Azərbaycan beynəlxalq müstəvidə etibarlı tərəfdaş və mühüm siyasi aktordur

Bakı:

23 °C

63 %

11 m/s

Əlaqə

AZ RU EN

Ana səhifə / YAP xəbərləri / Azərbaycan beynəlxalq müstəvidə etibarlı tərəfdaş və mühüm siyasi aktordur

Azərbaycan beynəlxalq müstəvidə etibarlı tərəfdaş və mühüm siyasi aktordur

08.05.2026 [14:25]

2026-cı il mayın 4-də Azərbaycan Respublikasının Prezidenti cənab İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxış edərək Azərbaycanın beynəlxalq münasibətlər sistemində artan rolunu və Avropa ilə əməkdaşlığa verdiyi önəmi bir daha nümayiş etdirdi. Dövlət başçısının çıxışı regional təhlükəsizlik, enerji əməkdaşlığı, nəqliyyat layihələri və sülh təşəbbüsləri baxımından xüsusi diqqətlə qarşılandı. Möhtərəm Prezident öz nitqində Azərbaycanın Avropa üçün etibarlı tərəfdaş olduğunu vurğulayaraq ölkəmizin enerji təhlükəsizliyinin təmin edilməsində mühüm rol oynadığını qeyd etdi.

Cənab Prezident çıxışında Azərbaycanın son illərdə həyata keçirdiyi iri enerji layihələrinin Avropa ölkələrinin enerji ehtiyaclarının qarşılanmasına mühüm töhfə verdiyini bildirdi. Xüsusilə Cənub Qaz Dəhlizi layihəsinin uğurla fəaliyyət göstərməsi və Avropaya təbii qaz ixracının artması Azərbaycanın strateji əhəmiyyətini daha da yüksəldib. Dövlət başçısı vurğuladı ki, Azərbaycan yalnız enerji resursları ixrac edən ölkə deyil, eyni zamanda regional sabitliyə və iqtisadi əməkdaşlığa töhfə verən etibarlı tərəfdaşdır.

Ölkə başcısı çıxışında regional sülh və təhlükəsizlik məsələlərinə də toxundu. O, bildirdi ki, Azərbaycan bölgədə davamlı sülhün və əməkdaşlığın təmin olunması istiqamətində mühüm addımlar atır. Dövlət başçısı Azərbaycanın beynəlxalq hüquqa əsaslanan mövqeyini diqqətə çatdıraraq regionda yeni əməkdaşlıq mühitinin formalaşmasının vacibliyini vurğuladı. Bu yanaşma Azərbaycanın həm region ölkələri, həm də Avropa dövlətləri ilə münasibətlərində qarşılıqlı etimadın möhkəmlənməsinə xidmət edir.

Orta Dəhlizin inkişafı, Şərqlə Qərbi birləşdirən nəqliyyat marşrutlarının genişləndirilməsi və Azərbaycanın tranzit imkanlarının artırılması ölkəmizin geosiyasi mövqeyini daha da gücləndirir. Dövlət başçısı qeyd etdi ki, Azərbaycan Avrasiyanın əsas nəqliyyat mərkəzlərindən birinə çevrilməkdədir və bu istiqamətdə beynəlxalq əməkdaşlıq uğurla davam etdirilir.

“Avropa Siyasi Birliyi”nin Zirvə toplantısında Prezident cənab İlham Əliyevin çıxışı Azərbaycanın beynəlxalq nüfuzunun artdığını və ölkəmizin qlobal proseslərdə mühüm rol oynadığını bir daha nümayiş etdirdi. Dövlət başçısının səsləndirdiyi fikirlər Azərbaycanın Avropa ilə münasibətlərinin daha da inkişaf etdirilməsinə, regional sabitliyin möhkəmlənməsinə və qarşılıqlı faydalı əməkdaşlığın genişlənməsinə xidmət edən mühüm mesajlar kimi qiymətləndirilir. Bu çıxış bir daha göstərdi ki, Azərbaycan həm regionda, həm də beynəlxalq müstəvidə etibarlı tərəfdaş və mühüm siyasi aktor kimi mövqeyini uğurla qoruyub saxlayır.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 260 dəfə