"Azərbaycan Qafqazlardakı Avropa"

Bakı:

8 °C

93 %

0 m/s

Əlaqə

AZ RU EN

Ana səhifə / Siyasət / "Azərbaycan Qafqazlardakı Avropa"

"Azərbaycan Qafqazlardakı Avropa"

08.03.2012 [23:43]

Yeni Azərbaycan Partiyasının təşəbbüsü ilə Nizami kinoteatrında bu filmin təqdimat mərasimi keçirilib
Dünən Yeni Azərbaycan Partiyasının (YAP) təşəbbüsü ilə Nizami kinoteatrında Azərbaycan Respublikasının müstəqilliyinin bərpa olunmasının 20 illiyinə və ölkə Prezidenti İlham Əliyevin 50 illik yubileyinə həsr olunmuş “Azərbaycan Qafqazlardakı Avropa” filminin təqdimat mərasimi keçirilib.
Mərasimdə çıxış edən YAP Sədrinin müavini-İcra katibi, millət vəkili Əli Əhmədov bildirib ki, Azərbaycan müstəqillik illərində böyük inkişaf yolu keçib. Onun sözlərinə görə, təqdim olunan film ölkəmizdə həyata keçirilən islahatlar və bu islahatların dövlətimiz, insanlarımız üçün bəxş etdiyi nemətlər barəsindədir: “Hər bir ölkədə həyata keçirilən islahatlar, reallaşan siyasət ilk növbədə insanlar üçün rifah, əmin-amanlıq yaradır. ölkə vətəndaşlarının bu islahatlar haqqında, hökumətin fəaliyyəti barəsində münasibəti onların simasında ifadə olunur. Bu filmə baxanda isə Bakı şəhərinin küçələrində məmnunluq hissi üzündə ifadə olunan insanları görəcək və bunu dövlətimizin həyata keçirdiyi siyasətə insanların bu formada qiymət verməsi kimi qəbul edəcəksiniz”.
ölkəmizin sürətlə inkişaf etdiyini, yeniləşdiyini və müasirləşdiyini deyən YAP Sədrinin müavini qeyd edib ki, Azərbaycan dünyaya yeni bir möcüzə kimi təqdim olunmağa başlayıb. “Heydər Əliyevin peyğəmbərcəsinə söylədiyi “Azərbaycan bütün dünyaya günəş kimi doğacaq” fikrini xatırlatmaq istəyirəm. Bu gün Azərbaycan dünyaya günəş kimi doğur. Artıq bütün dünya Azərbaycanın timsalında yeni bir möcüzənin yarandığını müşahidə etməkdədir. Bu film təbii ki, ölkəmizdə bu möcüzəni yaradan siyasət və bu siyasəti həyata keçirən lider barəsindədir. Heç şübhəsiz, həm Azərbaycan vətəndaşları, həm də ölkəmizlə maraqlanan xarici dövlətlərin vətəndaşları aydın dərk edir və dəyərləndirirlər ki, ölkəmizdə əldə olunan bütün nailiyyətlər Ulu öndər Heydər Əliyevin əsasını qoyduğu və bu gün Prezident İlham Əliyev tərəfindən həyata keçirilən siyasətlə bağlıdır. Bu siyasət təkcə Azərbaycanın keçmişi və bu günü deyil, həm də sabahıdır. Yəni bu siyasət Azərbaycanın dünyaya günəş kimi doğması prosesini özündə ehtiva edən bir reallıq və həqiqətdir. Bu film həm də Azərbaycanın liderinin həyata keçirdiyi siyasətin nailiyyətləri haqqındadır”, - deyə Əli Əhmədov vurğulayıb. Onun sözlərinə görə, Azərbaycanı müxtəlif zamanlarda Avropaya bənzətməyə çalışıblar. Kimlərsə vaxtilə Azərbaycanı Şərqin Avropaya açılan pəncərəsi və ya Avropanın Şərqə açılan pəncərəsi hesab edib. “Yəni müxtəlif formalarda bu müqayiəsələr aparılıb. Hesab edirəm ki, burada bir məntiq var. Müəlliflərin bu filmə “Azərbaycan Qafqazlardakı Avropa” adını qoyması da təsadüfi deyil. Bu gün reallıq belədir ki, Azərbaycanı, bəzi coğrafiyaları da Avropa ilə müqayisə edirlər. Amma güman edirəm ki, formalaşan Azərbaycan möcüzəsi imkan verəcək ki, nə zamansa Avropanı digər coğrafiyalara bənzətsinlər. Yəqin ki, bu prosesdə istinad etalonu kimi götürülən coğrafiyaların arasında Azərbaycanın da adı olacaq. Bu gün həyata keçirilən siyasət, əldə olunan nailiyyətlər həmin günün gələcəyinə böyük inam formalaşdırır”, - deyə Əli Əhmədov qeyd edib.
Azərbaycan Prezidenti Administrasiyasının Xarici əlaqələr şöbəsinin müdiri Novruz Məmmədov isə filmdə Azərbaycan tarixinin iki böyük şəxsiyyətinin fəaliyyətinin geniş əks olunduğunu bildirib. “Biz çox xoşbəxtik ki, bu filmin müasirləriyik. Bütün proseslər, qazanılan nailiyyətlər gözümüzün qarşısında baş verib. Film həm də ona görə əhəmiyyətlidir ki, gələcək nəsillər ölkəmizdə həyata keçirilən siyasətin uğurları barədə kifayət qədər məlumat əldə edə biləcəklər”, - deyən N.Məmmədov belə filmlərin yaradılmasına bundan sonra da ehtiyacın olduğunu vurğulayıb. O filmin hazırlanmasında zəhməti olan Azərbaycan və Türkiyə nümayəndələrinə minnətdarlığını bildirib.
Filmin müəlliflərindən olan Midhət Bərəkət Azərbaycanın son illər sürətlə inkişaf etdiyi vurğulayıb. Onun sözlərinə görə, bu inkişaf böyük vüsət almaqdadır. “Kənardan baxanda Azərbaycanın sürətli inkişafı daha aydın görünür. Biz filmdə həmin inkişafı real şəkildə ifadə etməyə çalışmışıq”, - deyən türkiyəli qonaq xaricdə, o cümlədən Avropada da Azərbaycanın uğurları ilə yaxından maraqlananların olduğunu qeyd edib. İnkişaf baxımından Azərbaycanın Qafqazın Avropası olduğunu deyən M.Bərəkət ölkəmizin gələcəkdə daha böyük nailiyyətlər qazanacağına inandığını bildirib.
Daha sonra mərasim iştirakçıları “Azərbaycan Qafqazlardakı Avropa” filminə tamaşa ediblər.

Paylaş:

Baxılıb: 936 dəfə