Azərbaycanın yeni dünya nizamında strateji mövqeyi

Bakı:

22 °C

64 %

3 m/s

Əlaqə

AZ RU EN

Ana səhifə / YAP xəbərləri / Azərbaycanın yeni dünya nizamında strateji mövqeyi

Azərbaycanın yeni dünya nizamında strateji mövqeyi

23.01.2026 [15:33]

Azərbaycan Respublikasının Prezidenti İlham Əliyev “World Economic Forum 2026” çərçivəsində “Euronews” televiziya kanalına verdiyi müsahibə ilə beynəlxalq ictimaiyyətə mühüm siyasi və strateji mesajlar ünvanlayıb. Müsahibə Azərbaycanın müasir beynəlxalq münasibətlər sistemində tutduğu mövqeyi, regionda sülh təşəbbüslərini, eləcə də ölkənin enerji və iqtisadi siyasətini əhatə edən fundamental məsələləri özündə birləşdirib.

Prezident İlham Əliyev müsahibəsində qeyd edib ki, hazırkı qlobal siyasi reallıqlar beynəlxalq münasibətlərin mahiyyətində ciddi dəyişikliklərə səbəb olub və artıq dünya əvvəlki kimi hüquq və prinsiplər üzərində deyil, daha çox güc balansı üzərində formalaşır. Bu şəraitdə hər bir dövlət öz milli maraqlarını qorumaq üçün müstəqil siyasət yürütməli və strateji düşüncə nümayiş etdirməlidir. Azərbaycan da məhz bu prinsiplər əsasında balanslaşdırılmış və praqmatik xarici siyasət xətti aparır.

Dövlət başçısı Avropa strukturlarında Azərbaycanla bağlı səsləndirilən bəzi qərəzli mövqelərə də münasibət bildirərək vurğulayıb ki, Azərbaycan artıq bu cür yanaşmalara emosional reaksiya vermir. Ölkəmiz öz yolunu müəyyən edib və heç bir xarici təzyiq onun daxili və xarici siyasətinə təsir göstərə bilməz. Bununla yanaşı, Prezident Avropa Komissiyası ilə əməkdaşlığın konstruktiv əsasda davam etdiyini və qarşılıqlı maraqlara xidmət etdiyini qeyd edib.

Müsahibədə regionda sülh məsələsinə xüsusi yer ayrılıb. Prezident İlham Əliyev bildirib ki, Cənubi Qafqazda artıq yeni siyasi reallıq formalaşıb və Azərbaycan sülhün əsas təşəbbüskarlarından biridir. Azərbaycan-Ermənistan münasibətlərində qarşıdurma mərhələsi geridə qalır və tərəflər arasında davamlı sülhün təmin edilməsi üçün real imkanlar yaranır. Dövlət başçısı vurğulayıb ki, sülh yalnız sənədlərlə deyil, praktik əməkdaşlıq, iqtisadi inteqrasiya və qarşılıqlı etimad mühiti ilə möhkəmlənməlidir.

Prezident İlham Əliyev müsahibəsində Azərbaycanın Avropanın enerji təhlükəsizliyində artan roluna da toxunub. O qeyd edib ki, Azərbaycan bu gün etibarlı tərəfdaş kimi Avropa bazarına enerji tədarükünü genişləndirir və strateji layihələr vasitəsilə qlobal enerji xəritəsində mövqeyini daha da gücləndirir. Enerji sahəsində həyata keçirilən siyasət ölkənin iqtisadi müstəqilliyini təmin etməklə yanaşı, regional sabitliyə də mühüm töhfə verir.

Davosda keçirilən görüşlər və beynəlxalq biznes nümayəndələri ilə aparılan müzakirələr Azərbaycanın iqtisadi potensialına artan marağın göstəricisi kimi qiymətləndirilir. Prezident İlham Əliyev investisiya mühitinin yaxşılaşdırılması, nəqliyyat-logistika imkanlarının genişləndirilməsi və Orta Dəhliz layihəsinin strateji əhəmiyyəti barədə ətraflı məlumat verib. Azərbaycan artıq təkcə enerji ölkəsi deyil, həm də regional ticarət və tranzit mərkəzi kimi çıxış edir.

Ümumilikdə, Prezident İlham Əliyevin Davosda “Euronews”a verdiyi müsahibə Azərbaycanın qlobal siyasətdə formalaşmış mövqeyini və artan nüfuzunu bir daha nümayiş etdirdi. Dövlət başçısının səsləndirdiyi fikirlər göstərir ki, Azərbaycan yeni dünya nizamında öz yerini dəqiq müəyyən etmiş, milli maraqlara söykənən müstəqil və çevik siyasət yürüdən güclü dövlətdir. Bu müsahibə həm də Azərbaycanın beynəlxalq arenada söz sahibi olan aktor kimi çıxış etdiyini təsdiqləyən mühüm siyasi sənəd kimi dəyərləndirilə bilər.

Fidan Hüseynova

YAP Quba rayon təşkilatının sədri

Paylaş:

Baxılıb: 757 dəfə