“Yüksəliş” müsabiqəsinin Onlayn mərhələsi başlayır

Bakı:

22 °C

53 %

2 m/s

Əlaqə

AZ RU EN

Ana səhifə / Sosial / “Yüksəliş” müsabiqəsinin Onlayn mərhələsi başlayır

“Yüksəliş” müsabiqəsinin Onlayn mərhələsi başlayır

08.02.2020 [10:40]

“Yüksəliş” müsabiqəsinin qeydiyyat mərhələsi başa çatıb. Sabah müsabiqənin ilk sınaq imtahanı keçiriləcək.
AZƏRTAC xəbər verir ki, bu münasibətlə keçirilən tədbirdə çıxış edən Gənclər və İdman nazirinin müavini, “Yüksəliş” müsabiqəsi üzrə işçi qrupunun rəhbəri Fərhad Hacıyev 2019-cu il dekabrın 27-dən başlayan mərhələnin 2020-ci il fevralın 2-də tamamlandığını bildirib. Qeyd edib ki, bu müddətdə 11 min 760 nəfər qeydiyyatdan keçib. Onlardan 9775 nəfər müsabiqəyə qəbul edilib.
Müsabiqəyə qəbul edilənlərin 2339 nəfəri qadın, 7436 nəfəri isə kişidir. Onların 40 faizi 21-30 yaş (3910 nəfər), 46,95 faizi (4589 nəfər) 31-40 yaş, 13,05 faizi (1276) 41-51 yaş qruplarına daxildir. Müsabiqəyə qatılanların 28-i 1999-cu il, 622-si 1990-cı il, 12-si isə 1968-ci il təvəllüdlüdür. Bundan əlavə, 1000 dövlət qulluqçusu da iştirak üçün müraciət edib.
Qeydiyyat mərhələsi ərzində müsabiqə ilə bağlı əhalini məlumatlandırmaq, bölgələrdəki şəxslərin müsabiqədə qeydiyyatdan keçmələrinə dəstək olmaq məqsədilə yanvarın 21-dən 31-dək “Yüksəliş” müsabiqəsinin səyyar qeydiyyat avtobusları bölgələrə səfər edib. 778 şəxs müsabiqəyə səyyar qeydiyyat vasitəsilə qatılıb. Ümumilikdə qeydiyyatdan keçənlərin ərazi üzrə bölgüsündə Bakı, Sumqayıt, Gəncə şəhərləri, Lənkəran və Şəki rayonlarından olan namizədlər üstünlük təşkil edir.
Fevralın 8-də müsabiqənin növbəti - Onlayn mərhələsinin ümumi biliklər üzrə ilk sınaq imtahanı keçiriləcək. Fevralın 16-da müsabiqənin Onlayn mərhələsinin Ümumi bilik üzrə əsas imtahanı təşkil ediləcək. İmtahanda Azərbaycan dili və ədəbiyyatı, tarix, coğrafiya, mədəniyyət, hüquq və iqtisadiyyat olmaqla hər fənn üzrə 21 sual təqdim olunacaq.
Onlayn mərhələnin ikinci hissəsi olan qabiliyyət imtahanının testlərinin demo variantı fevralın 23-də təqdim ediləcək. Testlərin demo variantı tanışlıq xarakteri daşıdığından onların cavablandırılması tələb olunmur. Onlayn mərhələnin qabiliyyət imtahanı isə martın 1-də keçiriləcək. Qabiliyyət imtahanı üzrə testlər 3 blok - abstrakt (mücərrəd) düşüncənin, rəqəmsal və verbal məlumatlarla işləmək bacarığının yoxlanılması üzrə aparılacaq.
Fərhad Hacıyev bildirib ki, “Yüksəliş” müsabiqəsinin hər bir qalibinə ayrılacaq 20 min manat qrantın 10 min manatı müsabiqə bitəndən sonra 1 il ərzində mütləq təhsilə xərclənməlidir. Bundan əlavə, müsabiqənin qalibləri dövlət qulluğuna imtahansız qəbul ediləcəklər.
Müsabiqənin qaliblərinin adlarının kadr bankına daxil ediləcəyini diqqətə çatdıran F.Hacıyev deyib: “Həmin şəxslərin hansı müddətdə kadr bankında qalacağına gəlincə deyə bilərəm ki, onların burada uzun müddət qalacağına inanmıram. Bu gün ölkədə aparılan islahatları da nəzərə alsaq, yəqin ki, həmin şəxslər qısa müddətlə müvafiq işlə təmin olunacaqlar. Hətta bəzi qurumlar var ki, nəinki qaliblər, hətta finala çıxacaq namizədlərlə də işləmək niyyətindədir. Müsabiqənin qalibləri dövlət qulluğuna imtahansız qəbul ediləcəklər. Biz bu barədə Dövlət İmtahan Mərkəzi ilə razılıq əldə etmişik. Yəqin ki, bununla əlaqədar dövlət qulluğuna qəbul qaydalarında dəyişiklik də ediləcək”, - deyə o vurğulayıb.
İşçi qrupunun rəhbəri qeyd edib ki, “Yüksəliş” müsabiqəsində imtahan suallarının kənara sızması, o cümlədən Onlayn mərhələdə müsabiqə iştirakçısının kənar yardımdan, digər vasitələrdən hansı dərəcədə sui-istifadə etmək imkanlarının olduğu və bunun hansı nəticələrə yol aça biləcəyinə aydınlıq gətirilib. Diqqətə çatdırıb ki, müsabiqədə imtahanların suallarının kənara sızması imkanı tam aradan qaldırılıb. Həmin suallar Dövlət İmtahan Mərkəzi tərəfindən hazırlanacaq. Onları hazırlayan müəllimlər bunkerdə olacaq və mərhələ başa çatanadək orada qalacaqlar.
Dövlət İmtahan Mərkəzinin şöbə müdiri Natiq Əliyev çıxışında qeyd edib ki, Onlayn mərhələdə imtahan zamanı bir sual üçün ayrılan 30 saniyə ərzində hansısa namizəd sualı cavablandırmırsa, sistem növbəti suala keçir. “Əgər namizəd 30 saniyə ərzində qeyri-adi bacarığa malik olub həmin suala cavab tapmaq üçün başqa vasitədən istifadə etsə, həmin suala uyğun suallar müsabiqənin əyani mərhələsində də veriləcək. Beləliklə, biz əyani mərhələdə iştirakçının Onlayn mərhələdə kənar yardımdan istifadə etdiyini müəyyənləşdirəcəyik və onu müsabiqədən kənarlaşdıracağıq”, - deyə N.Əliyev əlavə edib.
Qeyd edək ki, “Yüksəliş” müsabiqəsi Prezident İlham Əliyevin iyulun 26-da imzaladığı Sərəncamla intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.

Paylaş:

Baxılıb: 483 dəfə