan Zərifənin çıxışını xüsusi qeyd etmək istəyirəm” - deyə, millət vəkili əlavə edib.
Aksiyada Türkiyənin daxili işlər nazirinin də çıxış ediyini deyən YAP İcra katibinin müavininin sözlərinə görə, türkiyəli nazir bir daha hakimiyyətinin, hökumətinin mövqeyini aydın göstərdi və bildirdi ki, Türkiyə dövləti Azərbaycanın arxasındadır, Türkiyə bu məsələlərə biganə deyil. Təsadüfi deyil ki, Türkiyənin baş naziri Rəcəb Tayyib Ərdoğan partiyasının qrup toplantısındakı çıxışında Xocalı soyqırımına münasibət bildirdi və Xocalı soyqırımının dünyada tanıdılmasının zəruriliyini bəyan etdi.
Millət vəkili onu da qeyd edib ki, istər İstanbulunTaksim meydanında, istərsə də Türkiyənin digər bölgələrində keçirilən tədbirlər türk ictimai fikrinin bütövlükdə Azərbaycanın tərəfində olduğunu bir daha nümayiş etdirdi: “Eyni zamanda, bu, Xocalı soyqırımı haqqında həqiqətlərin dünyaya çatdırılması baxımından əhəmiyyətli bir hadisə idi. Bu aksiya, həmçinin Türkiyə-Azərbaycan birliyinin gücünü göstərdi”.
Sevinc

Paylaş:

Baxılıb: 925 dəfə