Qarabağda saxta “erməni irsi”...

Bakı:

14 °C

88 %

5 m/s

Əlaqə

AZ RU EN

Ana səhifə / Siyasət / Qarabağda saxta “erməni irsi”...

Qarabağda saxta “erməni irsi”...

27.12.2023 [10:10]

İcma: UNESCO-nun fakt-araşdırıcı missiyası xalqımızın zəngin mədəni irsinin monitorinqi məqsədilə məhz Ermənistana göndərilməlidir

NARDAR

Ermənistanın hərbi təcavüzü nəticəsində 30 il müdətində təkcə torpaqlarımız işğal edilməyib, eyni zamanda, Azərbaycan xalqına məxsus çoxəsrlik qədim tarixi-dini abidələr dağıdılaraq yerlə-yeksan edilib, onların bir qismi isə saxtalaşdırılıb. Təcavüzkar dövlətin bu cür vandal əməllərə əl atmaqda əsas məqsədi xalqımızın minilliklər ərzində yaşadığı torpaqlarda həm tarixi keçmişimizi, həm də mənəvi yaddaşımızı məhv etmək olub. Bütövlükdə, 200 ildən artıq müddətdə Azərbaycan xalqına qarşı davam etmiş erməni təcavüzünün qurbanları həm də tarixi-dini abidələr, müqəddəs ocaqlar və məbədlərdir.

Bütün bunların fonunda nə qədər paradoksal olsa da, Ermənistan Xarici İşlər Nazirliyi Azərbaycanı “erməni mədəni irsini” məhv etməkdə ittiham etməyə çalışır. Belə ki, Ermənistanın xarici işlər nazirinin müavini Vahe Gevorkyan Tehranda keçirilən Qədim sivilizasiyalar Forumunun 7-ci nazirlər görüşündə çıxışı zamanı Azərbaycana qarşı əsassız iddialar səsləndirib. Gevorqyan guya Qarabağda “erməni mədəni-tarixi irsinin məhv edilməsinin qarşısını almaq üçün UNESCO-nun texniki missiyasının təcili həyata keçirilməsinin zəruriliyi olduğunu” deyib. Burada “Oğru elə bağırdı ki, doğrunun bağrı yarıldı” atalar sözü yada düşür.

Məsələ ilə bağlı Qərbi Azərbaycan İcmasının açıqlamasında Ermənistan Xarici İşlər Nazirliyinin iki ölkə arasında sülhün bərqərar olmasına qarşı çıxmaqda davam etdiyi bildirilir: “Azərbaycanı “etnik təmizləmə”də günahlandıran Ermənistan xarici işlər nazirinin müavini “erməni mədəni irsi” ilə bağlı Qarabağa UNESCO missiyasının göndərilməsinə dair çağırış edib. İlk növbədə, vurğulamaq istərdik ki, təxminən 30 illik bir dövrdə işğal edilmiş torpaqlarda Azərbaycan xalqının mədəni irsini dağıdan, təhqir edən və UNESCO missiyasının həmin ərazilərə göndərilməsinə mane olan Ermənistan olub. İcma hesab edir ki, UNESCO-nun fakt-araşdırıcı missiyası əsrlər boyu Azərbaycan xalqının yaratdığı zəngin mədəni irsin monitorinqi məqsədilə məhz Ermənistana göndərilməlidir. “Qərbi Azərbaycan İcması bu məsələni dəfələrlə qaldırıb. Lakin Ermənistan nəinki UNESCO missiyasına imkan vermir, hətta Azərbaycan xalqının mədəni irsinin mövcudluğunu belə danır. Ermənistan diplomatiyası riyakarlığa və destruktiv fəaliyyətə son qoymalıdır”, - deyə açıqlamada vurğulanıb.

