Azərbaycan idmanı dinamik inkişaf edir

Bakı:

25 °C

53 %

8 m/s

Əlaqə

AZ RU EN

Ana səhifə / YAP xəbərləri / Azərbaycan idmanı dinamik inkişaf edir

Azərbaycan idmanı dinamik inkişaf edir

01.05.2026 [20:37]

Aprelin 30-da Prezident İlham Əliyevin Avropa çempionatında tarixi uğura imza atmış güləşçilərlə görüşü Azərbaycan idmanının yalnız nəticələr üzərində qurulmadığını, eyni zamanda dərin ideoloji və sosial məzmun daşıdığını bir daha nümayiş etdirdi. Bu görüşdə səslənən mesajlar göstərdi ki, idman Azərbaycanda artıq sadəcə yarış və medal anlayışından kənara çıxaraq milli kimliyin və vətəndaş həmrəyliyinin mühüm elementinə çevrilib.

Beynəlxalq arenada Azərbaycanın üçrəngli bayrağı yüksəldikdə yaranan qürur hissi təkcə idman nailiyyətinin sevinci deyil. Bu, bütövlükdə cəmiyyətin özünə inamını gücləndirən, xüsusilə gənc nəslin vətənpərvərlik ruhunda formalaşmasına təsir edən mühüm amildir. Məhz buna görə də idman sahəsində əldə olunan uğurlar dövlət siyasətində geniş sosial məna kəsb edir. Son illər ərzində bu sahədə müşahidə olunan dinamik inkişaf isə təsdiqləyir ki, Azərbaycan idmanı planlı və məqsədyönlü şəkildə yeni zirvələrə doğru irəliləyir. Diqqət çəkən əsas məqamlardan biri də idman idarəçiliyində formalaşmış varislik ənənəsidir. Cənab Prezident İlham Əliyevin qeyd etdiyi kimi, vaxtilə ölkəni beynəlxalq arenada təmsil etmiş, Olimpiya və dünya səviyyəli uğurlar qazanmış idmançıların bu gün federasiyalarda və məşqçi korpusunda təmsil olunması xüsusi əhəmiyyət daşıyır. Bu, yalnız təcrübənin ötürülməsi deyil, həm də qalibiyyət ənənəsinin qorunması deməkdir. Bir zamanlar tribunadan izlənilən idmançıların bu gün yeni nəsil çempionlar yetişdirməsi Azərbaycan idman modelinin davamlılığını açıq şəkildə göstərir.

Bu prosesin digər mühüm istiqaməti isə regionlarda aparılan məqsədyönlü işdir. Ölkənin müxtəlif bölgələrində yaradılmış müasir idman infrastrukturu, Olimpiya idman kompleksləri və ixtisaslaşmış zallar seleksiya imkanlarını xeyli genişləndirib. Artıq istedadların yalnız paytaxtda deyil, regionlarda da aşkar olunması və inkişaf etdirilməsi mümkündür. Bu isə gələcək uğurlar üçün geniş ehtiyat bazasının formalaşması deməkdir.

Bununla yanaşı, müasir idmanda yalnız fiziki hazırlıq deyil, davranış mədəniyyəti də həlledici rol oynayır. Azərbaycan idmançılarının beynəlxalq yarışlarda qarşılaşdığı bəzi ədalətsiz qərarlara baxmayaraq, onların nümayiş etdirdiyi təmkin və ləyaqət xüsusi qeyd olunmalıdır. Bu davranış tərzi idmanın əsl mahiyyətinə uyğun olmaqla yanaşı, ölkənin beynəlxalq imicinə də müsbət təsir göstərir. Qələbə qazanmaq qədər, onu necə qazanmaq və ya məğlubiyyəti necə qarşılamaq da mühüm göstəricidir.

Bu baxımdan, Azərbaycan idmançılarının həm yarış meydanında, həm də gündəlik həyatda nümayiş etdirdiyi davranış modeli artıq bir standart kimi qəbul olunur. Bu standart yalnız idman uğurlarını deyil, milli dəyərləri də özündə birləşdirir. Gənc nəsil üçün belə nümunələrin mövcudluğu isə gələcək inkişafın əsas təminatlarından biridir.

Nəticə etibarilə, Avropa çempionatında qazanılan qələbə və onun fonunda verilən mesajlar göstərir ki, Azərbaycan idmanı kompleks inkişaf mərhələsinə qədəm qoyub. Burada uğur yalnız medal sayında deyil, həm də formalaşmış dəyərlər sistemində, davamlılıqda və milli ruhun güclənməsində öz əksini tapır. Bu isə Azərbaycanın idman sahəsində qazandığı nailiyyətləri daha geniş strateji kontekstdə qiymətləndirməyə əsas verir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 417 dəfə