Bakı Mühəndislik Universitetində 15 İyun - Milli Qurtuluş Günü münasibəti ilə tədbir keçirilib

Bakı:

10 °C

93 %

2 m/s

Əlaqə

AZ RU EN

Ana səhifə / Sosial / Bakı Mühəndislik Universitetində 15 İyun - Milli Qurtuluş Günü münasibəti ilə tədbir keçirilib

Bakı Mühəndislik Universitetində 15 İyun - Milli Qurtuluş Günü münasibəti ilə tədbir keçirilib

14.06.2017 [10:06]

Bakı Mühəndislik Universitetində 15 İyun - Milli Qurtuluş Günü münasibəti ilə tədbir keçirilib. Tədbirdə universitet kollektivi ilə yanaşı millət vəkili, “Yeni Azərbaycan” qəzetinin baş redaktoru, siyasi elmlər doktoru Hikmət Babaoğlu da iştirak edib. Dövlət himninin oxunmasından sonra başlayan tədbirdə Ümummilli liderimiz Heydər Əliyevin həyat və fəaliyyətindən bəhs edən film nümayiş etdirilib.
Tədbirdə çıxış edən universitetin rektoru, professor Havar Məmmədov bildirib ki, 1993-cü il iyunun 15-i Azərbaycan tarixinə Milli Qurtuluş Günü kimi daxil olub: “Xalqın təkidli tələbi ilə ikinci dəfə hakimiyyətə qayıdan Heydər Əliyev iyunun 15-də Azərbaycan Ali Sovetinin Sədri seçildi. Ulu öndər böyük risklərə baxmayaraq, ölkəmizin xilaskarlıq missiyasını cəsarətlə öz üzərinə götürdü. Bununla da Azərbaycanda davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. Beləliklə, bu mühüm tarixi gün xalqımızın yaddaşına Milli Qurtuluş Günü kimi daxil oldu. 1997-ci ildən etibarən isə parlamentin qərarı ilə rəsmi bayram kimi qeyd olunur”.
Rektor deyib ki, Milli Məclisin 1993-cü il iyunun 15-də keçirilən iclasındakı çıxışında Ulu öndər Azərbaycan dövlətçiliyinin gələcək inkişaf strategiyasını elan etdi və sonrakı illərdə onu həyata keçirdi: “Əgər müstəqilliyi qazanmaq ilkin şərt idisə, ikinci vacib məsələ onu qoruyub inkişaf etdirmək idi və bu, Ümummilli liderin iradəsi sayəsində reallığa çevrildi. Ulu öndər Heydər Əliyev milli dövlətçiliyimizin konsepsiyasını yaratdı. Bütün maneələrə baxmayaraq ən qısa müddətdə ölkədə ictimai-siyasi sabitlik bərpa olundu. Ümummilli lider Heydər Əliyevin 1993-cü il iyunun 15-də Azərbaycanda hakimiyyətə qayıdışı dövlətçilik tariximizin şanlı səhifəsini təşkil edir. Qədirbilən xalqımız böyük xilaskarının xidmətlərini unutmur və 15 İyun - Milli Qurtuluş Gününü hər il yüksək əhval-ruhiyyə ilə qeyd edir”.
“Eyni zamanda, bu gün də möhtərəm Prezidentimiz İlham Əliyevin rəhbərliyi ilə milli qurtuluş ideologiyasının təntənəsi müstəqil respublikamızın davamlı inkişafında özünü büruzə verir, regionda və dünyada Azərbaycanın nüfuzu daha da artır. Milli qurtuluş fəlsəfəsi, sözün geniş mənasında Azərbaycanın mövcudluğunu, onun ən böyük tarixi nailiyyəti olan müstəqilliyini təmin etdi”, - deyə rektor əlavə edib.
Sonra çıxış edən “Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu bildirib ki, tariximizə Milli Qurtuluş Günü kimi daxil olmuş 15 iyun sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. Onun sözlərinə görə, Ümummilli lider Heydər Əliyevin 1993-cü il iyunun 15-də xalqın təkidli tələbi ilə yenidən hakimiyyətə qayıtması xalqımızın çoxəsrlik tarixinə taleyüklü möhtəşəm siyasi hadisə kimi daxil oldu. Millət vəkili qeyd edib ki, Ulu öndər Heydər Əliyev tarix baxımından çox qısa bir müddətdə milli dövlətçiliyin sarsılmaz əsaslarını yaratmağa, Azərbaycanın müstəqilliyinin əbədi və dönməz xarakter almasına nail oldu: “Ümummilli lider Heydər Əliyevin yenidən hakimiyyətə gəlməsi xalqın nicatına yol açdı, Azərbaycan parçalanmaq və vətəndaş müharibəsi təhlükəsindən qurtularaq güclü bir dövlətə çevrildi. Bu günün mənası təkcə ölkənin xaos və anarxiyadan xilas edilməsi, xarici və daxili düşmənlərin Azərbaycanı parçalamaq, müstəqil dövlətimizi məhv etmək niyyətlərinin puça çıxarılması ilə məhdudlaşmır. Bu tarixi gün, eyni zamanda, Azərbaycanın dünya birliyinə qovuşması, dünya dövlətləri tərəfindən tanınması, beynəlxalq aləmdə layiqli yerini tutması ilə səciyyələnir. Ölkəmizdə 1993-cü ildən etibarən həyata keçirilən siyasi xəttin prioritetlərini təşkil edən dünyəvi, hüquqi dövlət quruculuğu yönümündə atılan addımlar demokratiyanın, insan hüquq və azadlıqlarının təməl prinsiplərinin bərqərar olunmasına zəmin yaradıb”.
Millət vəkili hazırda Prezident İlham Əliyevin rəhbərliyi ilə Azərbaycanın böyük nailiyyətlər qazandığını və bu nailiyyətlərlə hər bir vətəndaşın fəxr etdiyini bildirib. “Tariximizi ümumilikdə dərindən öyrənməliyik, amma 15 iyun kimi günləri daha dərindən öyrənməli və gələcək üçün nəticə çıxartmalıyıq”, - deyə Hikmət Babaoğlu əlavə edib. Dünyada hazırda informasiya imperializmi siyasətinin aparıldığını xüsusi vurğulayan millət vəkili gənclərimizdən tariximizdə dönüş yaradan günlərə sahib çıxmalarını, informasiya imperializminə qarşı milli şüura və milli birliyə yiyələnmələrini tövsiyə edib.
Sonda universitetin Pedaqoji fakültəsinin tələbəsi İmran İbişovun ifasında Ümummilli liderimiz Heydər Əliyevə həsr olunmuş şeir səsləndirilib.

Paylaş:

Baxılıb: 700 dəfə