Azərbaycanın sülh və əməkdaşlıq siyasətinə sadiqliyinin növbəti təzahürü

Bakı:

23 °C

83 %

6 m/s

Əlaqə

AZ RU EN

Ana səhifə / YAP xəbərləri / Azərbaycanın sülh və əməkdaşlıq siyasətinə sadiqliyinin növbəti təzahürü

Azərbaycanın sülh və əməkdaşlıq siyasətinə sadiqliyinin növbəti təzahürü

14.10.2025 [22:17]

Tacikistanın paytaxtı Düşənbədə Müstəqil Dövlətlər Birliyinin (MDB) Dövlət Başçıları Şurasının növbəti iclası keçirilib. Tədbirdə Azərbaycan Respublikasının Prezidenti İlham Əliyev də iştirak edib. Səfər çərçivəsində dövlət başçısının həm iclasdakı çıxışı, həm də ikitərəfli görüşləri böyük diqqət doğurub.

Prezident İlham Əliyev çıxışında MDB çərçivəsində əməkdaşlığın və tərəfdaşlığın mühüm əhəmiyyət kəsb etdiyini vurğulayıb. Dövlətimizin başçısı bildirib ki, Azərbaycan birliyin üzv dövlətləri ilə qarşılıqlı hörmət, bərabərlik və faydalı əməkdaşlıq prinsiplərinə əsaslanan münasibətlərin inkişafında maraqlıdır. Prezident İlham Əliyev qeyd edib ki, regionda sabitlik, təhlükəsizlik və iqtisadi inteqrasiya prosesləri ancaq qarşılıqlı etimad və konstruktiv dialoq sayəsində mümkün ola bilər.

Dövlətimizin başçısı həmçinin, MDB məkanında birgə layihələrin həyata keçirilməsinin, iqtisadi və nəqliyyat əlaqələrinin genişləndirilməsinin vacibliyini xüsusi qeyd edib. Cənab Prezident, Azərbaycanın bu istiqamətdə təşəbbüskar mövqe tutduğunu, xüsusilə də enerji, nəqliyyat və tranzit sahələrində əməkdaşlığın dərinləşdirilməsi üçün konkret addımlar atdığını diqqətə çatdırıb.

Ölkə başçısı çıxışında Azərbaycan və Tacikistan arasında dostluq, qarşılıqlı etimad və dəstək ruhunda formalaşmış münasibətlərin yüksək səviyyəsindən danışıb.Prezident İlham Əliyev vurğulayıb ki, iki ölkə arasında əlaqələr ortaq tarixi, mədəni dəyərlərə və qarşılıqlı maraqlara əsaslanır.

Dövlət başçısı Tacikistan Prezidenti Emoməli Rəhmonla keçirilən görüşdə siyasi dialoqun, iqtisadi və humanitar əməkdaşlığın daha da genişləndirilməsi məsələlərini müzakirə edib. Tərəflər qarşılıqlı səfərlərin, mədəni tədbirlərin və biznes forumların əlaqələrin inkişafına töhfə verdiyini bildiriblər.

Prezident İlham Əliyev çıxışında beynəlxalq münasibətlərdə ədalət, suverenlik və ərazi bütövlüyü prinsiplərinin qorunmasının vacibliyini bir daha vurğulayıb. O qeyd edib ki, Azərbaycanın xarici siyasətinin əsas prioritetlərindən biri regional sülhün və təhlükəsizliyin möhkəmləndirilməsidir.

Dövlət başçısı MDB məkanında dövlətlərin daxili işlərinə qarışmamaq, bir-birinin suverenliyinə hörmətlə yanaşmaq və bərabərhüquqlu əməkdaşlıq prinsiplərinin qorunmasının birliyin gələcək inkişafı üçün əsas şərt olduğunu bildirib.

İclas zamanı Prezident İlham Əliyev Azərbaycanın MDB məkanında iqtisadi əməkdaşlıqda fəal iştirak etdiyini vurğulayıb. O, enerji, nəqliyyat-logistika və innovasiya sahələrində təcrübə mübadiləsinin və birgə layihələrin həyata keçirilməsinin vacibliyini qeyd edib. Bununla yanaşı, humanitar sahədə təhsil, elm və mədəniyyət əlaqələrinin dərinləşdirilməsinin xalqlar arasında yaxınlaşmaya xidmət etdiyini bildirib.

Prezident İlham Əliyev çıxışında MDB çərçivəsində keçirilən idman oyunlarının ölkələr arasında əməkdaşlıq, qarşılıqlı hörmət və dostluq münasibətlərini möhkəmləndirən mühüm vasitə olduğunu vurğulayıb. O bildirib ki, bu cür tədbirlər yalnız idman nailiyyətlərini nümayiş etdirməklə kifayətlənmir, həm də gənc nəsildə vətəndaşlıq, komanda ruhu və sağlam rəqabət hissi formalaşdırır.

Dövlət başçısı MDB Oyunlarının həm də gənclərin inkişafı, milli və beynəlxalq təcrübə mübadiləsi üçün əvəzsiz platforma olduğunu qeyd edib. O vurğulayıb ki, bu oyunlar gəncləri həm fiziki cəhətdən, həm də mənəvi olaraq inkişaf etdirir, onlarda əməkdaşlıq, ədalətlilik və liderlik keyfiyyətlərini formalaşdırır.

Prezident İlham Əliyev bildirib ki, Azərbaycan MDB Oyunlarının təşkili və bu sahədə iştirakını hər zaman dəstəkləyir və bu istiqamətdə təşəbbüskar mövqe nümayiş etdirir.

Prezident İlham Əliyevin Düşənbə səfəri və MDB Dövlət Başçıları Şurasının iclasındakı çıxışı Azərbaycanın regional və beynəlxalq arenada sülh, əməkdaşlıq və qarşılıqlı hörmət siyasətinə sadiqliyinin növbəti göstəricisidir. Bu səfər həm Azərbaycan–Tacikistan münasibətlərinin, həm də MDB çərçivəsində çoxşaxəli əməkdaşlığın inkişafına mühüm töhfə verib.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 571 dəfə