“KİV-də və sosial mediada qadın mövzusu” adlı tədbir keçirilib

Bakı:

14°C

77%

2m/s

Əlaqə

AZ RU EN

Ana səhifə / Sosial / “KİV-də və sosial mediada qadın mövzusu” adlı tədbir keçirilib

“KİV-də və sosial mediada qadın mövzusu” adlı tədbir keçirilib

26.08.2015 [10:08]

Aynur Camalqızı: Azərbaycanda qadın hüquqlarının təmin edilməsi istiqamətində məqsədyönlü işlər görülür
Dünən Azərbaycan Respublikası Prezidenti yanında QHT-lərə Dövlət Dəstəyi Şurasının və Qadın Konsensus Mərkəzi İctimai Birliyinin birgə təşkilatçılığı ilə “Qadınların nüfuz və səlahiyyətlərinin artırılması sahəsində ictimai maarifləndirmə və ictimai dinləmələrin təşkili” layihəsi çərçivəsində növbəti tədbir keçirilib. Tədbirdə Mətbuat Şurasının İdarə Heyətinin üzvləri ilə yanaşı, KİV və QHT nümayəndələri də iştirak ediblər.
Tədbiri giriş sözü ilə açan Qadın Konsensus Mərkəzinin sədri Aynur Camalqızı layihə barədə ətraflı məlumat verərək bu cür ictimai maarifləndirmə və ictimai dinləmələrin ölkədə qadınların inkişafına təkan verdiyini, eyni zamanda, köhnədən qalmış stereotip və yanaşmaların aradan qaldırılmasına şərait yaratdığını bildirib. O, eyni zamanda, son vaxtlar qadınlara qarşı zorakılıqla bağlı mövzuların KİV və sosial mediada çox geniş işıqlandırıldığını, KİV və sosial medianın bu cür xəbərləri yaymağa həddən ziyadə meyilli olduğunu da bildirib: “Qadın ərini bıçaqladı”, “qadın özünü yandırdı” tipli kriminal məlumatları yaymalıyıqmı, məişət zəminində baş verən bu problemlər ictimaiyyətə çatdırılmalıdırmı? Düşündük ki, bunu jurnalistlərlə, QHT və aktiv sosial media nümayəndələri, bloggerlərlə birgə müzakirə edə bilərik. Qadın mövzusuna hansı rakursdan yanaşmalıyıq ki, ən doğru seçimi edə bilək?”
Aynur Camalqızı, eyni zamanda, Azərbaycanda qadın hüquqlarının təmin edilməsi istiqamətində, eləcə də, qadınların imkanlarının gücləndirilməsi sahəsində məqsədyönlü işlərin həyata keçirildiyini deyib. O, bu sahənin daim dövlətin diqqət mərkəzində saxlanıldığını və bu istiqamətdə dövlətin ayırdığı maliyyə vəsaitinin mütəmadi olaraq artdığını bildirib: “Azərbaycan cəmiyyəti üçün bu gün belə layihələrin həyata keçirilməsi olduqca vacibdir. Tədbiri keçirməkdə də məqsədimiz bu sahədə cəmiyyətimizi maarifləndirməkdir. Bilirsiniz ki, bu gün qadınlarımızın istər hüquqlarının istərsə də, səlahiyyətlərinin artırılması istiqamətində dövlətimiz tərəfindən çox mühüm işlər həyata keçirilir. Məsələn, vəzifəli qadınların sayı durmadan artır”.
O, qadınlarımızın hüquqlarının qorunması sahəsində də Azərbaycanda mükəmməl sistemin yaradıldığını bildirib: “Bütün bunlar qadınların nüfuz və səlahiyyətlərinin artırılması sahəsində dövlətimizin həyata keçirdiyi işlərdən xəbər verir”.
Daha sonra çıxış edənlər müasir cəmiyyətdə qadının həyata keçirdiyi funksiyaların tək mətbəx, ailə, uşaq böyüdüb tərbiyə etməklə bitmədiyini, eyni zamanda, cəmiyyətin qadına çoxsaylı əlavə statuslar verdiyini də bildiriblər. Çıxışlarda, həmçinin, bu gün qadınlarımızın istər cəmiyyətdə, istərsə də, dövlətimizin idarə edilməsində müstəsna rolundan da danışılıb. Tədbirdə KİV-də qadınlarla bağlı problemlərin işıqlandırılması məsələsinə də toxunulub. Daha sonra tədbir jurnalistlərin fikir mübadiləsi ilə davam etdirilib.
Vüsalə CAVANŞİR

Paylaş:

Baxılıb: 673 dəfə