Optimal yanaşma, səmərəli birgə fəaliyyət

Bakı:

15 °C

94 %

2 m/s

Əlaqə

AZ RU EN

Ana səhifə / YAP xəbərləri / Optimal yanaşma, səmərəli birgə fəaliyyət

Optimal yanaşma, səmərəli birgə fəaliyyət

30.04.2024 [15:31]

Bu gün Azərbaycanın Mərkəzi Asiya, o cümlədən regionun türkdilli dövlətləri ilə kəmiyyət və keyfiyyətcə intensivləşən münasibətləri yeni geosiyasi reallıqlara uyğun olaraq inkişaf etdirilir və strateji xarakter alır.

Qırğızıstan, Qazaxıstan, Özbəkistan, Türkmənistanla münasibətlərimiz çoxşaxəli olmaqla bərabər, eyni zamanda, milli-mənəvi maraqlara bağlılığı ilə seçilir. Bunun əsas səbəblərindən biri həmin dövlətlərin xalqları ilə ortaq milli-mənəvi dəyərləri bölüşməyimizdir. Türk dövlətləri ilə əməkdaşlığın inkişafı Azərbaycanın xarici siyasətinin, beynəlxalq səviyyədə tərəfdaşlığının prioritet istiqamətlərindəndir.

Azərbaycan Mərkəzi Asiya ölkələri arasında Qırğız Respublikası ilə münasibətlərə də böyük önəm verir. İkitərəfli əməkdaşlığın inkişafında dövlət başçılarının səfərləri xüsusilə böyük əhəmiyyətə malikdir. Aprelin 24-də Qırğızıstan Prezidenti Sadır Japarovun ölkəmizə dövlət səfəri çərçivəsində Azərbaycan Prezidenti İlham Əliyevlə məhdud tərkibdə görüşü olub. Sonra Prezidentlərin iştirakı ilə Azərbaycan və Qırğızıstan Dövlətlərarası Şurasının 2-ci iclası keçirilib, birgə sənədlər imzalanıb. Daha sonra Prezident İlham Əliyev və Qırğız Prezidenti Sadır Japarov mətbuata bəyanatlarla çıxış ediblər.

Prezident İlham Əliyev bildirib ki, Qırğızıstan Prezidentinin Azərbaycana səfəri iki ölkə arasında dostluq və qardaşlıq münasibətlərinin möhkəmlənməsi işinə töhfə verəcək. İkitərəfli sənədlərin imzalanmasının önəmini qeyd edən dövlət başçısı vurğulayıb ki, bu sənədlər bir çox halda ikitərəfli münasibətlərin gələcək inkişafını müəyyən edəcək. Onlardan hər biri böyük əhəmiyyət kəsb edir.

İmzalanan sənədlər arasında Qırğızıstan və Azərbaycan arasında əməkdaşlığın inkişafına dair beşillik kompleks proqramı xüsusi qeyd olunmalıdır. Bu proqramdan ikitərəfli əməkdaşlıq üçün əsas yol xəritəsi kimi istifadə olunacaq. İqtisadi fəaliyyət üçün çox vacib olan ikiqat vergitutmanın aradan qaldırılması və vergidən yayınmanın qarşısının alınması haqqında Sazişin imzalanması da təqdirəlayiqdir.

Bu gün Mərkəzi Asiya regionu, Azərbaycanın yerləşdiyi Xəzər regionu və Cənubi Qafqaz çox mühüm əhəmiyyət kəsb edir. Xüsusən enerji, nəqliyyat və ticarət sahələrində böyük potensial mövcuddur. Ən önəmlisi, Azərbaycan ənənəvi tərəfdaşları ilə, qardaş ölkələrlə münasibətləri inkişaf etdirir. Qırğız Respublikası ilə də əməkdaşlıq xüsusi əhəmiyyət daşıyır.

Hər bir görüş həm qarşılıqlı fəaliyyətin, ünsiyyətin möhkəmləndirilməsi baxımından, həm də ikitərəfli və çoxtərəfli əməkdaşlığın mühüm məsələlərinin həlli baxımından mühüm və dəyərlidir. Azərbaycanla Qırğızıstan arasında ticarət dövriyyəsinin artması tendensiyası mövcuddur. Bu ölkələr iqtisadi-ticari sahədə fəal əməkdaşlıq edir. Səfər çərçivəsində əmtəə dövriyyəsinin bir neçə dəfə artması rəqəmləri səsləndi. Hələ ki, mütləq rəqəmlər çox böyük olmasa da, amma potensialın artması tendensiyası mövcuddur. Həmçinin Azərbaycan-Qırğızıstan İnkişaf Fondunun Nizamnamə fondu haqqında Sazişə əlavə imzalanıb. Nizamnamə fondu 4 dəfə - 25 milyondan 100 milyon dollaradək artırılıb. Bunun əsas səbəbi müraciətlərin həddən artıq olmasıdır.

Azərbaycan unikal coğrafi mövqeyə və böyük nəqliyyat-loqistika potensialına malikdir. Bakı həm Şərqdən Qərbə, həm də Şimaldan Cənuba nəqliyyat axınlarının kəsişməsində yerləşir. Azərbaycanın xarici iqtisadi siyasəti coğrafi mövqeyinin üstünlüklərindən istifadə etməyə yönəlib.

Bütün bunlar onu göstərir ki, Azərbaycanın Mərkəzi Asiya ölkələri, xüsusilə Türk dövlətləri, o cümlədən Qırğızıstanla əməkdaşlığının geniş perspektivləri var. Qırğızıstan Prezidenti Sadır Japarovun Azərbaycana son səfəri iki ölkə arasında mövcud olan münasibətlərdə yeni səhifə açacaq, xalqlarımızın tarixi və mənəvi əlaqələrini daha da möhkəmləndirəcək, mövcud potensialdan tam istifadə üçün böyük addımların atılmasına şərait yaradacaq.

Meydanəli Yolçiyev,

YAP Daşkəsən rayon təşkilatının sədri

Paylaş:

Baxılıb: 600 dəfə