Rəqəmsal dövrün qoruyucuları...

Bakı:

14°C

77%

3m/s

Əlaqə

AZ RU EN

Ana səhifə / Sosial / Rəqəmsal dövrün qoruyucuları...

Rəqəmsal dövrün qoruyucuları...

26.09.2025 [08:32]

İnformasiya təhlükəsizliyi mühafizəçilərinin bayramıdır

Texnologiyanın sürətlə inkişaf etdiyi bir dövrdə informasiya mühiti açıq və əlçatan olduğu kimi, bir o qədər də təhlükəli və risklidir. İnformasiya müharibələri, kiberhücumlar və rəqəmsal casusluq kimi təhdidlərə qarşı ölkənin təhlükəsizliyini qorumaq, yalnız bir neçə peşəkarın deyil, hər birimizin məsuliyyətidir. Məhz bu səbəbdən Xüsusi Rabitə və İnformasiya Təhlükəsizliyi Dövlət Xidməti (XRİTDX) əməkdaşlarının da fəaliyyətini xüsusilə vurğulamalıyıq.

Bu gün peşəkar, etibarlı və güvənli şəkildə işləyən XRİTDX əməkdaşlarının peşə bayramıdır. Ölkə başçısı bayramın təsis olunmasına dair 2024-cü il 24 sentyabr tarixli Sərəncam imzalayıb.

Elektron müharibə və kibertəhlükəsizlik

Xatırladaq ki, İkinci Qarabağ müharibəsi zamanı XRİTDX əməkdaşlarının əməyi müxtəlif istiqamətlərdə özünü göstərib. Müharibə zamanı rabitə xətləri və məlumat ötürülməsi çox vacib idi. XRİTDX Azərbaycanın hərbi və mülki rabitə sistemlərini qorumaq və onların fəaliyyətini təmin etmək üçün mühüm tədbirlər görmüşdü. Müharibə zamanı düşmənin rabitə infrastrukturuna qarşı hücumların qarşısını almaq, Azərbaycanın informasiya infrastrukturunu davamlı saxlamaq böyük əhəmiyyət daşıyırdı.

Müharibə dövründə Ermənistanın kiber hücumları ilə qarşılaşan Azərbaycan bu hücumları dəf etmək üçün müasir texnologiyalar tətbiq etmişdi. XRİTDX informasiya təhlükəsizliyi sahəsində Azərbaycan Ordusunun və digər dövlət qurumlarının kibertəhlükəsizliyini qorumaqla yanaşı, düşmənin kiber hücumlarına qarşı müqavimət göstərmişdi.

Peşəkarlıqdan üstün vətənpərvərlik

Şübhəsiz ki, Xüsusi Rabitə və İnformasiya Təhlükəsizliyi Dövlət Xidməti informasiya ehtiyaclarımızı təmin edən, dövlətimizin informasiya təhlükəsizliyini qoruyan bir qurumdur. İstər rəqəmsal hücumlara qarşı, istərsə də milli maraqların qorunması naminə bu xidmətin əməkdaşları hər gün çox çətin, lakin bir o qədər də şərəfli vəzifələrdə çalışırlar. Bir çoxu sadəcə “kibertəhlükəsizlik mütəxəssisi” və ya “rabitə mühəndisi” olaraq adlandırılsa da, əslində onlar Vətənin görünməyən qəhrəmanlarıdır.

Bu xidmətin fəaliyyət sahəsi yalnız texnoloji alətlər və şəbəkə qurğuları ilə məhdudlaşmır. Onlar həmçinin ölkənin siyasi, iqtisadi və sosial sabitliyinə də birbaşa təsir edən mühüm bir sahədə fəaliyyət göstərirlər. İnformasiyanın qorunması, yanlış məlumatların yayılmasının qarşısının alınması və milli maraqların qlobal müstəvidə müdafiəsi bu xidmətin gündəlik fəaliyyətinin əsasını təşkil edir.

Yalan məlumatların qarşısının alınması

Eyni zamanda müharibə zamanı sosial mediada və digər informasiya kanallarında çoxsaylı yalan və təhrif olunmuş məlumatlar yayılmağa başlamışdı. XRİTDX bu məlumatları izləyərək müvafiq tədbirlər gördü, yalan məlumatların yayılmasının qarşısını almağa çalışdı. Bu, xüsusilə əhali arasında çaşqınlığın yaranmaması və düşmənin psixoloji müharibə aparmaq məqsədilə yaydığı təhrif olunmuş məlumatların təsirinin azaldılması baxımından önəmli idi.

Əlamətdar gündə yalnız XRİTDX əməkdaşlarının mükafatlarını, uğurlarını qeyd etmək kifayət deyil. Onların göstərdikləri fədakarlıq, həyatlarını təhlükəsizliyin qorunmasına həsr etmələri hər bir vətəndaş üçün nümunə olmalıdır. Hər gün, hər an müxtəlif təhdidlərlə üzləşən, amma nə olursa olsun Vətəninə xidmət etməkdən yorulmayan bu insanlara minnətdarlığımızı ifadə etmək, sadəcə bir bayram günü deyil, hər gün üzərimizə düşən bir borcdur. Onların əməyi yalnız bir sektorun və ya xidmətin uğuru deyil, həm də Azərbaycanın ümumi təhlükəsizlik sisteminin qələbəsidir.

Yeganə BAYRAMOVA

Paylaş:

Baxılıb: 207 dəfə