Yeri gəlmişkən, Birləşmiş Millətlər Təşkilatının (BMT) Elm, Təhsil və Mədəniyyət üzrə ixtisaslaşmış qurumu olan UNESCO Azərbaycanın erməni işğalında olmuş ərazilərinə hələ də missiya göndərməyib. Üç ilə yaxındır ki, torpaqlarımız erməni işğalından azad olunub, ərazi bütövlüyümüz təmin edilib. Belə olan halda Azərbaycanın müraciətlərinə baxmayaraq, UNESCO-nun hələ də ermənilər tərəfindən viran edilmiş ərazilərimizə missiya göndərməməsi suallar doğurur. UNESCO-nun proqramında qeyd olunan əsas məqsədi elm, təhsil və mədəniyyət sahələri üzrə xalqların əməkdaşlığını genişləndirmək yolu ilə sülhün və təhlükəsizliyin möhkəmlənməsinə töhfə verməkdir. Təəssüf ki, bəzi hallarda təşkilat öz proqram məqsədlərinə uyğun davranışlar nümayiş etdirmir. Azərbaycan hələ 44 günlük müharibədən əvvəlki mərhələdə işğal altına düşən ərazilərimizdəki mədəni-dini irs nümunələrinin ermənilər tərəfindən dağıdılması, özününküləşdirilməsi və yaxud təhqirlərə məruz qalması barədə UNESCO-nu mütəmadi qaydada məlumatlandırıb. Ancaq UNESCO tərəfindən bununla bağlı heç bir addım atılmayıb. Qurum ötən 30 ildə respublikamızın çoxsaylı çağırışlarına rəğmən, mədəni irsimizə dəyən ziyanın dəyərləndirilməsi məqsədilə işğal olunmuş ərazilərə missiya göndərməyib.

Müharibədən əvvəl UNESCO bəhs olunan ərazilərə missiya göndərməməsini siyasətə qarışmaması ilə əlaqələndirirdi. Eyni zamanda, işğalçı Ermənistan buna mane olurdu. Ancaq müharibədən sonra qurumun mövqeyində birdən-birə dəyişiklik müşahidə olundu. Belə ki, UNESCO-nun bəzi rəhbər şəxsləri Ermənistanın Azərbaycanın işğaldan azad etdiyi ərazilərdəki xristian abidələrini guya dağıtması ilə bağlı iddialarına cavab olaraq öz missiyalarını regiona göndərməyə hazır olduqlarını bildirmişdilər. Təşkilat rəsmilərinin Ermənistanın müraciətinə belə çevik reaksiya verməsi cəmiyyətimizdə haqlı etiraz doğurdu. Azərbaycan missiyanın regiona gəlib obyektiv araşdırma aparmasına tərəfdardır və bununla bağlı mövqeyini UNESCO-ya çatdırıb. Lakin görünən odur ki, təşkilat rəsmiləri yalnız ermənilərin marağına uyğun missiya təşkil etmək istəyində idilər. Azərbaycan isə buna heç vaxt razı deyil.

Onu da qeyd edək ki, bugünlərdə Bakıda keçirilmiş “Mədəni irs” Forumunda məlumat verilib ki, Qarabağ və Şərqi Zəngəzurda 705 tarix və mədəniyyət abidəsi dövlət qeydiyyatına alınıb. İşğal dövründə mədəniyyət abidələri məqsədli şəkildə dağıdılıb, vandalizmə məruz qalıb, 47 abidə yer üzündən tamamilə silinib. 2020-2022-ci illərdə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən 433 tarix-mədəniyyət abidəsinə baxış keçirilib, eləcə də həmin ərazilərdə yerləşən dövlət qeydiyyatında olmayan tarixi, memarlıq, arxeoloji əlamət daşıyan 182 obyektin - yeni aşkar olunmuş abidənin monitorinqi aparılıb.

Bütün bunlar erməni vandalizminin sadəcə bir hissəsidir. Bütün bunların fonunda rəsmi İrəvan həm indiki Ermənistan ərazisində, həm də 30 il işğal altında saxladığı ərazilərimizdə azərbaycanlılara məxsus tarixi-mədəni və dini irsinın məhv edilməsinə görə cavab verməlidir. UNESCO isə beynəlxalq qurum olaraq bu barədə həqiqətləri öz hesabatlarına daxil etməlidir.

Paylaş:

Baxılıb: 561 dəfə