Müasir dünya düzənində Türk Dövlətləri Təşkilatının əhəmiyyəti

Bakı:

25 °C

57 %

7 m/s

Əlaqə

AZ RU EN

Ana səhifə / YAP xəbərləri / Müasir dünya düzənində Türk Dövlətləri Təşkilatının əhəmiyyəti

Müasir dünya düzənində Türk Dövlətləri Təşkilatının əhəmiyyəti

03.04.2026 [11:59]

Müasir dövrdə Türk dünyasının birliyi və həmrəyliyi təkcə mənəvi bağlılığa deyil, həm də möhkəm iqtisadi-strateji əsaslara söykənir. Azərbaycan Prezidenti İlham Əliyevin həyata keçirdiyi uzaqgörən xarici siyasət kursu Türk dövlətlərinin vahid güc mərkəzi kimi formalaşmasına xidmət edir. Türk Dövlətləri Təşkilatı çərçivəsində qurulan münasibətlər həm yaxşı günlərdə, həm də çətin sınaqlar dövründə üzv ölkələrin bir-birinə verdiyi dəstəklə öz sarsılmazlığını sübut edib. Bu gün bu birliyin ən mühüm hədəflərindən biri regionun tranzit potensialını birləşdirmək və ortaq iqtisadi maraqları təmin etməkdir.

Prezident İlham Əliyevin Təşkilata üzv dövlətlərin hökumət başçıları ilə görüşündə qeyd etdiyi kimi, hazırkı geosiyasi vəziyyət Türk dünyasının nəqliyyat, logistika və tranzit imkanlarının genişləndirilməsini zəruri edir. Bu əsasda “Orta Dəhliz” bütün Türk dövlətlərinin iqtisadi maraqlarına tam cavab verən fundamental bir layihədir. Azərbaycan bu istiqamətdə öz üzərinə düşən öhdəlikləri böyük məsuliyyətlə icra edərək, ölkə ərazisindəki mühüm infrastrukturun - Bakı Beynəlxalq Dəniz Ticarət Limanının, geniş dəmir yolu şəbəkəsinin, müasir magistralların və yeni inşa edilmiş hava limanlarının tam hazırlığını təmin edib.

Xüsusilə Zəngəzur dəhlizinin icrası Türk dünyasının coğrafi bütövlüyünün bərpası və nəqliyyat əlaqələrinin diversifikasiyası baxımından həlledici əhəmiyyət daşıyır. Ölkə başçısının diqqətə çatdırdığı statistik göstəricilər bu layihənin sürətlə reallaşdığını təsdiqləyir. Dəhlizin Azərbaycan hissəsində avtomobil yolunun 90 faizi, dəmir yolunun isə təxminən 70 faizi artıq hazırdır. Eyni zamanda, Türkiyənin Qars-Naxçıvan dəmir yolunun tikintisinə start verməsi bu layihəni bütöv bir beynəlxalq şəbəkəyə çevirir. Bu iki nəhəng infrastrukturun uzlaşdırılması Avrasiyanın nəqliyyat xəritəsində yeni və strateji bir qolun açılması deməkdir.

İlkin mərhələdə 15 milyon ton yükün daşınmasına hesablanmış bu yeni dəhliz təkcə Azərbaycan və digər Türk dövlətləri üçün deyil, həm də geniş bir coğrafiya - Şərqlə Qərb arasında təhlükəsiz və qısa yol axtaran dünya bazarları üçün böyük önəm kəsb edir. Azərbaycanın bu sahədəki fəaliyyəti bir tərəfdən milli maraqlarımızın təmin olunmasına, digər tərəfdən isə regionda davamlı sülhə, əməkdaşlığa və iqtisadi rifaha xidmət edir. Beləliklə, Türk Dövlətləri Təşkilatının vahid məqsədlər ətrafında sıx birləşməsi bölgədə təhlükəsizliyin və qarşılıqlı hörmətə əsaslanan tərəfdaşlığın ən güclü zəmanətinə çevrilir.

Anar Şahmuradov

YAP Ağdaş rayon təşkilatı Aparatının ideoloji işlər üzrə məsləhətçisi

Paylaş:

Baxılıb: 478 dəfə