Zəngəzur mahalında yerləşən Nüvədi kəndindən əhalinin deportasiya edilməsinin 34-cü ildönümü ilə bağlı tədbir keçirilib

Bakı:

12 °C

94 %

5 m/s

AZ RU EN

Ana səhifə / Sosial / Zəngəzur mahalında yerləşən Nüvədi kəndindən əhalinin deportasiya edilməsinin 34-cü ildönümü ilə bağlı tədbir keçirilib

Zəngəzur mahalında yerləşən Nüvədi kəndindən əhalinin deportasiya edilməsinin 34-cü ildönümü ilə bağlı tədbir keçirilib

07.08.2025 [17:37]

Gəncə şəhərində Zəngəzur mahalının Mığrı (Meğri) rayonunun Nüvədi kəndindən əhalinin deportasiya olunmasının 34-cü ildönümü ilə bağlı anım tədbiri təşkil olunub.

AZƏRTAC-ın bölgə müxbirinin verdiyi məlumata görə, tədbir Qərbi Azərbaycan İcmasının Gəncə nümayəndəliyinin, Mığrı rayon və Nüvədi kənd icmasının və Gəncə üzrə Mığrı bölməsinin birgə təşkilatçılığı ilə Yeni Azərbaycan Partiyası Gəncə şəhər təşkilatının binasında keçirilib.

İlk olaraq, Ulu Öndər Heydər Əliyevin büstü önünə gül dəstələri düzülüb. Sonra Dövlət Himni səsləndirilib, Ümummilli Lider Heydər Əliyevin, Qərbi Azərbaycandan deportasiya zamanı həyatını itirən soydaşlarımızın və ölkəmizin suverenliyi və ərazi bütövlüyü uğrunda həlak olan şəhidlərimizin xatirəsi bir dəqiqəlik sükutla yad edilib.

Ardınca Nüvədi kəndinin keçmişinə və deportasiya dövrünə həsr olunmuş videoçarx nümayiş etdirilib.

Qərbi Azərbaycan İcmasının Müşahidə Şurasının üzvü, Meğri rayon icmasının sədri, akademik Fikrət Əliyev vurğulayıb ki, əzəli sakinlərinin sonuncu deportasiyasına qədər ərazisi 270 kvadratkilometr olmuş Nüvədi kəndi Mığri rayonunun ərazisinin təxminən 40 faizini əhatə edib. 1979-cu ilin statistikasına görə, kəndin əhalisinin sayı 1700 nəfər olub. “1906-cı ildə ermənilərin hücumuna məruz qalan nüvədililər 1909-cu ildə viran qalmış kəndə qayıdıb, onu bərpa edərək yenidən yaşamağa başlayıblar. Bu qırğın və talan 1918-ci ildə də təkrarlanıb. Qərbi azərbaycanlıların öz dədə-baba yurdlarından sonuncu deportasiyası zamanı da kənd camaatı 1991-ci ilə qədər öz dədə-baba yurdundan didərgin düşməmək üçün müqavimət göstərib. Evlərindən qovulan Nüvədi camaatı Zəngilanın Vejnəli kəndinin yaxınlığında çadırlarda məskunlaşıb. Məhz Ulu Öndər Heydər Əliyevin tapşırığı ilə nüvədililərə Naxçıvandan mütəmadi olaraq yardımlar göndərilib”, - deyə F. Əliyev diqqətə çatdırıb.

Çıxışlarda belə tədbirlərin tarixi yaddaşın qorunması və gələcək nəsillərə ötürülməsi baxımından mühüm əhəmiyyət daşıdığı qeyd olunub. 12 yaşlı Fatimə Vəliyevanın öz duyğularını bölüşərək, dədə-babalarının yurduna qayıdış istəyi və inamını dilə gətirməsi tədbirə dərin emosional çalarlar qatıb. Nüvədililər öz əzəli yurdlarına təhlükəsiz və ləyaqətli qayıdışın uzaqda olmadığına əminlik ifadə ediblər.

Paylaş:

Baxılıb: 485 dəfə