Bakıda yerdəyişmə üzrə tərəfdaşlığa dair beynəlxalq konfrans keçirilib

Bakı:

21 °C

83 %

5 m/s

Əlaqə

AZ RU EN

Ana səhifə / Sosial / Bakıda yerdəyişmə üzrə tərəfdaşlığa dair beynəlxalq konfrans keçirilib

Bakıda yerdəyişmə üzrə tərəfdaşlığa dair beynəlxalq konfrans keçirilib

28.06.2019 [09:55]

“Azərbaycanla yerdəyişmə üzrə tərəfdaşlığın həyata keçirilməsinə dəstək” (MOBILAZE) layihəsinin yekunlaşması ilə əlaqədar iyunun 27-də Bakıda Azərbaycan ilə Avropa İttifaqı (Aİ) arasında yerdəyişmə üzrə tərəfdaşlığa dair illik beynəlxalq konfrans keçirilib.
AZƏRTAC xəbər verir ki, tədbirdə Dövlət Miqrasiya Xidmətinin (DMX) rəisi Vüsal Hüseynov, xarici işlər nazirinin müavini Ramiz Həsənov, Avropa İttifaqının ölkəmizdəki nümayəndəliyinin rəhbəri Kestutis Yankauskas və Miqrasiya Siyasətinin İnkişafı üzrə Beynəlxalq Mərkəzin (MSİBM) baş direktoru Mikael Şpindelegger və digərləri çıxış edərək Azərbaycan ilə Avropa İttifaqı arasında əlaqələrin genişləndirilməsi istiqamətində həyata keçirilən layihələrdən, əməkdaşlığın genişləndirilməsi imkanlarından danışıblar. Görülən tədbirlərin Avropa İttifaqı vətəndaşlarına sürətlə inkişaf edən Azərbaycanı tanımaları, münasibətləri inkişaf etdirmək üçün əlverişli imkan yaratdığı qeyd olunub. Bildirilib ki, Aİ-nin dəstəyi ilə MSİBM-in ölkəmizdə həyata keçirdiyi layihə Azərbaycanın Xarici İşlər Nazirliyi və Dövlət Miqrasiya Xidməti ilə birgə əməkdaşlıq çərçivəsində icra olunub.
Diqqətə çatdırılıb ki, konfrans yerdəyişmə üzrə tərəfdaşlıq prioritetləri, miqrasiya və yerdəyişmənin müxtəlif sahələri üzrə istiqamətlərin müzakirəsi üçün regional platformanın təşkili, habelə MOBILAZE layihəsinin icrasının yekunlaşması ilə bağlıdır.
Aİ ilə Azərbaycan arasında 2013-cü ildə imzalanmış “Azərbaycan Respublikası, Avropa İttifaqı və onun iştirakçı üzv dövlətləri arasında Yerdəyişmə üzrə Tərəfdaşlıq barədə Birgə Bəyannamə” yerdəyişmə proseslərini və insanlararası əlaqələri dəstəkləmək, habelə belə proseslərin səmərəli idarə olunmasını təmin etmək üçün iki tərəf arasında gələcəkdə də davam etdiriləcək dialoqun və əməkdaşlığın çoxsaylı prioritetlərini müəyyənləşdirib.
Çıxış edənlər miqrasiya və yerdəyişmə sahəsində Aİ ilə əməkdaşlığın prioritetlərini qeyd edib, MOBILAZE layihəsinin dövlət qurumları üçün əhəmiyyətini diqqətə çatdırıblar. Bildirilib ki, yerdəyişmə üzrə tərəfdaşlıq miqrasiya və yerdəyişmə sahəsində Aİ və ona üzv dövlətlər, eləcə də üçüncü ölkələr arasında ən müfəssəl əməkdaşlıq və tərəfdaşlıq çərçivələrindən biridir. Bu əməkdaşlıq Aİ-nin miqrasiya və yerdəyişmə üzrə qlobal yanaşması çərçivəsində Aİ-yə və tərəfdaş ölkələrə, hər iki tərəfin vətəndaşlarına, eləcə də digər əlaqədar tərəflərə miqrasiya və yerdəyişmə məsələlərini ünvanlı, xüsusi ehtiyaclara uyğun şəkildə müzakirə etmək imkanı verir.
Tədbirdə Azərbaycanda Prezident İlham Əliyevin rəhbərliyi ilə həyata keçirilən uğurlu siyasətin məntiqi nəticəsi kimi miqrasiya idarəetməsi və miqrasiya proseslərinin tənzimlənməsi sahəsində əldə edilmiş nəticələrdən söhbət açılıb. Avropa İttifaqı ilə birgə həyata keçirilən, Aİ ilə Azərbaycan arasında yerdəyişməyə dair ictimai məlumatlılığı artırmağa xidmət edən MOBILAZE layihəsinin icrasının Azərbaycanın dövlət qurumları üçün əhəmiyyətindən, əldə edilən uğurlardan, miqrasiya və yerdəyişmə sahəsində regional əməkdaşlığın genişləndirilməsi baxımından önəmindən danışılıb, layihənin nəticələri qənaətbəxş qiymətləndirilib. Bundan başqa, ölkəmizlə Aİ arasında readmissiya, miqrasiya və qanunsuz miqrasiyanın qarşısının alınması sahəsində sıx əməkdaşlıq vurğulanıb.
Qeyd edilib ki, Aİ ilə Azərbaycan arasındakı yerdəyişmə üzrə tərəfdaşlıq insanlara konkret fayda gətirməklə yanaşı, dövlətlər arasında nəticəyönümlü əməkdaşlıq və dialoqa şərait yaradıb.
Konfransda Azərbaycanın və beynəlxalq təşkilatların miqrasiya sahəsi üzrə ekspertləri miqrasiya və yerdəyişmələrə regional yanaşmalar, eləcə də bu sahə üzrə əməkdaşlığın gələcəkdə də inkişaf etdirilməsi məsələləri barədə müzakirələr aparıblar.
MOBILAZE layihəsinin əlaqələndiricisi Violeta Vaqner layihə çərçivəsində görülən işlər, onun nəticələri və bu sahədə qazanılan nailiyyətlər barədə məlumat verib.
Qeyd edək ki, MOBILAZE layihəsinin icrasına 2016-cı ildən başlanılıb. Layihənin əsas məqsədi miqrasiya sahəsində dövlət siyasətinin hazırlanması və həyata keçirilməsi üçün hökumətin potensialının artırılmasına xüsusi diqqət yetirməklə, Avropa İttifaqı ilə Azərbaycan arasında yerdəyişmə üzrə tərəfdaşlığın həyata keçirilməsini dəstəkləməkdən ibarətdir. Layihəyə Aİ-nin yeddi ölkəsindən doqquz qurum cəlb olunub. Beş komponentdən ibarət layihə məlumatlı miqrasiya siyasətinin hazırlanması üçün analitik səriştənin formalaşması, respublikamıza və Azərbaycandan digər ölkələrə qanuni miqrasiya, sənədlərin təhlükəsizliyi, sığınacaqla bağlı qərarların qəbul edilməsi prosedurunun təkmilləşdirilməsi, geri qayıdış və reinteqrasiya məsələlərini əhatə edir. Layihə çərçivəsində müxtəlif mövzularda təlimlər, seminarlar, təcrübə səfərləri, görüşlər və beynəlxalq tədbirlər təşkil olunub.

Paylaş:

Baxılıb: 723 dəfə