Regional təhlükəsizlik fonunda iqtisadi inteqrasiya

Bakı:

25 °C

57 %

8 m/s

Əlaqə

AZ RU EN

Ana səhifə / YAP xəbərləri / Regional təhlükəsizlik fonunda iqtisadi inteqrasiya

Regional təhlükəsizlik fonunda iqtisadi inteqrasiya

09.04.2026 [11:02]

Azərbaycan Prezidenti İlham Əliyevin aprelin 6-da Tbilisiyə səfərini, burada Gürcüstanın Prezidenti Mixeil Kavelaşvili və Baş nazir İrakli Kobaxidze ilə keçirilən görüşlərini iki ölkə münasibətlərinin inkişafında yeni mərhələnin başlanğıcı kimi mühüm önəm kəsb edir. Səfər çərçivəsində aparılan danışıqlar ikitərəfli əməkdaşlığın genişləndirilməsi ilə yanaşı, regional təhlükəsizlik, iqtisadi inteqrasiya və nəqliyyat-kommunikasiya layihələrinin perspektivlərini də əhatə edib.

Görüşlər zamanı tərəflər qarşılıqlı hörmət və etimada əsaslanan əlaqələrin davamlı inkişaf etdiyini vurğulayıblar. Gürcüstanın Baş naziri çıxışında xalqlar arasında formalaşmış tarixi yaxınlığa diqqət çəkərək bildirib: “Əsrlər boyu xalqlarımızı yaxşı qonşuluq və xüsusi tarixi dostluq bağlayıb”. Bu fikir iki ölkə arasında münasibətlərin yalnız siyasi və iqtisadi maraqlara deyil, həm də dərin tarixi köklərə söykəndiyini bir daha nümayiş etdirir. Prezident İlham Əliyev isə bəyanatında vurğulayıb ki, mövcud münasibətlər regionda əməkdaşlığın genişlənməsi üçün möhkəm zəmin yaradır və tərəfdaşlıq gələcəkdə də inkişaf edəcək. O qeyd edib ki, “bizim münasibətlər deyə bilərəm ki, bütün qonşular üçün nümunə ola bilər”. Qeyd edək ki, bu yanaşma Azərbaycan və Gürcüstan arasında formalaşmış qarşılıqlı etimadın və ortaq maraqların əhəmiyyətini göstərir.

Səfər çərçivəsində iqtisadi əməkdaşlıq məsələləri də geniş müzakirə olunub. Ticarət dövriyyəsinin artması, qarşılıqlı investisiyaların genişlənməsi və birgə layihələrin həyata keçirilməsi tərəfdaşlığın iqtisadi dayaqlarını gücləndirir. Gürcüstanda əlverişli investisiya mühiti Azərbaycan şirkətlərinin fəaliyyətini stimullaşdırır, eyni zamanda, regionda yeni layihələr üçün imkanlar yaradır.

Enerji və nəqliyyat sahələrində əməkdaşlıq strateji tərəfdaşlığın əsas istiqamətlərindən biri olaraq qalır. Ölkəmiz enerji resurslarının dünya bazarlarına çıxarılmasında Gürcüstanın tranzit rolu mühüm əhəmiyyət daşıyır. Eyni zamanda, Asiya ilə Avropanı birləşdirən nəqliyyat marşrutlarının inkişafı hər iki ölkənin regional logistika mərkəzinə çevrilməsi imkanlarını artırır. Bu amillər Cənubi Qafqazın beynəlxalq əhəmiyyətini daha da yüksəldir. Regional təhlükəsizlik və sülh məsələləri də müzakirələrin əsas istiqamətlərindən olub. Tərəflər Cənubi Qafqazda əməkdaşlıq mühitinin gücləndirilməsinin vacibliyini qeyd edərək, yeni geosiyasi reallıqların region üçün əlavə imkanlar yaratdığını bildiriblər. Bu baxımdan Azərbaycan - Gürcüstan tərəfdaşlığı həm iqtisadi, həm də siyasi sabitliyin möhkəmləndirilməsində mühüm rol oynayır.

Səfər çərçivəsində aparılan müzakirələr və səsləndirilən fikirlər göstərir ki, ölkələrimiz arasında strateji tərəfdaşlıq daha da dərinləşir. Tarixi dostluq, qarşılıqlı dəstək və ortaq maraqlar üzərində qurulan bu münasibətlər gələcəkdə regionun inkişafına və əməkdaşlığın genişlənməsinə mühüm töhfə verəcəkdir.

Vüqar İsayev,

YAP Göygöl rayon təşkilatının sədri

Paylaş:

Baxılıb: 521 dəfə