Metronun “28 May” və “Cəfər Cabbarlı” stansiyalarını birləşdirən tunelin inşasının I mərhələsi başa çatıb

Bakı:

20 °C

47 %

1 m/s

AZ RU EN

Ana səhifə / Sosial / Metronun “28 May” və “Cəfər Cabbarlı” stansiyalarını birləşdirən tunelin inşasının I mərhələsi başa çatıb

Metronun “28 May” və “Cəfər Cabbarlı” stansiyalarını birləşdirən tunelin inşasının I mərhələsi başa çatıb

08.04.2026 [11:54]

“Bakı Metropoliteni” QSC tərəfindən “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində xətlərin ayrılması layihəsi üzrə metronun “28 May” və “Cəfər Cabbarlı” stansiyalarını birləşdirəcək yeni piyada keçidinin inşası həyata keçirilir.

AZƏRTAC xəbər verir ki, keçidin inşası üçün qazıntı işləri və metal konstruksiyalı tunelin quraşdırılması tamamlanıb.

Hazırda “28 May” stansiyasının platforması ilə birləşmə hissəsində işlər davam etdirilir. Paralel olaraq, üç hissədən ibarət pilləkənlərdə metal karkasın qurulması başa çatdırılıb, betonlama işlərinə hazırlıq görülür. Yekunda üzləmə işləri aparılacaq piyada keçidinin yeni tədris mövsümünədək istifadəyə verilməsi planlaşdırılır.

Bununla yanaşı, xətlərin ayrılması layihəsinin əsas elementlərindən biri olan “Cəfər Cabbarlı–Nizami” mənzilini birləşdirəcək, uzunluğu 200 metrə yaxın tunelin inşasının birinci mərhələsi yekunlaşıb. Görülən işlər çərçivəsində “28 May” stansiyası ətrafında – Süleyman Rəhimov və Mirəli Qaşqay küçələrinin kəsişməsində yerləşən avtomobil parklanma zonasında, eləcə də “Cəfər Cabbarlı” stansiyası yaxınlığında iki hazırlıq şaxtası qazılıb. Bu şaxtalar tikinti prosesinin təşkili, texnika və materialların sahəyə çatdırılması üçün nəzərdə tutulub.

Eyni zamanda, “Cəfər Cabbarlı” stansiyasından əsas tunel sahəsinə qədər olan iki yanaşma sahəsinin tikintisi də tamamlanıb. Tikinti işləri mürəkkəb geoloji şərait nəzərə alınmaqla Yeni Avstriya üsulu ilə aparılır ki, bu da yüksək texniki təhlükəsizlik səviyyəsini təmin edir.

Layihənin icrası yerüstü nəqliyyatın, o cümlədən avtobusların, dəmiryol vağzalının, həmçinin “28 May” və “Cəfər Cabbarlı” stansiyalarının fəaliyyətinə maneə yaratmır. Ərazidə piyadaların təhlükəsiz hərəkəti üçün bütün zəruri şərait təmin olunub.

Tunelin tikintisi başa çatana qədər qatarların hərəkəti “İçərişəhər–Əhmədli” (habelə “Əhmədli–Həzi Aslanov” məkik hərəkəti), “Dərnəgül–Nizami” və “Cəfər Cabbarlı–Xətai” istiqamətləri üzrə təşkil ediləcək. Növbəti mərhələdə sərnişinlərin “28 May” və “Nizami” stansiyaları arasında yerüstü nəqliyyatdan istifadə etməsi nəzərdə tutulur.

Tunelin inşasının “Dərnəgül” elektrik deposunun birinci mərhələsi başa çatdıqdan sonra 11 ay ərzində yekunlaşdırılması planlaşdırılır. Bütün zəruri avadanlıq və sistemlərin quraşdırılması tamamlandıqdan sonra isə “Qırmızı” (“İçərişəhər–Həzi Aslanov”) və “Yaşıl” (“Dərnəgül–Xətai”) xətlərin tam müstəqil fəaliyyəti təmin olunacaq.

Gələcəkdə sərnişinlər “Yaşıl” və “Qırmızı” xətlər arasında keçid üçün “28 May–Cəfər Cabbarlı” piyada keçidindən istifadə edəcəklər.

Paylaş:

Baxılıb: 382 dəfə