Azərbaycan üçün COP29 gələcək hədəflərin başlanğıcıdır

Bakı:

16°C

77%

0m/s

Əlaqə

AZ RU EN

Ana səhifə / YAP xəbərləri / Azərbaycan üçün COP29 gələcək hədəflərin başlanğıcıdır

Azərbaycan üçün COP29 gələcək hədəflərin başlanğıcıdır

27.11.2024 [11:37]

Namiq Əhmədov,

YAP Xəzər rayon təşkilatının sədri

İqlim dəyişikliyi müasir dünyanın ən ciddi problemlərindən biridir və bu problem qlobal səviyyədə hərtərəfli yanaşma tələb edir. BMT-nin İqlim Dəyişmələri üzrə Çərçivə Konvensiyasının Tərəflər Konfransı (COP) dünya liderlərinin, ekspertlərin, vətəndaş cəmiyyətinin və biznes nümayəndələrinin bu qlobal problemi müzakirə etdiyi mühüm platformadır. COP29-un Azərbaycanda keçirilməsi həm ölkə üçün, həm də region üçün xüsusi əhəmiyyət kəsb edir.

COP29 tədbiri Azərbaycanın dünya diplomatiya tarixinə yazdığı növbəti uğurlu səhifə oldu. İki həftə ərzində ölkəmiz beynəlxalq iqlim müzakirələrinin mərkəzinə çevrilərək, qlobal əhəmiyyətli mövzuların həllində lider rolunu təsdiqlədi. Azərbaycan Respublikasının Prezidenti cənab İlham Əliyevin dediyi kimi, bu tədbir Azərbaycanın güclü mövqeyə malik olduğunu və beynəlxalq aləmdə artan nüfuzunu bir daha sübut etdi. COP29-un Bakıda keçirilməsi, ölkəmizin təkcə yaşıl enerji sahəsində deyil, həm də diplomatik, iqtisadi və texnoloji sahələrdə malik olduğu potensialı nümayiş etdirdi. “Yaşıl dünya naminə həmrəylik!” şüarı ilə çıxış edən ölkəmiz, iqlim böhranının həlli üçün davamlı inkişaf və bərpa olunan enerji mənbələrinə keçidin əhəmiyyətini vurğuladı. Dövlətimizin başçısı cənab İlham Əliyev tədbirin əhəmiyyətini qeyd edərək bildirdi ki, Azərbaycanın beynəlxalq aləmdə artan hörməti apardığı müstəqil və prinsipial siyasətin, beynəlxalq hüquqa sədaqətinin və ölkə ərazisində suverenliyin bərpa edilməsinin nəticəsidir. Bu nailiyyətlər təkcə ölkənin daxili inkişafını deyil, onun dünya səhnəsindəki rolunu da gücləndirdi.

COP29 çərçivəsində keçirilən müzakirələrdə bir çox ölkələr üçün yaşıl enerjiyə keçid prosesində əsas maneənin maliyyə və investisiya çatışmazlığı olduğu vurğulandı. Bu kontekstdə Azərbaycan təcrübəsi xüsusi maraq doğurdu. Ölkəmizdə xarici sərmayələrin cəlb edilməsi nəticəsində bir sıra bərpa olunan enerji layihələri həyata keçirilir. Qaradağ Günəş-Elektrik Stansiyası bu sahədə əldə edilmiş uğurların ən yaxşı nümunələrindən biridir. Birləşmiş Ərəb Əmirliklərinin "Masdar" şirkəti tərəfindən həyata keçirilən bu layihə Azərbaycanın yaşıl enerji istehsalında nailiyyətlər qazandığını bir daha sübut edir. Xarici investisiyalar sayəsində ölkəmizdə külək və günəş enerjisi sahələrində digər mühüm layihələr də uğurla davam etdirilir. COP29 çərçivəsində Azərbaycanın xarici tərəfdaşlarla əlaqələri genişləndirildi. Bu əməkdaşlıqlar qlobal səviyyədə yaşıl enerjiyə keçidin sürətləndirilməsinə və beynəlxalq resursların daha səmərəli paylaşılmasına imkan yaradacaq. Tədbir zamanı təqdim edilən yeni texnologiyalar yaşıl enerjiyə keçid prosesində texnoloji tərəqqinin əhəmiyyətini bir daha vurğuladı. Azərbaycan yaşıl enerji sahəsinə xarici sərmayə cəlb etməkdə uğurlu model nümayiş etdirdi. Bu təcrübə digər inkişaf etməkdə olan ölkələr üçün örnək oldu. Həmçinin, COP29 ekoloji problemlər haqqında ictimaiyyətin məlumatlılığını artırmaqla yanaşı, iqlim böhranına qarşı həmrəylik mesajını gücləndirdi. Azərbaycan üçün COP29 yalnız bir uğur mərhələsi deyil, həm də gələcək hədəflərin başlanğıcıdır.

Azərbaycan COP29 çərçivəsində yalnız ev sahibliyi etməklə kifayətlənmədi, həm də mühüm maliyyə təşəbbüsləri ilə çıxış etdi. Prezident cənab İlham Əliyevin rəhbərliyi ilə Azərbaycan İqlim Maliyyə Fondunun yaradılması təşəbbüsünü irəli sürdü və bu fonda inkişaf etməkdə olan kiçik ada dövlətlərini dəstəkləmək üçün 10 milyon ABŞ dolları həcmində töhfə ayrıldı. Həmçinin, inkişaf etməkdə olan ölkələrə dəstək üçün 2035-ci ilə qədər 300 milyard ABŞ dolları təmin etmək məqsədinin qoyulması Azərbaycan diplomatiyasının qlobal problemlərin həllində liderliyini nümayiş etdirdi. Bu, Azərbaycanın inkişaf etmiş və inkişaf etməkdə olan ölkələr arasında körpü rolunu uğurla yerinə yetirdiyini bir daha təsdiqlədi.

Tədbirə qatılan dünya liderləri Azərbaycanın uğurlarını yüksək qiymətləndirdilər. ABŞ Prezidenti Co Bayden bəyanatında Azərbaycanın COP29 çərçivəsində qazandığı nailiyyətləri təbrik edərək bunun təkcə ətraf mühit deyil, həm də beynəlxalq siyasətdə ölkənin mövqeyini gücləndirdiyini qeyd etdi. COP29 təkcə Azərbaycanın diplomatik qələbəsi deyil, həm də qlobal iqlim fəaliyyətinə böyük töhfəsi oldu.

Paylaş:

Baxılıb: 348 dəfə