Humanitar əməkdaşlığa və idman diplomatiyasına çağırış

Bakı:

23 °C

57 %

2 m/s

Əlaqə

AZ RU EN

Ana səhifə / YAP xəbərləri / Humanitar əməkdaşlığa və idman diplomatiyasına çağırış

Humanitar əməkdaşlığa və idman diplomatiyasına çağırış

13.10.2025 [23:36]

2025-ci il oktyabrın 13-də Tacikistanın paytaxtı Düşənbədə keçirilən Müstəqil Dövlətlər Birliyi (MDB) Dövlət Başçıları Şurasının iclasında Prezident İlham Əliyev çıxış edərək Azərbaycanın təşkilata verdiyi önəmi və MDB çərçivəsində əməkdaşlığın gücləndirilməsi istiqamətində mövqeyini bölüşüb. Dövlət başçısı çıxışında xüsusilə humanitar və mədəni sahədə inteqrasiyanın artırılmasının vacibliyini vurğulayıb və MDB Oyunlarının bu kontekstdə rolunu ön plana çəkib.

Prezident İlham Əliyev ilk növbədə Tacikistana və Prezident Emoməli Rəhmonun şəxsində qardaş tacik xalqına yüksək səviyyədə təşkil olunmuş sammitə görə təşəkkür edib. Dövlət başçısı Tacikistanla Azərbaycan arasındakı münasibətləri “qardaşlıq və dostluğa əsaslanan səmimi tərəfdaşlıq” kimi səciyyələndirib və bu münasibətlərin regionda sabitlik və qarşılıqlı etimada mühüm töhfə verdiyini qeyd edib.

Prezident İlham Əliyev çıxışında işğaldan azad edilmiş ərazilərdə aparılan bərpa və yenidənqurma işləri barədə də məlumat verib. Ölkə başçısı Laçın şəhərinin 2025-ci ildə MDB-nin Mədəniyyət Paytaxtı elan olunmasının Azərbaycanın mədəni irsinin tanıdılması və beynəlxalq inteqrasiyasının gücləndirilməsi baxımından əlamətdar hadisə olduğunu bildirib. Laçının mədəniyyət paytaxtı statusu çərçivəsində bir sıra beynəlxalq tədbirlərin təşkil olunacağı gözlənilir ki, bu da Azərbaycanla MDB ölkələri arasında mədəni körpülərin qurulmasına şərait yaradacaq.

Prezident İlham Əliyevin çıxışının mühüm hissəsini bu yaxınlarda Azərbaycanda uğurla keçirilmiş III MDB Oyunları təşkil edib. Oyunlar Gəncə, Qəbələ, Göygöl, Yevlax, Mingəçevir, Şəki və azad olunmuş Xankəndi şəhərində baş tutub. Bu yarışlara MDB məkanından 1 600-dən artıq idmançı qatılıb və bu, yalnız idman yarışı deyil, həm də gənclər arasında dostluğun və birliyin təntənəsinə çevrilib.

Dövlətimizin başçısı qeyd edib ki, MDB Oyunları dövlətlər arasında münasibətləri möhkəmləndirməklə yanaşı, gənc nəslin sağlam ruhda yetişməsinə, onların bir-birini tanımasına və ortaq dəyərlər ətrafında birləşməsinə şərait yaradır. Xüsusilə, azad edilmiş ərazilərdə — Xankəndidə idman yarışlarının keçirilməsi həm simvolik, həm də strateji əhəmiyyət daşıyır. Bu, Azərbaycanın sülh, inkişaf və əməkdaşlıq yönümlü mesajının idman vasitəsilə beynəlxalq ictimaiyyətə çatdırılmasının nümunəsidir.

Azərbaycan Prezidenti İlham Əliyev çıxışında MDB məkanında humanitar əlaqələrin, təhsil, mədəniyyət, idman və gənclər siyasəti sahələrində əməkdaşlığın gücləndirilməsinin zəruriliyini vurğulayıb. O, bu istiqamətdə görülən işləri alqışlayaraq gələcəkdə daha genişmiqyaslı layihələrin həyata keçirilməsinin mümkünlüyünü ifadə edib.

Dövlət başçısı qeyd edib ki, Azərbaycan MDB çərçivəsində həyata keçirilən ortaq təşəbbüslərə daim açıqdır və qarşılıqlı hörmət, bərabərlik və əməkdaşlıq prinsiplərinə əsaslanan münasibətlərin dərinləşdirilməsində maraqlıdır.

Prezident İlham Əliyevin Düşənbədəki çıxışı bir daha göstərdi ki, Azərbaycan MDB çərçivəsində sadəcə iqtisadi və siyasi deyil, eyni zamanda humanitar əməkdaşlığa da böyük önəm verir. MDB Oyunlarının uğurlu təşkili, Laçının mədəniyyət paytaxtı elan olunması və bu sahədə görülən digər tədbirlər Azərbaycanın bu istiqamətdə atdığı addımların davamlı və məqsədyönlü olduğunu sübut edir. Bu çıxış MDB daxilində yumşaq güc amilinin — mədəniyyət və idmanın — birləşdirici vasitə kimi necə effektiv şəkildə istifadə oluna biləcəyini nümayiş etdirdi.

Sahib Şükürov

YAP Göyçay rayon təşkilatının sədri

Paylaş:

Baxılıb: 483 dəfə