Siyasi, iqtisadi və hərbi dialoq

Bakı:

22 °C

76 %

11 m/s

Əlaqə

AZ RU EN

Ana səhifə / YAP xəbərləri / Siyasi, iqtisadi və hərbi dialoq

Siyasi, iqtisadi və hərbi dialoq

08.05.2026 [15:54]

İlqar İlyasov

Yeni Azərbaycan Partiyası Laçın rayon təşkilatının sədri

Azərbaycan və İtaliya arasındakı münasibətlər müasir beynəlxalq sistemdə qarşılıqlı etimad və strateji maraqlara əsaslanan ən uğurlu əməkdaşlıq modellərindən birini təşkil edir. İtaliya Respublikası Nazirlər Şurasının sədri Ciorcia Meloninin 2026-cı il mayın 4-də Azərbaycana reallaşan rəsmi səfəri bu əlaqələrin dinamizmini bir daha bütün dünyaya nümayiş etdirdi. Prezident İlham Əliyevin səfər çərçivəsində verdiyi bəyanatlar iki ölkə arasındakı bağların nə dərəcədə dərin və çoxşaxəli olduğunu sübut edir.

Dövlət başçısının vurğuladığı kimi, bizim siyasi əlaqələrimiz hazırda ən yüksək səviyyədədir. Bu yüksək səviyyəli siyasi dialoq təkcə rəsmi səfərlərlə məhdudlaşmır, həm də beynəlxalq platformalarda bir-birini dəstəkləməkdə və qlobal çağırışlara qarşı vahid mövqedən çıxış etməkdə özünü büruzə verir. Bakı və Roma arasındakı bu səmimi ünsiyyət regional sabitliyin qorunmasında da mühüm rol oynayır.

Bu tərəfdaşlığın ən parlaq və gələcəyə hesablanmış nümunələrindən biri kimi, keçən il Bakıda böyük təntənə ilə İtaliya-Azərbaycan Universitetinin açılışını qeyd etmək olar. Təhsil və elm sahəsindəki bu nəhəng layihə iki xalqın bir-birinə daha da yaxınlaşmasına, gənc nəslin hər iki ölkənin mədəni və intellektual irsini mənimsəməsinə xidmət edir. Bu universitet sadəcə bir təhsil ocağı deyil, həm də ölkələrimiz arasındakı humanitar əməkdaşlığın rəmzinə çevrilmişdir.

Azərbaycan Respublikası və İtaliya Respublikası arasında ikitərəfli münasibətlərin inkişaf trayektoriyası göstərir ki, tərəflər bütün sahələrdə maksimum səmərəliliyə nail olmaq əzmindədirlər. Bizim ölkələrimiz strateji tərəfdaşdırlar və bu tərəfdaşlıq sadəcə sözdə deyil, fundamental sənədlərlə də təsbit olunmuşdur. Xüsusilə qeyd edilməlidir ki, 2014-cü və 2020-ci illərdə strateji tərəfdaşlığa dair imzalanmış iki mühüm bəyannamə əlaqələrimizin hüquqi bazasını möhkəmləndirmiş və gələcək fəaliyyət üçün yol xəritəsi funksiyasını yerinə yetirmişdir.

İqtisadi müstəvidə İtaliya şirkətlərinin Azərbaycanda uğurlu fəaliyyətinin çox böyük tarixi var. Enerji sektorundan tutmuş kənd təsərrüfatına, infrastruktur layihələrindən azad edilmiş ərazilərdəki bərpa işlərinə qədər İtaliya iş adamları ölkəmizin iqtisadi intibahında yaxından iştirak edirlər. Bu fəaliyyət hər iki ölkənin iqtisadi rifahına birbaşa töhfə verir.

Enerji təhlükəsizliyi məsələsində İtaliya bazarı həm neft, həm də qaz üzrə Azərbaycan üçün birinci dərəcəli əhəmiyyət daşıyır. Azərbaycan Avropanın, xüsusən də İtaliyanın enerji təhlükəsizliyinin əsas təminatçılarından biri kimi çıxış edir. Cənub Qaz Dəhlizi vasitəsilə nəql olunan mavi yanacaq İtaliyanın sənaye potensialını gücləndirərkən, Azərbaycanın ixracat imkanlarını genişləndirir.

Əməkdaşlığın yeni və perspektivli sahəsi kimi hərbi-texniki tərəfdaşlıq ön plana çıxır. Prezidentin qeyd etdiyi kimi, bu sahədəki yeni addımlar olduqca ümidvericidir. Müdafiə sənayesi və hərbi hazırlıq sahəsindəki birgə layihələr ölkələrimizin təhlükəsizlik maraqlarının üst-üstə düşdüyünü bir daha təsdiqləyir. Ciorcia Meloninin səfəri və aparılan danışıqlar Azərbaycan-İtaliya münasibətlərinin sarsılmazlığını və strateji dərinliyini növbəti dəfə təsdiq etmiş oldu.

Paylaş:

Baxılıb: 192 dəfə